Read Mayangna Job 6 Bible Online

Job 6 - Mayangna bible

Job 6

¹Yang dalani mahni wauhtayang kidika paun kau awi talwarangkat,

³tanit tikini karang ki kuma kauhnimak karak dawakat. Kidika bahang kulnik dalani kau dutik yulbaunayang.

⁴Parasni nuhni bitik duwa sinibang kidika, yang muihki kat yapana, dawak puinisin kidika āki yakat bitik āwilana. Papang yang nikingkauh yaklauwa kidika muihsak manah yabahngna.

⁵¿Biriku kidika di parasni yulwakatpah, kasnin manas duwa manikat? ¿Kidika awaskat turuh almuk kidika mahwi, witing sihrsihr manas duwa manikat?

⁶¿Angdika muihni kuma dis sunni di kaswi? ¿Amput yamni karangyah di as auhni dis kidika?

⁷Yang di as kasnik-awas kulnayang dai kidika waradika yang kasnik palniki.[7]

⁸¡Yamni karang yang di yultayang kidika Papang yāwarang kat; yamni karang dukih yawa yakat yamwarangkat!

⁹¡Yamni karang, witni kat Papang yaklauwi barangni sangkika adika dispamwarang kat!

¹⁰Dalani nuhni dutayang kidika pasyakat, witing kaput sangkika sau akaupak yakpamwarangkat, walakiāna as karang yang niking yakat, yang niningh witing yulni balna kidika rispik kalanayang, Papang maisihnidis kidika.

¹¹Paraski bitik witna sip baisa wauhtasyang, sau akat sangka atnin tannika bitik laih disna.

¹²Kipala dadasni kapat awasyang, dawak bras kapat bik awasyang.

¹³Yang alas mikit praisni ānik bik sip-awasyang, dawak di ūk kaupak paraski as dunik bik diski.

¹⁴Kaltalyang yamni as dalani wauhwa kidika laih minikun talwi, Papang parasni nuhni bitik duwa yakat barangni-awasdai karang bik.[8]

¹⁵Kauna manna laih mayang karak kaltalyang yamni mayang kauna, niking yakat dutni yamnamana, sihm wastuna burhwi kalahwas buhlakwa kapat mana.

¹⁶Was kidika buhutni murwi kaiwi, was dadasna dawak mukus pihni uhwa kidika karang banawi kaiwi;

¹⁷kauna was dadasna sanni kidika baykkiwakat was kidika buhlakwi, dawak kidika minit yakat ma daihni kidika kaiwakat was kidika dahn kalwi.

¹⁸Kaput kalahwakat, muih mahni tapas kau aiwabang kidika ta diswi pini walang was dis pasyakat uiwi dauna atnin.

¹⁹Tema dawi Sabá muihni balna tapas yakat was dai kidika walwi sip yayakwas ki,

²⁰dawakat uiwi kalahwi talwi kulninna bukwi, tahahawadai kidika dutni manah kalahna ki.

²¹Kapatmana, manna yang niking yakat:[9] yang wauhtayang kidika dutni palni ki, dawak tala yamadutamana.

²²Kauna yang di as bik yultasyang, lalah bik yultasyang yamni alahwinik yulni,

²³waihkila niningkaupak yalaihta yaktanauh yultasyang, dawak dimalyang balna tingninapas kaupak bik yadakta yaktanauh bik yultasyang.

²⁴Lan alahwinik kidika yatanauh, kulnik yakat apaktik duki: dawakat nikingkatanauh dutni yamnayang kidika.

²⁵Muih as bik yul barangni niningkauh yaklauwas ki, kauna manna laih yamni amanglatas data yang akat dutni kidika yailtamana.

²⁶Manna yang yulki balna niningkauh lawamana, yul dauh balna wing yaklauwi dukiwa yulni balna kidika.

²⁷¡Sip mana warau bin as sangnika karak isdanamna dawak kaltalyang muihni as yamni dutamana kidika wauhta bakanna atnamna!

²⁸Waradika yatalnauh, biri biri mamuhki kaltaldanang; alas yultayang kat yayultanauh.

²⁹Manna yulnamana kidika datanang bayakkiwang, muih dudutni atwinih; amanglatanauh yang di as rahm kat yultayang.

³⁰¿Manna yang adika alas muihni kapat yakultamana, dawak manna ismangna aitasmana yultamana kidika?