Read Mayangna Job 27 Bible Online

Job 27 - Mayangna bible

Job 27

¹¡Papang parasni nuhni bitik duwa ayangni kau yaktik yultayang, witing lāki kat yamwas dawi tapalhni manah yawi,

³dawak witing paraski yawarang kat yak-urupdana awaki,

⁴alas as bik yultas awaki, dawak yul rahm-awas balna kidika bik yultas awaki!

⁵Yang sangka awaki pasyakat, dutni yamtasyang kidika laih ban yulta awakiki; ¡yang manna yakat sans manatas awaki, yang akat, dutni yamnayang kapat yāyulnamna!

⁶Yang barangniyang kidika yultayang ban karangki, kat yang akat yayulnin dini dis bahang.

⁷¡Muih bitik yang waihkila kakalwa kidika, muih dudutni balna tanina yakat uiwang!

⁸¿Muih dutni kidika ais tahanin duwih, Papang yaklauwi sangkika kidika dakyakwarang kat?

⁹Witing dutni yakat bukwi, yulwarang kat Papang kaldakawas karangki.

¹⁰Kat witing laih alasna as bik yakwas ki Papang parasni nuhni bitik duwa kidika kaupak, kaput bik witing yakat kalyulwas ki.

¹¹Papang parasni nuhni bitik duwa kidika namangnakaki, dawak witing warkni balna bik.

¹²Dawak manna bitik talnamana kat, ¿amput dawak yul as dauh kidika yultamanah?

¹³[47]Adika wauhnin dalani adika Papang parasni nuhni bitik duwa kidika yaklauwi diawarang ki ahal dudutni muih taihyang balna yakat:

¹⁴walaninabis kidika mahni karang bik, kalbaunin yakat uiwi kalbauwi dadauna karang, kidika awaskat kasnin dini dis kidika yulni yuh dadauna karang.

¹⁵Dauwas sangka yaklalawarang kat siknis kau dadauna karang, dawak yalnina tingmak kakalwa balna kidika kakaidas karang.

¹⁶Muih dutni kidika witing lalah uduhwarang mahni sihm sau kapat, dawak asna bik mahni duwarang,

¹⁷kauna, kidika asnina balna laih muih al as yamni kidika duwi āna karang, dawak kaput bik muih al as kulnin yamni muihni kidika lalahni balna kidika duna karang.

¹⁸Muih dutni ūni kidika laih sihm uhubin ūni kapat ki, dawak bik muih as ū labanni pakwa kapat ki asangpas yakat.

¹⁹Witing di duyang kidika kalangwi kamarang, dawak witing sahmuhwi talwak di as bik diskarang.

²⁰Madah palni[48] muihsak kidika kal-laihna karang, dawak pukta yakat wingbauwa kidika kaiwi kalduwi bayakkiwarang.

²¹Ma kilwa kaupak wing bauwi kaiwi uni kidika bahwi dukiwarang;

²²witing minit yakat wauhna karang, minikun talwas palni, witing irakuhti yamwarang bik sip-awas karang.

²³Wing kidika uiwi kiuna karang parasni nuhni wiuhwi karuk, witing dangnit yakat.