Read Mayangna Job 42 Bible Online

Job 42 - Mayangna bible

Job 42

¹Yang amanglatayang, man di bitik sipman man di as yamnam sip awas dini kidika diski.

³¿Yang adika waisyang man sinsma tuhni kidika dauh kapat kulnik, kaput yamtik yang di amanglatasyang kidika lāih yaknik? Yang yulbaunayang, amanglatasyang dini balna kidika, taldas dini balna yayamni kidika sip amanglatasyang.

⁴Man yayulnaman: “dakah, yulmabaukih yawi; mayultik dakayang adika nangkitlatah.”

⁵Warmani kat, tapaki kau manah madakayang dai, kaunah waradika laih silp mikpa kau matalayang.

⁶Kidika bahang yulnayang balna dai kidika damuktayang, kulnik wirlatayang, sau yahamni dawak wan pasyakat yalahtik.

⁷Dawan yaklauwi Job yakat adika yulni balna kalyulna usnit kat, Elifaz yakat bik kalyulna: “Man namangyakat uba kulnik daukalna, dawak kaltalyang yayamni dutaman balna kidika niningna yakat bik, kat yang amputyang kidika kalyultasmana dai bahang, yang diki yamyang Job yamna kapat.

⁸Waradika turuh ahalmuk tiaskaubu, sīp ahalmuk tiaskaubu duta yang diki yamyang Job yakat yawa kaltalnauh, dawak sakripais karauni kauna bustanauh manna yulmana. Dawak diki yamyang Job manna yulmana minityulwarang, kidika dakaki, dawak dutni as bik manayamtas awaki, manna laih kaput dunamna dai kaunah yang yulki kidika lāih yakta yultasmana kidika yulni, diki yamyang Job yamna kapat.”

⁹Elifaz, Bildad dawak Zofar, witingna uiwi yayamna Dawan yaklauwi dipakna dai kaput, dawak Dawan dakana Job minityulna kidika.

¹⁰Job witing kaltalyang yamni balna yulnina minityulna usnit kat, Papang yaklauwi watwi kalana dai dini balna muhnilau duwa dai kidika, dawak muhnilau di duwa balna dai kidika watbu minitkau lakwi kalana dai.

¹¹kaput laih wirahni ahal, yayal balna bik bitik uiwi kaltatalna dai dawak kaltalyang yamni duwa balna dai kidika bik, kaput bik laih sara mani kau kaltalyang duwa balna dai kidika bitik, dawak kidika balna bitik kalpakwi ūni yakat kasnin alasnina as yamna. Walaniahana dalani wauhna balna kidika bitik yulni, Dawan yaklauwi kalsihna dai kidika, dawak witing bitik yaklauwi lalah kalalana, dawak ting ānin gol bik as as kalalana dai witingna bitik.

¹²Papang yaklauwi Job yakat blisin kalana, witing kurihni balna witni yakat, di mahni palni, muhnilau dai kidika karak dawakat. Sīp tausin 14 duna, kiamil tausin tiaskauas, turuh ahalmuk pan muryang balna kidika tausin as dawak biriku yayal bik tausin as.

¹³Kaput bik laih walanibis ahal salap minit kau arungka[83] duna dawak yayal laih bās.

¹⁴Walanibis barakni kidika ayangni pakna dai Jemima,[84] dawak usnit kidika laih Cesia,[85] kidika kaupak bās kidika laih Keren-hapuc.[86]

¹⁵Sau bitik yakat yayal yaksihni ūk disdai Job walanibis yayal kapat. Papangni yaklauwi witing dini balna kidika walanibis yayal yakat diana dai, wirahnina ahal balna kidika karak libitwi.

¹⁶Kidika usnit kat, Job witing sangka dai kurih 140, kaput laih muihbarak kalwi dauna, walanibis balna talna, mani balna, buhni balna, dawak buhni walaninabis balna bik talna dai.