Read Mayangna Job 40 Bible Online

Job 40 - Mayangna bible

Job 40

¹Man, dukih mawadai kidika yangkarak la kanin yang, paraski nuhni bitik dutayang adika, ¿baisa man kultamahn nangmatlanin?

³¿Ais sipyah yang nangnitlanik, di dauh as yang adika? Baisa yamniki ap danik.

⁵Uman wat wat yulbaunayang, dawak di ūk minityakat laktik yulnik dini diski.

⁶Dawan yaklauwi watwi Job yakat kalyulwi dakana, wing parasni wauhwa kidika munah.

⁷Waradika man kulnam dadasni kidika nikingkatah, bahang adika yulwi dakanin balna adik nangkitlatah:

⁸¿Yang adika barangni awasyang, dawak pāt dutayang yakultaman, dawak witni kat man laih dutni as bik dis alahwanam?

⁹¿Man kidika parasniman katpah yang kapat? ¿Man damatsuru kidika alwana kapātyah, yang kapat?

¹⁰Kaput kat nuhni alahwah, king kapat, alasmana yaringni kidika kalmuktah.

¹¹Witingna manah kapat kaldakakawa balna bitik yakat talah: kulnam daukalna kidika kalatang kiwi, sau yakat lakmuktah.

¹²Agha, mamakpa talaman kidika kau tukta laktah, muih dudutni balna kidika taihta labantah, panina kat

¹³Bitik kidika sau yakat nutah, daunin sinilak ūni yakat āta puttah.

¹⁴Kaput laih yang palni talik rahm kulki man parasma kidika yaklauwi minit bayaknin kidika mana.

¹⁵Talah di nuhni dutni wayakani Behemot yakat,[76] kidika laih yang yamnayang, sihm man kapat: witing laih dibasta kaswi turuh kapat;

¹⁶talah dangni kidika ampat parasniyah, dawak pusurni balna kidika ampat parasniyah.

¹⁷Mamahni kidika laih dadasni ki sihm saba kapat, kalni sininwah kalrikwa balna kidika laih surunimak kalna.

¹⁸Wakalni balna kidika laih sihm bras tubo balna kapat, dawak bik ayan kapat ki.

¹⁹Kidika laih yang warkki yamni yamnayang; yang, yamna muihniyang manah sipyang minit bayaknik.

²⁰Asang balna kau, di anyang balna yakikisda kidika, balna yaklauwi dibasta duaiwi kalalawi, kasna atnin.

²¹Was minitkau dibasta balna ukuswa kidika dinit yakat kalangwi, dawak wasmak paskau suku ukusna balna walsah yakat yakmaldi.

²²Was minitkau di ukuswa balna kidika yaklauwi sanni kalawi, dawak waskung kau pan balna kidika kal-awaihdak kalduduwi.

²³Was kidika bangwi kil'kaiwak bik yamaduwas ki; was kidika nangnitak kat kilwi kawak bik isninglak ki.

²⁴¿Wais sipyah, laihwi minikpa balna yaknin, kidika awasbik nangnitak yakat wah kau sitnin?