Read Mayangna Job 32 Bible Online

Job 32 - Mayangna bible

Job 32

¹Muih ahal bās kidika witingna tatalna Job kidika wat wat yulwi yulwa kidika witing laih di dutni as bik yamwas ki, bahang witingna biri biri yuyulwa kidika dadana.

²Kaput dawak al as ayangni Eliú, bahang witing laih Baraquel walanibis dai, Buzi balna kaupak, dawak Ram sulani, witing kulnin daukalna kidika Job niningyakat, sip laihwatwasdai, kat Job kidika wat wat yulwadai bahang witing dutni as bik yamwaski, dawak Papang yakat pātni kidika ilwadai.

³Kaunah kaput bik Job karak kaltalyang yamni balna bās kidika niningna yakat bik kulnin daukalna, kat witingna sip-awas dadana dai bahang Job yakat nangnitlanin kidika, bahang kaput laih Papang karak[57] dutni kalalahna dai.

⁴Eliú kidika laih tanit wahma dai witingna pasyakat, bahang witing tahana dai as balna kidika tatuna Job karak yulbauwi dahn dadawak yulbauna atnin;

⁵kauna witing talwak as balna kidika sip-awas kalalahna dai nangnitlana atnin, bahang witing sip kulnin laihwatwas dai

⁶dawak mahka yulbauna. Yang laih wahmayang, dawak manna laih muih bararak mana, yang kulnik lani kidika sip yultasyang dai.

⁷Dawak kulnayang: “Yamwi talwi lan kalna kidika yulbauwang; kurih mahni pasyakat sins nuhni duna kidika yakwi niningkawang.”

⁸Kaunah di rahm kidika laih muih ahal bitik laih di amanglalawi, kat Parasni nuhni bitik duwa kidika yaklauwi spiritni diana.

⁹Kurih mahni kidika yaklauwi muih yakat sins duyang diyamwaski, kungnibas duwa kidika yaklauwi di barangni amanglawa kalyamwas ki.

¹⁰Kidika bahang yulnayang: “Waralaih, yadakanauh, kat yang bik di yulnik as dutayang.”

¹¹Yang kidika yakat yamni dakasakyang dai manna kulnamna lani yakta yultamana kidika, yul tanit yayamni kidika waltanang manatalnayang,

¹²dawak talnayang, manna as bik Job yakat kalatasmana dai yulni balna kidika lāih yakta.

¹³Kaput bahang manna sins nuhni duyang kaldakakawinih, Papang, kidika laih muih al awaski, witing nangmatnalawarang.

¹⁴Kauna, Job yang akat yawalwaski, dawak yang bik manna yamnamana kapat laih nangnitlatas awaki.

¹⁵Job, muih bās adika balna laih sinsnina disna witingna yul diski man yakat nangmatlanin;

¹⁶kaunah man kulwinih yang ap daki, witingna ap dadawa bahang, dawak bik nangmatlawas dadawa bahang.

¹⁷Adika yulni pas akat awaki dawak yulki, yulnik dini dutayang kidika.

¹⁸Yul balna manah buhng yang sip baisa laihwattasyang;

¹⁹tutnik manah ki, sihm wain kidika di unitak wisam kat puna kapat.

²⁰Yulbaunik ki, apis wingkita dunik, wauhtaman yulni kidika manik ki.

²¹Muih as kau bik tanit yamni kalyamtas awaki muih bitik kau kapapat diyamki.

²²Di rahm kidika laih yang muih as kau bik tanit yamni kalyamnin kidika kulnik lani awaski; ¡Papang yaklauwi wah yawarang, yang kaput yamki kat!