Read Mayangna Job 5 Bible Online

Job 5 - Mayangna bible

Job 5

¹Sarahta Job, talma wais nangmatlawarang pa. ¿Angdika innisal yakat walmayah?

²Tapahlni kidika laihna atnin, kidika awaskat mamuihki nuhni dukih kalawa yakat laihnin laih tapadadas lani as ki, bahang daunin yakat duwi kiwi.

³Talnayang dai tapadadas kidika witing dini balna yamni barakwakat, kauna ūni kidika laih sirihni bahwi uhna dai.[6]

⁴Walanibis balna kidika di dianin muih diski, la uni yakat dutni diyayamna ki, dawak muih as bik diski tunanina minit yulnin.

⁵Di minik yayakna kidika, yuhdauwa muihni balna kakasna, wakal pasmunah yakwi, dawak dukih diawa muihni balna tutumna ki di manas duduwa balna niningna yakat.

⁶Dutni kidika sau kaupak pitwi kalahwaski, dawak makulnik panis kidika bik sau kaupak barakwas ki:

⁷kulnin panis kidika muih al yaklauwi yamwi, sihm kuhpau raiwi kalahwa kapat.

⁸Man wauhtaman kapatyang kat, yang laih Papang yakat nawattik yawaki, kaput bik yulki balna kidika witing tingni yakat daki;

⁹¡witing yamwi, di manas dawak taldas dini kidika nuhni palni, kaput laih muih as bik amanglawas ki!

¹⁰Witing yaklauwi sau akat was sihwi, bahang kaput laih sau akat suihwi;

¹¹witing yaklauwi kulninna minikunni balna kidika laihwi dulauwi, dawak kulninna bukna balna yakat bik pa as yamni diawi;

¹²witing yaklauwi yamwakat, kulnin dutni muihni witing warkni balna yamnin kulwa kidika bitik laih dauh kalna ki.

¹³Kulnin sirihni di kulwa muihni kidika witing yaklauwi laihna ki, dawak yamwakat warkni dutni balna kidika dauh kalwi.

¹⁴¡Madah yaringni pasyakat, witingna kau duwi lapapakwi, puksani dimuklakna ki sihm pukta kapat!

¹⁵Papang yaklauwi muih minikunni kidika laihwi yakna ki, muih dudutni balna tataihwa tingnina kaupak;

¹⁶muih parasninadis balna tahahawa kidika laih witing yakat ki, ¡witing yaklauwi muih dudutni balna tininapas putwi!

¹⁷Kidika alni alasna atnin ki, Papang yaklauwi bilwa kidika yulni; parasni nuhni bitik duwa kidika yaklauwi mataihwakat anwinih.

¹⁸Witing yaklauwi muih as muihni yakat dakwa kidika, kaput bik watwi asna kungni kau sitwarang ki; dawak tingnikau parasni bauwa kidika witing yaklauwi sanni yamwi.

¹⁹Wat wat yamadangni kaupak malaihwi yakwarangki, dawakat dawak man yakat dutni malaihwas karang.

²⁰Yul lakwarang mani yakat, daunin kaupak malaihwi yakwarang, dawak war kaiwarang mani balna yakat malaihwi yakna karang isparah anan kaupak.

²¹Muih tunina dutni kaupak naikau mayakwarang ki, dawakat yamadutas awamaki daukalwi dispamwarang mani yakat.

²²Yuh, dawak, dutni niningyakat arama ki, kaput bik laih di anyang balna niningna yakat yamadutas awama.

²³Tamapas yakat kipala balna kidika makapahwas karang ki, dawak di anyang balna kidika karak kaltalyang alahwama.

²⁴Uma pasyakat baraknin kidika sakkarang ki, dawak tingmalau balna kidika kulta talang bitik bangkarang ki.

²⁵Man sulama balna kidika mahni duma sihm asangpas kau dibasta balna kapat.

²⁶Muihma yamni yakauna muih barak kalma, di minik yamni lalahwa kapat awama.

²⁷Mayang di balna taldi bayakna mayang yakat kaput maiyulwi; adika yulni dakah dawak man silp yamta talah.