Read Mayangna Salmos 103 Bible Online

Salmos 103 - Mayangna bible

Salmos 103

¹Devid kaupak. Yang sangkika bitik Dawan ayangni nuhni yamki; yang muihki nuhni bitik laih witing ayangni maisihnidis kidika nuhni yamna awaki.

²Yang sangkika bitik Dawan ayangni nuhni yamki; yang kau yamni yayamna kidika asbik dikitkahwas karang.

³Witing kuduh yang dutki balna bitik dawak diswa kidika dawak sikkinis balna bitik yamni yayamwa kidika,

⁴witing yaklauwi sangkika kidika sau-ū kaupak laihwi yakwa kidika, dawak witing yaklauwi dalani lani dawak minikun talnin lani kidika yabangwi,

⁵witing yaklauwi dukih yawa balna kidika bitik yawi, di tanit yayamni balna kidika karak dawak wahma yayakwi sihm yakalnuh kapat.

⁶Dawan laih la kat kidika karak la yamwi kalbaunin lani pasyakat wawauhwa balna kidika.

⁷Tani balna kidika niningnakana dawak yamna balna kidika bik Moisēs yakat dawak Israel muihni balna yakat bik.

⁸Dawan laih minikun talnin lani dawak dalani talnin lani bik duwi; dawak witing laih kulnin laihwatwi dawak dalani lani bitik palni duwi.

⁹Ma bitik yakat maibilwas ki, dawak dutni maikulwa kidika ban kaput awaski;

¹⁰mayang mamikit dunin yakat laih mayawaski madutki balna yamnamayang kidika;

¹¹witing dalani lani duwa kidika nuhni palni ki, witing yakat ayangni nuhni yayamwa balna niningna yakat, sihm sau minitkau makau kisang nuhni kapat ki.

¹²Mayang madutki balna kidika maidawi kalahkiuna, sihm makilwa kaupak makawa karak naikau kapat.

¹³Dawan laih, witing yakat ayangni nuhni yayamwa balna niningna yakat, miniknakun ditalwi, sihm papang as walanibis balna kau talwa kapat;

¹⁴kat witing amanglawi ais kau maiyamna kidika: witing yamni amanglawi sau yayahnikau maiyamna kidika.

¹⁵Muih al sangnika laih dibasta kapat ki; sihm asangpas kau dipulu kapat sahwi kalahwi:

¹⁶wing parasni wauhwakat, pini diswi, dawak muih as bik amanglawaski angkat dawadapa.

¹⁷Kaunah Dawan dalani lani duwa kidika laih nining ban kaput ki, witing yakat ayangni nuhni yayamwa muihni balna niningna yakat; la kat yamwa kidika laih sarandis ki, sulani balna kaiwa bitik yakat,

¹⁸witing pranimis kat yayamwa balna kidika witing lani balna kat yamnin kidika dinitnakahwas ki.

¹⁹Dawan witing yalahwa pāni kidika laih makau kisang yakat āna, dawak kingni lani balna kidika laih di bitik minit yakat ki.

²⁰¡Dawan ayangni nuhni yamtanauh, insal balna parasmana nuhni dutamana kidika! Manna witing yulni kat daka yamtamana kidika, witing mayulwak yamnin manah tapayu mana kidika.

²¹¡Dawan yakat ayangni nuhni yamtanauh, kalbauyang muihni balna mahni manaduwa kidika, witing dini yamtamana, kulnin lani kat!

²²¡Dawan ayangni nuhni yamtanauh, di yamna balna bitik mana kidika witing ingnikawa pāni bitikkau! ¡Dawan ayangni nuhni yamki yang sangkika bitik yakat!