Read Mayangna Job 24 Bible Online

Job 24 - Mayangna bible

Job 24

¹¿Ais yamwi, Parasni nuhni bitik duwa kidika, witing di balna yamwarang kidika mani āwasyah, witing kaltalyang yamni balna kidika talna atnin yulni?

²Muih dudutni balna kidika, sau kulwi lain āna kidika yakwi pa ūk lalawi, dawak sīp balna bik mamalwi, witingna tingninalau kidika mahna atnin yulni,

³warau balna dawak tingmak balna tingninalau balna kidika dakyayakwi.

⁴Muih miniknakunni balna kidika, witingna tininapas kaupak kapahr'lalawi, dawak muih kulninna minikun kidika balna laih yakmaldinin ki.

⁵Muih miniknakunni balna kidika laih, sihm kauhmak wanilang biriniku kapat witingna kalahwi wark wawalwi kasninna yaknin yulni, dawak kauhmak wanilang kaupak witingna walaninabis kasninna kidika yayakwi.

⁶Muih yaninamak yakat uiwi plawar minik wawalwi, kidika awaskat muih dudutni balna wainnina yamak yakat uiwi wawalwi, walwi bayayakna minit yakat.

⁷Pukta kidika witingna kalmuknin dis ban kaput payayahwi, sanni kidika nanitna daknin dis ban kaput.

⁸Asang kaupak waslauwa kidika disuihwi, dawak kipala yakat pa wawalwi kana atnin.

⁹Tingmak balna walaninabis batanh dawak witingna yaklauwi dakyayakwi, dawak muih miniknakunni balna yakat gol dini balna kidika diyuyulwi diana atnin.

¹⁰Muih miniknakunni balna kidika laih wahdis ki, dawak plawar minik trurukwi yuh dadauwa pasyakat.

¹¹Kipala kau tikwi disala yayakwa dini kidika wawauhwi; dawak wain atatakwi wasni yakna atnin yulni, kauna witingna laih dikih diawak dadauwi.

¹²Tawan nuhni kaupak naikau ki, dauwi disuhlakwak kaidi sararahwa kidika, kauna Papang laih witing minitna yuyulwa kidika dakawas ki.

¹³Muih buas laih yaringni kidika dutni tatalwi, dawak witingna tanina bitik yakat kidika kaupak isyaklalawi.

¹⁴Muih iyang kidika, puktakau yaklauwi muih minikunni yakat ina atnin yulni, dawak puklakwa kat mahka dimalyang kalwi.

¹⁵Dawak yal bakatyang kidika tahawi puklakwak, dawak muhni putwi, bahang witing kulwi: “Kaput laih muih as bik kaltatalwas ki.”

¹⁶Dimalyang kidika pukta yakat muih ūnina kawi. Witingna kidika bitik laih madah yakat kawi ūnina puputwi; bahang witingna laih yaringni waihnila balna.

¹⁷Madah yaringni kidika witingna niningna yakat puksani ki; pukta yamadangni kidika kauh dukih diawi.

¹⁸[40]Muih dutni kidika laih was yaklauwi murwi duwi kiwi. Sauni balna kidika laih la tuhna ki, dawak muih as bik kidika wainni yamak yakat wark kalahwas ki.

¹⁹Ma daihwa kat was dadasna kidika arwi; dawak sau ū yakat laih muih dutni kidika diswi.

²⁰Nanangni palni bik witing yakat kalkulwas dawak dinitkahwarang; babil balna kakasna karang, dawak muih as bik isningkatwas karang witing yakat. Muih dutni kidika pan as dakwa kapat karang.

²¹Yayal walaninabis dis balna kidika dawakat tingmak balna niningna yakat ban witingna dudutni dai;[41] watas bik ilp diayawas dai.

²²Kauna Papang parasni nuhni bitik duwa kidika kau, parasni duduwa balna yakat tuklakna karang; witing di balna kidika yamwak, muih as bik sangninaka kidika rahm duwas ki.

²³Papang yaklauwi didawak isningnalak yalalahwi, kauna lapapakwa balna bitik kidika talwi.

²⁴Muih dutni kidika wayakilah yaklauwi, kauna tihndawak diswi. Sihm dibasta dakwak kusulawa kapat[42] kusulawi, sihm plawar minik lamwa kapat.

²⁵Dawak adika kaput awaskat, ¿wais sipyah yulna atnin, dawak lāih yakwi yulna atnin kaput-awas kidika?