Read Mayangna Job 8 Bible Online

Job 8 - Mayangna bible

Job 8

¹¿Baisa ampus kaput yulma sakmahn, wingnuh parasni yulwa kapat yultaman kidika?

³Papang parasni nuhni bitik duwa kidika, witing la kat kidik kaupak satuk yamwas ki, dawak muih rahmni kidika wirwaski.

⁴Rahm palni kidika laih man walamabis balna kidika Papang niningkauh dutni yayamna, dawak witing yaklauwi aitani kat wah kidika diana.

⁵Papang yakat walta, parasni nuhni bitik duwa kidika, dawakat kalyulta man yakat mamakun matalnin.

⁶Man dutni dis, dawak barangni awamakat witing main matalwarang, dawak bik mawarang ūma as yamni man dunam kat dini kidika.

⁷Man dima minit nuhni, dawak bik mahni dutaman dai kidika, waradika mawarang yakarak baisa tanit duma.

⁸Sulani bayakwi kaina balna yakat yulta dakah, dawakat lan alahwa[11] witingna sangninaka yakat di manas talwi bayayakna kidika sara mani kau.

⁹Mayang laih damai muihni mayang, bahang di amangladas ki; adika sauni akat mayang mamaki balna kidika laih masanni as bayakkiwa kapatki.

¹⁰Kauna sara muihni bararak balna laihtak sip ki di manas masumamalna atnin.

¹¹Junco dawak papiro kidika balna laih bararakwi was manas duwa pāni balna yakat;

¹²kaput kauna, baisa dakdas sakyakauna buhlana ki witing tatuna, dibasta ūk balna karak dawakat.

¹³Muih dudutni balna kidika sihm kapat ki, Papang yakat dinitnakahwa balna kidika: tahawi talnin dai kidika bik dutni manah kalna ki.

¹⁴Tahawi talnin dawak witing rahm yamni atnin kidika laih sihm supai bani as kapat ki.

¹⁵Trit wahni yakat laihnin kukulwarang kauna sip-awas karang ki, kidika awaskat supai bani kidika yakat lalaihwarang bik sihm kapat karang ki.

¹⁶Muih dudutni balna kidika laih sihm dibasta balna ma daihni dinit yakat kapat ki, dipulu dahna pāni bitik paskau yakat;

¹⁷rikni balna kidika kipala yakat laihwi birwa[12] kapat ki,

¹⁸kauna muih as yaklauwi iswi dutwarang kat, muih as bik amanglawas karangki, kidika pāni yakat di ukusna dai kidika.

¹⁹Kaput laih dahn kalna ki barakna dai kidika, dawak kidika pāni yakat dibasta ūk ukuswi.

²⁰Muih al as dutni yamwas kidika Papang yaklauwi ruhmwi dawaski, dawak muih dudutni balna yakat bik ilp diawaski.

²¹Witing yamwakat man arama ki, dawak alasna duta sarahma;

²²waihmala balna laih nawatnikauh asalnina kalahna karang ki, dawak muih dudutni balna ūnina kidika laih daukalna karang.