Read Mayangna Job 20 Bible Online

Job 20 - Mayangna bible

Job 20

¹Man lawa yayamtangkat ising abahlwi; kidika bahang nangmatlakih yawi.

³Man yulki balna yakta yultaman kidika yaustaman, kauna yang amanglatayang amput nangmatlanik kidika.[29]

⁴Man niningh amanglataman kidika laih kaput ki, muih al kidika sau akat kaiwi kalahna kaupak:

⁵muih dutni alasnina kidika parahni ki; witing alasnina kidika sirihni bayakkiwi.

⁶Witing kidika maluihni makau kisang kapat karang, dawak tunan kidika mukus kau kilwika karang bik,

⁷diba kapat kalwarang ki, dawak witing karak kaltalyang yayamni balna kidika amanglalawas karang angkat pāni pa.

⁸Amana kau kapat bayakkiwarang, sihm pukta amana talwa kapat, muih as bik sip walwi yayakwas karang.

⁹Witing karak yalalahwa muihni balna kidika tatalwa dai, kauna waralaih watwi tatalwas karang.

¹⁰Witing muih miniknakunni balna yakat dinina malna dai kidika walanibis balna yaklauwi watwi dinina dai kidika diayana karang.

¹¹Witing wahma parasni kauna sau-ū yakat kiuna karang.

¹²Di dutni kidika auhni kapat dakawi tūni kau;

¹³auhni kidika tinpas yakat laihwatwi duwi, dawak durani kau bik auhni kidika dakawi tani.

¹⁴Kauna usnit dawakat, witing bānipas yakat puisin kalwi, bil puinisin kalwi.

¹⁵Ritsni balna dalna dai kidika nawatwi tiningyakwi; Papang yaklauwi kidika witing bānipas kaupak yakwi.

¹⁶Witing laih bil puinisin udutwasakdai, bahang kidika puinisin yaklauwi ina karang.

¹⁷Witing laih sip-awas karang di manas kidika duwi dakana atnin, tāwas dawak amak balna was kapat kira kidika.

¹⁸Witing duna balna dai bitik kidika watwi dukiwi diana karang; sip-awas karang ritsni balna kidika duwi dakana atnin.

¹⁹Muih miniknakunni balna yakat dinina dakyakna; witing ū yamwas dai kidika laihwi duna dai.

²⁰Dukih kalawa kidika laih sip diswas ki, witing kaupak di as bik yaklawas dai dukih kalawa balna kidika;

²¹witing kaupak di as bik dawak bayakwas dai. Kauna kidika laih sip nai kiwas karang.

²²Di mahni ampus duwarang bik, isninglakwas kidika baisa kal-laihwarang; witing minit yakat muih dudutni balna tingnina kidika bukna karang.

²³Bani kidika kalbuhngdanin yamwarang bik, Papang kulnin daukalna kidika witing minit yakat sihwarang: kulnin daukalna kidika waslauwa kapat kalawak witing minit yakat uhwarang.[30]

²⁴Kalbaunin dini ayan kau yamna kidika kaupak kiri yaklawarang bik, bras kau yamna lasni kidika kal-laihna karang.

²⁵Sibang kidika witing muihni yakat ahlwi bayakwarang,[31] sinibang sutni kidika witing isning yakat ahlwi yaklana karang. Dawak witing muihsak dauna karang;

²⁶witing minityakat puksani bukna karang.[32] Kuh dahlwarang kidika muih as bik biwas karangki, silp dahlwarang ki, bahang witing yakat kalbusna karang dawak ūni bitik laih busna karang.

²⁷Makau kisang yaklauwi witing dutni balna kidika lāih yakna karang, dawak sau laih yaklauwarang witing yulni yakna atnin.

²⁸Papang kulnin daukalna kidika bahng-ilwi witing minit yakat utuhwarang kat ritsni balna kidika bitik laih didisna karang.

²⁹Papang yaklauwi muih dutni dini kidika kaput dana sakki; kidika suerniti kuduh ridi yamna sak kidika.