Read Mayangna Job 29 Bible Online

Job 29 - Mayangna bible

Job 29

¹¡Yamni kitdai, ma balna bayakwi kaina kau Papang nakitdakwa dai kidika nawatwi kaina katlaih!

³Witing yaringni kidika kau yaringni yayamwak puksani yakat sipyang dai lik-atnik;

⁴yang yamni barakni kalnayang kat, Papang kidika ban ūki maintalwādai;

⁵parasni nuhni bitik duwa kidika yaihkit yakat sakkat, yang walakibis balna kidika ya-awaihdak dai;

⁶tāwas kidika sau yakat murwatusdai[51] dawak disala balna kidika laih kipala kaupak buhwi kalahwadai;

⁷tawan nunuhni pasyakat muih kalududuhwa kat, yang yawik paki dutik yalahdingkat.

⁸Wawahma balna kidika, yatalwi pirini yaklalawa dai, dawak muih bararak balna kidika kalnina kau yaklalauwa dai.

⁹Muih nunuhni balna bik yulbauwas dadawa dai, dawak wayani kau yayamwadai muih as bik yulbaunin-awas ap danin.

¹⁰Kabamint muihni balna yul parasni yulbabauwas ahawa dai; tunina kidika laihwatwa dai duranina yakat.

¹¹Muih balna kidika yatalwi, kidika awaskat yadakawi tingkih yayuyulwādai, dawak yang adika yamniyang yakwadai,

¹²kat yang laih warau balna dawak muih miniknakunni balna yakat ilp diatayang dai, kat kidika muihni balna laih ilp as bik diayawas dai.

¹³Dutni palni yakat sakkidika muihni tingkih lani yawa dai; yang ilpki kidika tingmak balna niningna yakat alasna as dai.

¹⁴La kat atnin dawak, kulnin yamni atnin kidika laih yang diki palni dai: kidika laih yang prakki dai ma bitik pasyakat.

¹⁵¡Yang laih minikpa dis muihni kidika minikpa laih yang dai, dawak muih kalni dis kidika yang adika witing kalniyang dai,

¹⁶kaput bik yang laih di dukih diawa balna papangnina yang dai, dawak tringsar balna tanitna dakyang yang dai!

¹⁷Muih dudutni balna muhnina labanni yakat bautik bahtayang dai, dawak ananina kau di laihwi kakasna balna kidika dakyaktayang dai.

¹⁸Yang kultayang dai: “Yang maki balna kidika mahni kuma kauhnimak kapat kultayang dai; muih barak kaltik dauki yang ūki kat.

¹⁹Yang laih pan as waskung yakat dahna kapat, tingni rahni balna kidika puktayakat diwas suihwi.

²⁰Paraski kidika watwi yang akat wisamwarang, dawak paraski dis awaskarang.”

²¹Muih bitik laih yang akat yadakakawādai, dawak ap dawi yadakakawādai yul sumaltingkat.

²²Yang yulbautik datingkat muih as bik kidika minit yakat watwi yulwas dai. Yang yulki balna kidika was kapat minitna yakat tahwādai,

²³dawak witingna kidika dukih diawak tahahawa dai, sihm madaihni kat was lauwang atwi tahahawa kapat.

²⁴Yang witingna niningna yakat aringkat, witing rahm palni laih kukulwasdai, dawak yang muhki alasna kidika talwi sip dadawas dai.

²⁵Yang laki kidika witingna minitna yakat ātayang dai, dawak witingna ais yayamwarang kidika yang lawik diatayang dai, sihm king as kalbauyang balna duwa kidika muhnitna yakat yaklauna sakkapat. Witingna kulninna bukwakat, yang lawik walanina ātayang dai.