Read Mayangna Job 2 Bible Online

Job 2 - Mayangna bible

Job 2

¹Mani kiwi kāwadai, kidika balna watwi Dawan muhni yakat uina atnin makau kisang kau Papang dini yamyang balna kidika, dawak kidika pasyakat insal yul trukyang bik sakdai.

²Dawan yaklauwi kalyulwi dakana: —¿Angkaupak aiwamahn? Yul trukyang kidika nangnitlana: —Sau yakat awaihtik tala likkauna aiwayang.

³Dawakat Dawan yaklauwi kalyulna: —¿Yang diki yamyang Job kidika talnamanh? Sau yakat ūk diski witing kapat, yang yulki yakat dakawi yamnin muihni, sangnika kidika barangni atnin, amungtalnin muih yakat dutni yamnin-awas. Man lawa yayamtang kaldaukalpamnayang pini kaupak, kauna witing kidika barangni yaklauna sakki dutni as bik dis.

⁴Kaunah muih yulni yakyang kidika yaklauwi Dawan yakat nangnitlana: —Baisa witing muihni palni yakat sukdas kat di bitik yamni manah ki. Muih al laih di bitik yamnin sipki sangnika kidika laihwi yakna atnin yulni.

⁵Kauna witing muihni palni yakat sukdata talah amput man muhma yakat dutni mayulwarangpa.

⁶Dawan yaklauwi nangnitlana muih yulni yakyang yakat: —Yamniki, bahang man ais yamkihman kidika yakat yamta witing yakat, kauna sangnika laih uswinih.

⁷Muih yulni yakyang kidika Dawan muhni kaupak kalahwi kiwadai, dawi Job muihni yakat wah dutni as sihwadai, unitak kidika tunan kaupak kalnisut kat kallaihna dai.

⁸Kaput laih Job witing kiwi yalahna wan minit yakat, dawakat witing sau suba sahna as kau duwadai unitak yakat kuhrna atnin.

⁹Dawak yalni yaklauwi kalyulna: —¿Man baisa muih yamni atnin kidika kultaman? ¡Papang yakat dutni kalyulta mahka dauta!

¹⁰Job yaklauwi nangnitlana: —¡Yal, yul pini yulwinih! Papang di yamni balna mayawak dudakat, ¿amput dawak di dutni balna bik mayawak dudas karangyah? Kaput laih, Job witing dutni yamwasdai, witing yulni kau bik.

¹¹Job, witing kaltalyang duwadai muih bās: Elifaz, witing laih Temán sauni kaupakdai, Bildad, witing laih Súa sauni kaupakdai, dawak Zofar, witing laih Naamat sauni kaupakdai. Witingna dakakana dai, Job nining yakat di dutni kalahna kidika, bahang witingna uina dai walaniāna atnin dawak dalani wauhwa kidika witingna bik yaihnit yakat atnin.

¹²Witingna naikaupak Job yakat tatalna dai, dawak amangnilalana, dawakat parasni sarahwi kakaidana, dalani manah dibahngna dawak praknina iswi bibisna, dawak wan kidika mayakat ruruhmwakat witingna tunanina yakat uhna dai.

¹³Usnitkat, witingna bik sau yakat yalalahna ma tiaskaubu, pukta tiaskaubu, kidika pasyakat yul as bik yuyulwasdai, witingna tatalwadai Job dalani wauhwa kidika laih nuhni palni dai.