Read Mayangna Job 9 Bible Online

Job 9 - Mayangna bible

Job 9

¹Yang amanglatayang adika laih kaput ki, bahang Papang niningyakat laih sip yuldaski di as bik dutni yamdas ki.

³Muih as Papang karak kalbilnin kulwarang kat, kulnin lani tausin yakwarang yakaupak as bik laihwas karangki.

⁴Papang laih parasni nuhni duwi dawak bik sinsni lani bik, ¿wais sipyah witing niningyakat yaklauwi yamni minit bayakna atnin?

⁵Papang, kulnin daukalna kidika kau asang nunuhni balna bik itikwi, dawak tuklakwi, kauna muih as bik amanglawas ki.

⁶Witing yaklauwi kalawak sau adika dulauwi isihwi, dawak rahni balna āna kidika bik isihwi.

⁷Witing yaklauwi pakwak ma kidika kalahwas ki, dawak yala balna bik ingni yayakwas ki.

⁸Muih as bik tingnisut laihwas ki kauna makau kisang kidika yamna, dawak kuma paskau di anyang dutni kidika bik taihwi sikitna.

⁹Witing yaklauwi yala balna kidika yamna: Osa mayor, Orión dawak Pléyades, dawak wadah niningkauh yala uduhna as balna kidika bik.

¹⁰¡Witing di manas taldas dini balna nunuhni kidika yamwi, dini balna kidika muih as bik amanglawas ki!

¹¹Papang kidika yaihkit munah kaiwi bayakwarang bik sip talas awaki; bayakwak bik amanglatas awaki.

¹²Witing di as laihwi duwarang kat, ¿wais sipkarangyah laihwinih kalatnin? ¿Witing di balna yamwa kidika wais yaklauwi kalyulwarang yah?

¹³Papang kulnin daukalwakat, sip īsi lungwaski; witing kalni dinit yakat Rahab[13], karak aslah kalpapakna balna dai kidika bubukna ki.

¹⁴¿Amput yul as yaktik Papang nining yakat yulkiyah?

¹⁵Yang di as bik dutni yamtas awaki bik, sip-awasyang nangnitlana atnik, witing laih wihta, bahang mikun yatalnin manah laih sipyang yulna atnik.

¹⁶Yang lawik la ūni yakat yulki karangkat, witing kiwarang yakat, dawak bik kultayang yulki balna kidika, witing kulwas karang.

¹⁷Kalawakat mikit yakat wingnuh as kaiwarang, dawak dauh kauh laih pilauki balna kidika manas kalahna karang;

¹⁸kalawak tapalhni balna kidika yabang-ilna karang, dawak wingkita dunik bik sip-awas awaki.

¹⁹¿Yang paraski kau yamnik karangkat? Witingkauh tanit parasni ki. ¿Lā yakat kaltiki karangkat? ¿Wais laihwi dukiwarang yah?

²⁰Yang, barangni, di as bik dutni yamtas awaki karang bik, Witing[14] yaklauwi dutni yamna yakulwarang ki.

²¹Yang dutni yamtasyang, kauna kidika laih dauh di diski; yang sangkayang adika yasuhdana.

²²Di bitik laih sihm kapapat manah ki. Bahang kidika kaput kultayang yang: dawak witing yaklauwi iwi dis yamwi, dutni yamna muihni yakat dawak dutni yamwas muihni yakat bik.

²³Daunin dini kaiwa kidika yakat muih dutni yamwas bik dauwi, dawak Papang laih kari, kulninna ababahlwa muihni balna yakat.

²⁴Sau adika muih dutni balna tingnina yakat āwi dawi, dawak wihta balna kidika miniknapa sitwi. Bahang Papang yaklauwi yamwas kat ¿wais yamwarangyah?

²⁵Yang maki balna kidika parasni palni kirana ki, kulnik alasna kidika talasyang kat.

²⁶Kuma kuring parasni kikira kapat kiwi, dawak sihm yakal di laihkuhti parasni uiwi kiwa kapatki sirihni kiwi.

²⁷Dalawa balna kidika dakas datik alasna kapat alahwakuhting bik,

²⁸dalawa balna kidika bitik watwi kaiwi bilkilauwi, bahang Papang laih muih as bik yakat dutni yamwaski laih kaltaski.

²⁹Dawak witing yaklauwi dutni yamnayang yakulwākat, yang sip di as bik yamtasyang.

³⁰Yang tingki kidika sup[15] kau suhki karangbik, dawak sup wasni balna kapatnah kau kahki bik,

³¹Papang yaklauwi wasmak yakat yataihawarang, dawak yang silp prakki balna kidika bik tiking dulihwarang.

³²Papang muhni yakat sip lawasyang, muih al as kau yamnin kapat, dawak bik kalyulnin witing karak lā ūni yakat yawinikna.

³³¡Yamnikitdai, yaihkitna yakat wihta as sakkat laih, yangna mikitna yakat parasni duwakatlaih,

³⁴Papang wah yawa kidika laihwatna atnin, dawak uba bilkilauwa kidika bik!

³⁵Kaput kat laih yang yamadutas yulki, kat yang kulnik yakat diski witing muhni yakat dutni yamnayang kidika.[16]