Read Mayangna Job 21 Bible Online

Job 21 - Mayangna bible

Job 21

¹Yang walakiānamna tanit yamni kidika laih, yang yulki balna kidika dakanamna.

³Yang yulbautingkat kulnamna laihwattanauh, dawak usnitkat arakih manawak aranauh.

⁴Yang kalbiltayang kidika laih muih as karak awaski; kidika bahang kulnik abahlwi.

⁵Yang yultayang yakat dakanama kat, muihsak dauta tubi kaltanama.

⁶Yang palni kidika yakat kultingkat, muihsak dautayang; dawak muihki bitik laih yayukwi.

⁷¿Ais yamwi muih dudutni balna kidika sangninaka duduwi, dawak witingna laih muih barak kakalwi, dawak parasnina bik nuhni duduwih?

⁸Walaninabis balna kidika bararakwak tatalwi, dawak manina balna bik bararakwak tatalwi, bahang kaput laih witingna yaihnitna yakat yamni manahki.

⁹Unina pasyak kulnin aslah kidika ban sakki, Papang bik wah diawas ki.

¹⁰Tuninaruh balna kidika yamni mamahwi; dawak walaninabis balna kidika yayamni manah ki.

¹¹Walaninabis balna kidika kiri yakikisdi sihm sīpbin kapat,

¹²pasnin dini kidika paswi, drom bauwi, dawak bara pupuhwakat alasna sutwi yakikisdi.

¹³Sangninaka kidika yamni barakna ki; dawak isningnalak sau ū yakat uina ki.

¹⁴Papang yakat kalyuyulwi: “¡Yanadatang kat kulnikna aslah awanakuh, man lama kidika talkih yanawas ki!

¹⁵¿Parasni nuhni bitik duwa kidika waisyah, yangna dini yamna atnikna? ¿Ais as dudi witing yakat mamikit yuldi?”

¹⁶(Muih dudutni balna dinina awaski di yamni kidika. ¡Yang kultayang kidika naikau ki, witingna kukulwa karak dawakat!)

¹⁷¿Mampat muih dudutni balna awasnina kidika pibuknayah? ¿Mampat dutni yakat bubuknayah? ¿Mampat Papang kulnin daukalnayah witingna yakat, dawak diyamwak dalani wawauhnayah?

¹⁸¿Mampat kalruruhnayah sihm dibasta wing parasni kaiwi dukiwa kapat?

¹⁹Yulwi, Papang yaklauwi diyamwak walaninabis balna minit lalauna ki, papangnina dutni yamna kidika yulni. Kauna kidika laih dutni yamna muihni palni minitlaunin ki, dalani wauhna atnin.

²⁰Witing duna atnin ki, parasni nuhni bitik duyang kulnin daukalna wahni kidika.

²¹¿Witing ais kulwarangyah dauwak usnitkat walanibis balna wawauhwarang kidika?

²²(Kauna, ¿wais sipyah Papang yakat sumalnin, makau kisang muihni balna yakat bik lanina yamna atnin yulni?)

²³Muih buas kat dadauwi parasnina yamni duduwa kauna, isningnalak,

²⁴di bitik yakat barakna dawak muihnina bik yamni.

²⁵Uk balna kidika laih nawatkauh, witingna niningna yakat tapahlni manah ki, dawak ban kaput dadauwi, isninglak lani kidika dakawas.

²⁶Kaput kauna, sau ū yakat laih bitik kapapatki; bitik babil dikaswi.

²⁷Yang amanglatayang, manna ais yakultamana kidika, dawak bik kulnin dutni dutamana kidika.

²⁸Yulwi dakakawi: “¿Kidika muih dutni dai kidika, witing uni angkat sakyah?”

²⁹¿Manna yulbauta dakasmanah, muih aiwi, uiwi ahawa muihni balna yakat? ¿Dawak witingna yul yuyulwa balna kidika dakasmanah:

³⁰Papang kulnin daukalwak, wah dutni sihwi atwa kidika, dawak muih dutni kidika laih di as bik kal-laihwas ki atwa kidika?

³¹Yamwa balna kidika, muih as bik witing muhni yakat yakwi kalyulwas ki, dawak muih as bik witing yakat minit kalawas ki.

³²Dawak witni kat nuna duwi uiwak, muih bitik kalahwi uiwi, buas laih tanit yakat yaklawi uiwi dawak buas laih dangnit yakat uiwi, kaput bik laih sau-ū yakat uiwak maintatalwi, dawak sauni kidika bik witing niningyakat yudutni ki.

³⁴¡La as bik diski, manna yang akat walakiānamna! ¡Alas manahki, yuyulwa balna bitik kidika!