Read Mayangna Job 30 Bible Online

Job 30 - Mayangna bible

Job 30

¹Kauna waradika laih, walabis wawahma balna kidika nikingkakari, walabis ahal yang karak takit wawahma kidika papangnina balna kidika yang dunik awasdai sul balna tingkilau maintatalwa balna karak atnin.

²¿Witingna tingnina parasni kidika ais as ilpki atnin daih? Kidika muihni balna laih parasnina bitik dis dana dai,

³yuh wawauhwa kidika, dawak dukih diawa yulni bik. Pukta yakat, witingna uiwa dai kauhmak wanilang yakat pan rikni buhlana balna walwi kasna atnin;

⁴damasni binina pakpuk kau dibasta tapapahlni balna kidika dadakwa dai dawak ubitna panina rikni balna bik kakaswa dai.[52]

⁵Muihni balna kidika, tawan muihni balna yaklauwi dutni ditatalna dai, dimalyang balna kapat dangnitna yakat sarahwi uiwi uina dai;

⁶kidika yulni witingna kidika pa sulihni yakat, sau dakna ataini yakat, dawak kipala nunuhni balna walsah yakat bik yalahninna dai;

⁷damasni pasyakat ahauwadai damasni pasyakat kaluduhwi.

⁸Muih di sip-awas balna, muih as bik walaninabis-awas, yamni-awas dai kidika sauni yakat yalahna atninna.

⁹Waradika laih, witingna dai kidika sarahni yayulwi nikingkakari, dawak yang akat yulwi kakari.

¹⁰Muhnina dutni yamwi yangkaupak naikau kalahwi uiwi, dawak muhki yakat bik susuih tutuhwi.

¹¹Waradika laih tingki yakat di disyang dawak sau yakat buknayang bahang, rispik bik yayawaski.

¹²Yang yaihkit yakat muih mahni ki, dawak yayamwak buktayang, yababauwi dawak yainin kukulwi.

¹³Takipas yakat kalahwi nakitdadakwi, yaina atnin yulni, dawak kidika muihni balna kidika muih as bik laihwatwas ki.[53]

¹⁴Daklana yakat sulihni duwa kapat yang mikit yakat yulni parasni karuk aiwi bubukwi.

¹⁵Muihsak daunin kidika yang mikit yakat bukna; dawak riskipik kidika yangkaupak wing kapat kirana; dawak di manas dutayang balna dai kidika bik mukus kapat disna.

¹⁶Baisa sangka awakih yāwaski; kulnin buknin kidika yak akat kaiwi yalaihna.

¹⁷Dalani balna kidika wakalki kat kawi kiuna; laihwatwas dalani yawi pukta balna yakat.

¹⁸Papang yaklauwi yang dikimak kat yalaihna, dawak parasni yalaihwi yaisihwi[54] prakki yakat.

¹⁹Wasmak yakat yaruhm'ana, yang adika sau yahamni, kidika awaskat wan yang kapat.

²⁰Yang man yakat ilp mayultayang Papang, kauna nangkitlatasman, kalma dinit yakat buktik yultayang kauna yadakasman.

²¹Yang niking yakat kulnam dadasni kalnaman, parasni yang akat yauita aiwaman.

²²Yamtaman wing kidika yadu'kiuna atnin, dawak wingbauwa kidika yaisihna atnin.

²³Yang amanglatayang, daunin yakat yaduyawinin yamtaman kidika, muih sangninaka duduwa balna bitik uiwa pāni yakat.

²⁴¿Muih minikunni yakat ilp kalatasyang dai katpah, dawak kidika minikunni kaupak laihtik yaktasyang dai katpah?[55]

²⁵¿Dalani wauhwa kidika yulni aidasyang katpah, dawak dukih kalawa muihni yakat minikun talasyang katpah?

²⁶Yang alasna kidika tahatingkat, dalani wauhnin dini kidika kaina; kaput bik laih yaringni kidika tahatingkat puksani kaina.

²⁷Ising kidika urupwas yaklauwi; kulnin bukna mani kidika manah taki tahawi.

²⁸Sangkika adika kulnik bukna manah ki, ma yaringni talwaski; muih bitik muhnina yakat ilp yultayang.

²⁹Asangpas sunilu balna wirahnina kapat yang, dawak uhu nuhni wanaihni kapat bik yang.

³⁰Ukitak sani kalna, muihki adika daihni palni ki yamah yabuswa kidika yulni.

³¹Unbaunin balna, paswi yakisdinin balna, bara balna bitik kidika yang niking yakat dalani kaidinin manah wiryaklana.