Read Mayangna Job 36 Bible Online

Job 36 - Mayangna bible

Job 36

¹Kulnam apis laihwattah, yang lawik masumalki, kat Papang ilpni yulnik kidika baisa yul mahni dutayang.

³Di amanglatayang kidika bitik yusyamki kaput laih lāih yakna atnik, yayamna muihni kidika rahmni duwi.

⁴Yang rahm mayultayang, alas as bik yultas awaki; tamat yakat sins nuhni bitik duyang kidika dutaman.

⁵Papang laih parasni nuhni bitik duwi, dawak sins nuhni palni duwi, di dutni yamwas muihni kidika[65] yakat dauh kapat kalkulwas ki.

⁶Dutni dawak diswaski, muih dutni yamyang sangnika yakat, kaunah muih miniknakunni kidika niningna yakat lā kat yamwi;

⁷nining muih ahal bararangni balna yakat tanitna dakwi; king balna kidika trunnina yakat ilwi dawi, dawak maluih yakat diduwi.

⁸Kaunah sīn kau disitna ki dawak dalani kidika wawauhna ki,

⁹Papang yaklauwi niningnakawi dutni yayamna kidika amput dadawak witingna manah kapat kaldakanin yakat diduwi kiuna kidika.

¹⁰Yuldibauwi barangni diyamnin yulni dawak diyulwak dutnina kidika danin.

¹¹Yulni dakawi yulwa yakat bubukwakat, alasna isningnalak kidika duduwi sangninaka sutni bitik yakat.

¹²Kaunah yulni dakakawas laih, dauwi, dawak sau ū yakat uiwi witingna baisa isningna aiwas tanitkauh.

¹³Muih dudutni balna kidika kulninna daukakalwi, silak ūni yakat karangbik ilp yuyulwas ki.

¹⁴Wahma yakauna dadauwi; sangninaka kidika dahnkalwi asalni.

¹⁵Dalani wauhnin munah, Papang yaklauwi laihwi yakwi wauhwa muihni yakat; dalani wauhnin munah diawak amanglalawi.

¹⁶Man bik, yamadangni kaupak malaihwi yakna, dawak pri lani kidika manas palni mana; man timabil yakat kasnin dini auhni kidika buhngdana.

¹⁷Muih dutni lani yamnin kidika laih man yakat ki, lama yamwi daunin yakat mawirlanin kidika kaupak sip satuk wirlatasman.

¹⁸Amungtalah, datangkat muih ūk yaklauwi mayulnin awaski ais yamnam kidika, datangkat lalah kidika kulnam laihnin awaski.

¹⁹Kaidinin yakat ilp as diskarang parasma bitik kau sarahma bik.

²⁰Iripnam awaski pukta kaiwabahang, tawan balna kidika pini didiswak.[66]

²¹Amungtalah, watwi dutni yakat kiunin awas, man kidika dalani wauhnin munah mahawi talna bahang.

²²Papang parasni nuhni bitik duwa yakat talah. Sumalyang as bik witing kapat awaski;

²³muih as bik kalyulnin awaski, witing ais yamnin kidika, muhni yakat lāih yaknin awaski dutni yamna kidika

²⁴Sau muihni balna bitik warkni yamna balna kidika nuhni dulauwi yuyulwi; ismang aitah, man bik ayangni nuhni yamnam.

²⁵Muih ahal bitik sipki talnin, naikau karang bik.

²⁶Papang laih nuhni ki, sip amangladaski; witing kurihni bik sip kuldaski.

²⁷Was tahwa balna kidika witing di kau utuhwi duwi, usnitkat kalawak waslauwi.

²⁸Waslauwa wasni kidika mukus kaupak tiliwi kalahwi dawak muih balna minitna yakat was parasni lauwi.

²⁹¿Wais amanglawih, amput dawak mukus balna kidika uiwi, amput dawak kisang yakat alwana kidika yulwih?

³⁰Papang yaklauwi kalawak alwana kidika lapwi kuma muhni yakat, kuma yakat kalawak yakmaldi.

³¹Kaput bayahwi[67] tawan balna yakat dawak kasnin dini kidika mahni diawi.

³²Alwana lapwa kidika tingni yakat laihwi duwi, dawak witing angkat laknin kulwa kidika yakat lakwi.

³³Alwana kidika laih Papang yakat yulwi, wing bauwa kidika kulnin daukalna kidika yulwi.[68]