Read Mayangna Job 31 Bible Online

Job 31 - Mayangna bible

Job 31

¹Yang la as dunayang sirarau balna yakat dukih yanin-awas.

²¿Angdika, Parasni nuhni bitik duwa kidika yaklauwi minit diawih makau kisang kaupak muih bitik yakat?

³¿Muih dudutni, dutni yamyang balna yakat awasyah witingna dutni wauhnin kidika?

⁴¿Kidika awaskat Papang talwasyah yamtayang balna kidika, dawak lapaktayang balna kidika bik talwayah?

⁵Yang rahm yultayang, kulnik dutni karak di as bik yamtasyang dai, dawak muih as kau bik alas kalyulnik kultasyang dai.

⁶¡Papang yaklauwi paun yamni kau yahawang, dawak witing amanglawarang yang dutni yamtasyang kidika!

⁷Ta barangni kaupak alahwik yawanayang kat, dawak yang manah dukih yawa kidika yakat yaduwi kiuna kat, dawak muih dinina as yang tingki yakat dutayang kat,

⁸yang dahnayang balna kidika muih ūk kakaswahng, kaput bik dahnayang balna kidika rikni kau iswi dudutwang.

⁹Datingkat yal as kulnik laihna kat, kidika awaskat yaihkit kau yalahwa yalni yakat pakdik talnayang kat,

¹⁰yalki kidika muih ūk warauni kalwarang, dawak taldas muihni balna kidika witing karak kalalangwarang.

¹¹Kat yang yamnayang balna kidika ayangni dutni duwarang, bahang kidika wah dunin dini palni karang.

¹²Kaput laih kuh dahlwi buswa kapat karang, yang yamnayang balna kidika bitik daukalna karang.

¹³Diki yamyang balna kidika di as yayuyulwakat, witingna yuyulwa yakat yamtayang dai.

¹⁴¿Di as amput satuk Papang muhni yakat duyawinik daih? ¿Ais amput nangnitlanik daih, witing yang akat yayulwak?

¹⁵Sihm Papang kidika yaklauwi mananangki bānipas yakat maiyamna awasyah, witingna yakat dawak yang akat bik sangkika yāna awasyah.

¹⁶Muih minikunni dukih kalawa kidika kalatasyang awasdai, dawak bik datingkat tingmak balna kidika yuh wawauhwasdai.

¹⁷Yang manah dikastayang awasdai, warau balna yakat diatas.

¹⁸Warau kidika papangki kapat diyamtayang dai; tingmak balna nanitna daknin kidika laih yang dai.

¹⁹Yang talingkat muih as asna dis dauwakat, kidika awaskat muih minikunni suruhmnin dis kat,

²⁰yang sīpki balna butuni yakau diatingkat puihni dakawadai, dawak yang akat tingkih yawa dai.

²¹Yang warau niningyakat lawasyang dai, wihta balna karak yamniyang kidika munah.

²²Dawak kidika yulni rahm awaskat, tingki balna adika bahwang dawak salahki kaupak dakwi bukwang.

²³Papang wahni kidika yamadutayang dai; ¡king muhni yakat sip-awasdai wauhna atnin!

²⁴Gol yakat yang wat as bik kulnin atik dutasyang dai dawak rahm bik kultasyang dai.

²⁵Ritsni balna kidika mahni dunik kulnik yakat dutasyang dai, kidika awas bik lalah mahni dunin bik kulnik yakat dis dai.

²⁶Ma yaringni kidika talnayang, waiku kidika yaringni bitik karak kil'kaiwakat,

²⁷kauna kulnik dinit kau mikit yultasyang dai, dawak umnin bik tingki kau yamtik sihtasyang dai.

²⁸Kidika laih wah dunin dini palni dai; ¡kidika laih Papang makau kisang kau sakkidika yakat kulwas atnin lani!

²⁹Yang wat as bik waihkila kidika dutni yakat bukwak alasna dutasyang dai, kaput bik witing minit yakat dutni as kiwakat.

³⁰Wat as bik witing minit yakat la kaltuhtasyang dai, dawak dauwak talnik bik kultasyang dai.

³¹Muih as as yang karak yalalahwa muihni balna kidika yaklauwi, pa ūk muihni balna yakat dutni diyamnin kukulna,[56]

³²dawak datingkat pukta kidika witingna ahni yakat payayahwas dai. Muih pa ūk kaupak aiwi bayayakwa balna yakat ūki dūrni kidika apahni dai.

³³Yang dutni yamnayang balna kidika maltasyang dai, muih ūk yayamwa kapat, dawakat malni yakat bik dutasyang dai

³⁴muih yamaninadutik. Yang ūki payakat āwik dūrki puttik ap datasyang dai, wanaihki balna di dauh as kapat yakukulwarang kidika yulni.

³⁵¡Yamni karang muih as yadakawa katlaih! Yang yulnayang balna kidika ulnayang bik ki, alas awas atnin yulni; waradika laih, ¡Parasni nuhni bitik duwa kidika nangkitlawang! Yang dutni yamnayang kat yulki balna yakwi yuyulwa kidika ulwi yayuyulwang,

³⁶yang dutik yawana awaki, dawak yang tunaki yakat pakki.

³⁷Yang Papang muhni yakat duyawana awaki di yamnayang balna bitik kidika, rispik lani karak yaihnit yakat yawaki.

³⁸Yang sauki balna kidika makau kisang yakat kiwi yulwaski nikingkauh, dawak dahna balna kidika bik kulninna bukwak kakaidas ki.

³⁹Kauna yang muih as dini malnayang kat, kidika awaskat yamak warkni yamyang balna dinina dakyaktik dunayang kat,

⁴⁰¡yang sauki kidika plawar minik yaknin pāni yakat wakal ukuswarang, dawak dibasta dudutni balna bik ukusna karang cebada ukusnin pāni yakat! Kidika yakat Job yulbauwidana.