Read Mayangna Job 41 Bible Online

Job 41 - Mayangna bible

Job 41

¹Leviatán kidika[77], ¿kuyuhl kau pammayah? ¿Witing tuni kidika sitmmayah wah kau?

²¿Sip awamah, nangnitak munah wah lanam kidika awaskat kananmak munah pan rahni kau uhrlanam?

³¿Man kalma dinit yakat bukwi yulwarang katpah, witing yakat minikun talnin, dawak bik kalma dinit yakat bukwi yul yudutni kau mayulwarang katpah?

⁴¿Man lawa kalyamtang kat pramis kalahwarang katpah sangnika bitik yakat, man dima yamyang atnin?

⁵¿Witing karak isdamah, sihm uhubin as kapat? ¿Walamabis yal dini yakisdinin duwa kau sitnin kapat sitmah?

⁶¿Witing yulni limbabahwi lapapakwarang katpah, di bakakanwa pāni balna yakat? ¿Muihni kidika dakwi dawi wauhwi bakakanwarang katpah?

⁷¿Unitak kidika sibang kau pāta ahlma katpah, kidika awaskat tunan yakat suksuk kau pāta ahlma pa?

⁸Tingma kidika witing minit yakat dulauma kat, makalbauwarang kidika damatkahwas karang, dawak watta bik yamtas awama.

⁹Leviatán talma kidika manah, wais karangbik talwi yamaduwi sangka dauwarang.

¹⁰Muih as yaklauwi witing yakat uswarangkat, kulnin daukalwi; muih as bik diski niningkauh yaklaunin.

¹¹¿Wais kat niningyakat yaklauwi, witing yamni kalahwi kiwarang? ¡Muih as bik diski[78] sau bitik akat!

¹²Kalni balna yultayang kidika laih datas awaki parasni duwa kidika laih di ūk diski kapat.[79]

¹³¿Wais sipyah unitak duwa kidika takwi yaknin, kidika awaskat nanitdaknin tubakni lalam[80] bu kidika ahlwi lanin?

¹⁴¿Wais sipyah tinpas kidika takahnin, anani manah yamadangni duwa kidika?

¹⁵Dangni[81] kidika laih nanitdaknin dini balna manah parna tuski dawak kidika dini balna laih dadasni kipala kapat ki.

¹⁶Libibitni palni ki, wing bik sip-awaski bayaknin kidika munah.

¹⁷Libitni palni biri biri āwi kasna, muih as bik sip-awaski kidika kaupak silp silp laihwi yaknin.

¹⁸Kalisahmwa kidika laih alwana lapwa kapat ki; minikpa balna kidika laih yaringwi, sihm mapiris kat ma kilkaiwa kapat.

¹⁹Nangnitak kaupak kuhpau manah dahlwi kalahwi dawak kuhpau raiwi kalahwi.

²⁰Nangnitak kaupak wayau kalahwi, suba paskaupak was lahwak[82] wayau kalahwa kapat, kuh paskaupak.

²¹Wingnita puhwa kidika kuh tuturni dahlwi, dawak nangnitak kaupak kuh dahlwi kalahwi.

²²Dinimak kidika parasni ki bahang witing niningyakat di bitik yamaduduwi.

²³Witing muihni kau kiwisni duwa balna kidika dadasni ki, sip kāwaski ayan buswi dadasni yamna kapat.

²⁴Putni minik kidika dadasni duwi kipala kapat dadasni ki kiwatak kapat.

²⁵Witing yaklauwakat, dawan dauh balna kidika muihsakdauwi kikiri kiri uiwi muihsak manah dibahngilwak.

²⁶Isparah, langsa, sibang, kidika balna bitik di awaski witing niningyakat kalbaunin.

²⁷Witing niningyakat, ayan kidika laih dibasta kusuni kapat ki, dawak bras kidika bik pan dutlana kapat ki.

²⁸Sibang kidika yaklauwi kalyamwak kiraski; niningyakat kipala ruhmnin kidika laih, dibasta kusuni ruhmnin kapat ki.

²⁹Amar nuhni kau bauhnin kidika laih sihm suku panan kau wisnin kapat ki; langsa balna kidika kaiwi bayakwak dakawi kari.

³⁰Witing sau yakat kalmurwi kiwakat, sau yakat kudungni yamwi kiwi, sau tuknin dini baini kau tukna kapat.

³¹Kuma tuhni kidika kalawak suba kau was lahwa kapat yamwi; kahnin sinika bahawi kawaihwa subani kapat.

³²Was yakat dawakat luhusni kidika kalahwi kiwi pihni yaringni bas pihna kapat.

³³Sau akat diski, sihm kapat; kaput kalyamna yamadangni dakanin awas.

³⁴Di tanit dudutni balna niningna yakat bik yaklauwi, dawak witing kidika laih di anyang balna bitik kingnina.