Read Mayangna Job 39 Bible Online

Job 39 - Mayangna bible

Job 39

¹¿Amanglataman, mampat kat asangpas kutsni balna kidika walaninabis yayakwih? ¿Sana yayal balna kidika walaninabis yayakwak talnaman?

²¿Amanglataman waiku yapak kat walaninabis yayakwih?

³Walaninabis yakwi uru dadawi, dawak kaput laihtak walaninabis kidika batatahnwi,

⁴dawak kidika usnit kat parasni kakalwi asangpas yakat barakwi, dawak witni kat uiwi, kaunah watwi nawatwi aiwas ki.

⁵¿Asangpas biriniku yakat wais yaklauwi pri kalanayah? ¿Wais uluhwi dapamna likyah?

⁶Yang lawik niningkanayang, angkat lik-atnin pāni kidika, kauhmak wanilang dawak sau langni kuma manah yakat.

⁷Dukih kalawas ki tawan nuhni kau di dakadisahni ap-awas kidika, turuh kangyang balna yulnina parasni yuyulwa kidika bik dakawas ki.

⁸Asang ububulni balna yakat awaihwi sihrsihr walwi, dibasta sasangni balna kidika bik pini walwi kasna atnin.

⁹¿Man kultaman, asangpas tuniruh kidika dima yamwarang dawak pukta yakat tumaruh balna ūnina yakat payahwarang?

¹⁰¿Sip awamayah turuh arangni kau pan sitwa kidika kau sitta paktang sau sahnin, kidika awasbik, man dangmat yakat kiwarangyah sau kidika kuswi?

¹¹¿Sip awamayah, witing yakat kulnam āta dunam, kat parasni bahang, datang kat warkma balna yamnin?

¹²¿Man kultaman laih dima minik balna bahwi mawarang kultamahn dawak diminik balna kidika pāni kat uduhwarang?

¹³Yakat dutaman uhu nuhni as: alasna bahlwi, sihm yami nuhni lawani duwa kapat kaldakawi,[75]

¹⁴dawak sumani balna kidika kauhmak yakat damukwi kaput laih ma daihni kidika kalana atnin.

¹⁵Kulwas ki, muih atatakwarang pa, asangpas dini balna bik atatakwarang pa.

¹⁶Walanibis balna niningna yakat dutni, sihm witing walanibis-awas kapat, dawak kulwas ki witing warkni balna kidika dauh kalwarang bik.

¹⁷Kat kidika laih yang lawik sinsni sirihni atnin kidika kalatasyang dai bahang; sins yamni kidika niningpulihna yang.

¹⁸Kaunah witing yaklauwi kira laih, aras dawak aras kilyang balna yakat niningnakari.

¹⁹¿Man lawa aras yakat parasni kalanaman kat pah, wais yaklauwi dinimak basni kidika āna yah?

²⁰¿Man lawa yamtangkat sisin kapat sutwakatpah, wingnita parasni puhwi muihsak āwa kidika?

²¹Walang yakat kuhrwi kulnin dutni karak dawak yamaduwas kalbaunin yakat kawi kiwi.

²²Yamadangni yakat niningkari, dawak yamaduwas ki, isparah niningyakat bik yamaduwas ki,

²³aras kilyang sinibang ūni balna kidika parasni tarang bik langsa balna kidika kuhpau manah raiwarang bik.

²⁴Ta nanaini balna kidika yakat kiri sip laihwatwas palni; trumpit kidika puhwak sip kus sak-awaski.

²⁵Trumpit puhwak biriwi nangnitlawi parasni kiriyaklauwa kidika kau; naikaupak kalbaunin wayani kidika purwak dakawi ais yamnin kat dipakwasak kidika dawak muih parasni sararahwa kidika bik dakawi.

²⁶¿Man sins nuhni dutaman kat pah yakal yakat sumaltang yaklauwi yāhlwa kidika, dawak yaklauwi wadah niningyakauh kiwa kidika?

²⁷¿Man lawa yakalnuh yakat paknamahn witing ūni kidika mayakau yamna atnin?

²⁸Witing likki kipala nunuhni balna kidika tuna yakau, kidika tuna kau sutni subang yakat ūni yamwi.

²⁹Kidika tuna yakaupak talwi dawak laihwi kasnin dini yakat tahawi.

³⁰Walanibis balna kidika ā manah didiwi, dawak angkat di dauna balna kidika yakat witingna yayakwi.