Read Mayangna Job 28 Bible Online

Job 28 - Mayangna bible

Job 28

¹Tunil sakki lalah yayakwa pāni kidika, dawak gol buswi yamni yayamwa pāni kidika bik sakki.

²Ayan kidika sau kaupak yayakwi, kipala balna kidika buswi yudutni yamwak bras kalahwi.

³Muih al yaklauwi puksani kidika kalawak kiwi watna; dawak pa tuhni balna yakat yaklakwi kiwi, dawak kidika puksani yakat kipala walwi.

⁴Wah kau kalsitwi dulauwakat, di dis pāni yakat tunil yayamwi, dawak kidika pāni munah muih as bik bayakwas ki, tawan nuhni kaupak naikau ki.[49]

⁵Sau kidika minit yakat plawar minik yakwi, dawak dinit yakat laih kuhpau kapat daihni sakki.

⁶Dawak kidika yakat kipala sangni kapat sat sat dahlwa kidika duwi, dawak gol sau karak wirih kidika bik duwi.

⁷Yakal balna, dawak di lawani duyang di muihni manah kasyang balna kidika bik, witingna tani kidika tatalwas ki.

⁸Nawah balna bik kidika yakut bayayakwas ki, dawak layan balna bik kidika yakat uiwas ki.

⁹Muih laih kipala pihni yararingni dadasni kidika tingnikau laihwi asang dinit kaupak yakwi.

¹⁰Kipala yakat kuhrwi kakiwi di minit nuhni palni satni balna kidika yakwi.

¹¹Wastuna burhwa balna kidika bitik walwi yakwi,[50] dawak di malni balna bitik lāih yaringni yakat yakwi.

¹²¿Kauna sins lani nuhni kidika angkaupak kaiwi? ¿Angdika pāni yakat sakyah kulnin sirihni kulwi yakwa kidika?

¹³Muih laih amanglawaski minit nuhni ampus duwa kidika, dawakat adika sauni akat sip yakwas ki.

¹⁴Kudungni tuhni nuhni sakkidika yulwi: “Akat diski”, dawak kuma bik yulwi: “Yang bik disyang.”

¹⁵Gol kau bik sip yakdi dudas ki, dawak lalah kau bik sip bakandas ki.

¹⁶Gol tanit yamni kidika kau bik sip minitlaudaski, dawak kipala pauni sa dahlwa kidika dawak kipala sangni kapat sat sat dahlwa kidika kau bik sip minitlaudaski.

¹⁷Gol dawak kipala yaringni karak bik tanit minit nuhni ki; dawak gol manah duwi di yamna balna kidika kau bik tanit nuhni.

¹⁸Sins lani nuhni kidika laih di bitik minit yakat tanit nuhni ki, kipala yararingni dawak kipala dahlwa balna karak tanit minit nuhni.

¹⁹Etiopía kinipala lalahni sangni kapat kidika yakarak bik sip kapapat awaski, dawak gol tanit yamni karak bik sip bakandas ki.

²⁰¿Sins lani nuhni kidika angkaupak kaiwi? ¿Sinsni sirihni di kulwi yakwa kidika angkat pāni yakat sakyah?

²¹Nawah anyang balna miniknapa yakaupak malna sakki, dawak makau uhu balna miniknapa kaupak bik malna ki.

²²Di daukalyang dawak daunin kidika balna bik yuyulwi: “Mayang matapaki manah dakadi amangladi kidika dini.”

²³Kauna Papang laih sins nuhni tani kidika amanglawi; witing manah amanglawi angkat yaknin kidika,

²⁴kat witing laih talwi sau sutni bitik yakat, kaput bik makau kisang dinitkau di balna bangkidika bitik talwi.

²⁵Papang yaklauwi wing parasni kidika kalana dawak was kidika kiwi watnin pāni kalana,

²⁶waslaunin balna kidika bik yamna, dawak alwana tani kidika bik kalana,

²⁷dawak sins nuhni kidika yakat bik talna, minit yamni kidika bik, witing laihwi talwi dawi kaput āna.

²⁸Dawak Papang yaklauwi muih yakat diyulna: “Dawan yakat barangni atnin dawak dini bik yamnin kidika laih sins lani nuhni ki; dutni kaupak dawi yaklanin kidika laih: sinsni sirihni di kulwi talnin lani as ki.”