Read Mayangna Salmos 10 Bible Online

Salmos 10 - Mayangna bible

Salmos 10

¹[5] Dawan, ¿ampadawak man nai kau palni watta manh? ¿Ampadawak maldamanh, kulnin tuhni kaiwa mani yakat?

²Nuhni kaldakanin karak, dutni yamyang kidika annin nuhni karak, muih miniknakunni balna yakat laihkuhti uiwi kiwi; kaunah witing alas di laihnin dini āna yakat bukna atnin karang ki.

³Muih dutni kidika, alas dukih kalawa yakat manah kulwi. Witing manah dunin kulnin yakat sakkidika laih Dawan yakat dauh kaltalwi.

⁴Muih tapadadas kidika nangnitak dulau dawi yulwi: “Papang diski. Ais yamtayang kidika muih yayulwi dakanin muihni diski.” Kidika yulni manah kulninna yakat sakki.

⁵Di bitik yamwa kidika yamni manah kalahwi. Witing nining yakat, man lāma barangni kidika naikau kapat kulwi, witing minikpa kaupak naikau palni talwi. Witing waihnila balna niningna kari,

⁶dawakat kulwi, muih as bik kalyamwak bukwas karang ki, witing yakat tatalwas karang kapat, dawak dutni as bik witing yakat kalahwas karang kulwi.

⁷Witing tinpas kidika, di dutni manah buhngki, alas yulnin dawi muih kau usnin; witing yulni balna kalahwa kidika, muih kau taihnin dawi dutni lani manah ki.

⁸Tawan binina yakat uswi malnikau dawak muih dutni yamwas yakat iwi. Muih tanit daknin dis yakat minikpa talwa kidika dawas ki:

⁹sihm layan as, pāni sulihni kau sakkapat, muih minikunni yakat yakpakdi talwi, witing yakmaldinin pāni duwa kaupak, tahawi awarni kaiwak minit yakat bukwi laihnin, laihwa manikat, witing murwi dukiwi.

¹⁰Abukwi, dawi muihni kidika murwi duwaiwi kaluduhwi, dawak, muih tani daknin dis kidika, witing tipisnimak nanaini yakat bubukwi.

¹¹Muih dutni yamyang kidika kulwi, kidika yamwa bitik Papang dinit kahwi, muhni putwi dawi di bitik kidika talwas ki kukulwi.

¹²¡Lawah, Dawan, man tingma kidika dulautah! ¡Muih isningna bukna balna yak damatkahwinih!

¹³¿Ampadawak, Papangki, muih dutni balna kidika sarahni yayamwarang yah, witingna kulninna yakat, man lawa la dilaihtas awamaki atwa kidika?

¹⁴Man palni talaman, witingna dutnina nuhni duduwa kidika; ¡man talna man, bahang witingna dutnina yayamwa minit kidika diana ki! Tanit daknin dis balna kidika man yakat maduduwi; man kuduh warau balna ilpnina.

¹⁵¡Dutni yamyang balna tingnina kidika bahta! ¡Witingna dutni yayamna kidika minit dikulta, dutni yayamna kidika paktangkat bitik minitlalauwang kidika dis kalwarang kat! ¡Paktangkat as bik datang bayaknin awaski!

¹⁶Dawan kuduh ban kaput atnin kingni as ki; ¡witingkau kulwas balna yak, witing sauni kaupak yakwi ruhmawarang ki!

¹⁷Dawan, man muih miniknakunni minitna yuyulwa kidika di dakaman, man lawa kulninna alasna di yamta man, dawak witingna ais yuyulwa kidika di daka man.

¹⁸Man lawa warau balna dawi taihna muihni balna, lanina kidika barangni yamtah: ¡muih al sau kau yamna, kidika watwi yamadangni lani dulaunin awas ki!