Read Mayangna Job 23 Bible Online

Job 23 - Mayangna bible

Job 23

¹Baisa wat as yang dutni dakik yultayang kidika laih tapahlni ki, kat Papang witing tingni kidika yang niking kauh kalawak kaina.[36]

³¡Yamni karang yang amanglatayang kat laih angkat waltik yaknik kidika, dawak amput witing yakat yawinik kidika!

⁴Yang yulki kidika witing yakat duyawaki, dawak yulnik dini kidika laih manas palni ki.

⁵¡Yang amanglatayang amput kalyulnik kidika, witing yaklauwi nangkitlawakat!

⁶Kauna witing parasni kidika yakwas karang, kauna yang yulki kidika dakawarang

⁷dawak amanglawarang yang rahm yultayang kidika, dawak dutni as bik yamwas yakulna karang, ¡pri yadapamwarang ban kaput atnin!

⁸Kauna Papang kidika waltayang makilwa yakat, kauna yakat diski; dawak makawa yakat waltayang kauna yakat kalpaktasyang.

⁹Yawayang[37] tingpal niningyakat, kauna talasyang, dawak nawattik aiwik[38] wadah nining yakat yawayang, kauna sip talasyang.

¹⁰Yang lapaktayang bitik kidika amanglawi; bahang yalaihwi talwarangkat, klin alahwaki, sihm gol kapat.

¹¹Yang nining usnit uinayang ta pirini yakat āwas, witing yaklauwi ta nikingkana kidika.

¹²Witing lani balna yakat yawanayang, yang kulnik lani kat laih awaski.

¹³Witing di as yamnin kulwa kat yamwi, muih as bik kalyamwakat satuk yamwas ki.

¹⁴Yang akat ais yamnin kulna kidika yakat yamwarang, sihm di ūk balna kapat libitwi yamwarang.

¹⁵Kidika bahang yang laih yamadutayang, dauh kultayang kidika manah muihsak yaiwi.

¹⁶Papang parasni nuhni bitik duwa kidika yaklauwi bapuh yayamna.

¹⁷¡Yamnikitdai[39] puksani yaklauwi yadispamna dai katlaih, dawak puksani manah ya-awaihdakna katlaih!