Read Mayangna Job 18 Bible Online

Job 18 - Mayangna bible

Job 18

¹¿Adika muihni mampat dawarangyah yul bauwa kidika? Di rahm kat, yuyulwa katlaih sipki yulbauna atnin.

³¿Amput dawak didauh kapat maiyamwih, dawak di amangladas kapat maikulwi?

⁴¿Man kultaman laih kulnam daukalwakat, kal-ista bisma kat, sau adika kauhmak wanilang manah kalwarangya, kidika awaskat kipala nunuhni balna kidika pa ūk yaklalawarangyah?

⁵Muih dutni kidika witing awasni pibukwarang, dawak kuhnipau bik dahlwas karang.

⁶Witing awasni pibukna karang, dawak uni yakat yaringni dis kalwarang.

⁷Witing parasni lapakwa kidika bitik laih parasni dis kalna karang, dawak witing alas dilaihnin āna sakkidika pasyakat bukna karang.

⁸Witing tanipas yakat laihnin dini kidika ānakarang, bahang kidika yakat kal-laihna karang.

⁹Wah as lalakna karang witing kalni yakat laihna atnin, dawakat kalni burinimak yakat suruna karang.

¹⁰Kal-laihnin dini kidika ta pasyakat lakna karang, malnikau, bayakwakat laihna atnin yulni.

¹¹Pa bitik yakat witing niningkauh yaklalauwa kaldakawarang; dawak lapakwa bitik yakat laihdang atwi uiwi uiwa kapat kaldakawarang.

¹²Parasni kidika dis dana karang yuhdauwakat; di dutni kidika buknin manah sakkarang witing minityakat.

¹³Siknis laih daunin walanibis as kidika, witing muihni yakat tani tani kalkasna karang.

¹⁴Dawak witing uni yakat kulnin aslah lani bik dakwi yakna karang, dawak king as yamadunin atwa muhni yakat murwi duwi kiuna karang.

¹⁵Uni yakat kuhkau buswi;[26] dawak dini balna minit yakat sulhpa kau rasna karang.

¹⁶Kidika laih sihm pan nuhni as rikni balna buhlana, dawak tingni balna kusulana kapat ki.

¹⁷Witing yulni balna kidika sau akaupak uswi yakpamna karang, dawak watwi witing ayangni kidika yuyulwas karang.

¹⁸Yaringni kaupak puksani yakat ruruhmna karang; adika sauni kaupak kangwi yayakwarang.

¹⁹Tawanni yakat witing sulani balna diskarang; dawakat ūni yakat bik muih as bik sangka awaskarang.

²⁰Witing yulni kidika dakakawarang kat ma kilwa kaupak ma kawakat, muihsak dadauna karang.

²¹Kaput ki muih dutni sangnika diswa kidika, al as Papang yakat dauh kulwa kidika.