Read Mayangna Salmos 102 Bible Online

Salmos 102 - Mayangna bible

Salmos 102

¹Kulnin bukna as Papang muhni yakat minit yulna dutni dakawa kidika yulni. Dawan, mikityultayang adika dakah, ¡datangkat yang sarahtayang kidika man yakat kiwikawang!

²Man muhma kidika yangkaupak malwinih kulnik kaida mani balna yakat; ¡tapama yuta yadakah!, ¡sirihni nangkitlatah, mayultingkat!

³Yang sangkika adika danhkalwi sihm wayau kapat, yang wakalki balna adika buswi sihm kuh tuturni kapat,

⁴yang kulnik kidika bukna sihm dibasta kapat kusulawi; ¡di bik kaskih yawaski!

⁵Ukitak kidika wakalki yakat birki uba aidayang kidika yulni.

⁶Yang laih sihm kauhmak wanilang kubamhni kapatyang, kaput bik pa daukalna paskau kubamh kapatyang.

⁷Amasyang. Yang laih sihm ū makau uhubin alas sīkkidika kapatyang.

⁸Waihkila balna kidika yauhuswi laihwatwas palni dawak ayangni kidika duwi dutni yayuyulwi.

⁹Di kasnik pāni yakat, wan manah uktayang; yang dinik balna kidika laih mikwas karak bānawi,

¹⁰man kulnam daukalna kidika yulni, yadulaunaman, usnit dawak yarumhlaknam yulni.

¹¹Yang maki balna kidika bayakwi kiwi, sihm masanni bayakwi kiwa kapat; kusulatik yawayang sihm dibasta kapat.

¹²Kaunah Dawan man laih, ban kaput atnin yakat king āwaman; ¡man ayangma kidika laih ban isningnakatna karang!

¹³Lawah, dawak Sayan yakat minikun talah, kat mani balna kidika uman laihwi bayakna; ¡mani kaina witing dutni kidika datang disna atnin!

¹⁴Man dima yamyang balna kidika kimapala balna yakat dalani tatalwi, ¡daukalna balna kidika yulni kulninna dalani kukulwi!

¹⁵Nisan balna bitik dawak sau kingni balna bitik Dawan ayangni nuhni yayamna karang

¹⁶witing yaklauwi Sayan kidika watwi laihwi dulauwi yamwak witing alasnina yaksihni yakat watwi kalahwarangkat;

¹⁷rumhwidana muihni minit yulwa yakat kaldakawarang mani balna yakat witing kalni dinit yakat bukwi yulwa kidika yakat dakawas-awas karang mani yakat.

¹⁸Adika dini ulwi dana karang sulani aiwarang balna kidika dinina, kaput laih Dawan yakat ayangni nuhni yayamwarang batatanhwarang muihni balna kidika.

¹⁹Dawan kidika talna sau yakat, makau kisang kaupak, mayakaupak,

²⁰silak muihni balna kakaida kidika dakana yamna atnin dawak daunin yayakna muihni balna kidika dilaihwi yakna atnin;

²¹kaput laih Sayan Jerusalén yakat kaput laih Dawan ayangni kidika yulwi dawak nuhni bik yamna karang

²²nesān balna bitik kal-ududuhwarang mani yakat ayangni nuhni yamna atnin.

²³Witing yaklauwi paraski yadakyakna tapasyakat; dawak sangkika adika parahni yamna.

²⁴Yang kalyultayang: “Yang Papangki, baisa sangkika adika papusbahkat yaduwi kiwinih.” ¡Man kurihma balna laih sarandiski!

²⁵Tatuna kaupak sau adika pāni pamni kalanaman; makau kisang kidika bik man yamnaman.

²⁶Kidika balna bitik laih bayakwi kiwarang, kaunah man laih ban awama. Kidika balna bitik witwarang, sihm asna kapat; ¡man lawa satuk yamma, dawak satuk karang, muih as asnina satuk āwa kapat!

²⁷Kauna man laih banman; man kurihma balna kidika danhkalwas ki.

²⁸Diana karang rahm dutnidis kidika, dini yamyang sulani balna yakat; man muhma tani yakat dina awama pānina.