Read Mayangna Salmos 104 Bible Online

Salmos 104 - Mayangna bible

Salmos 104

¹¡Yang sangkika bitik kau unbauki Dawan yakat! ¡Dawan ampus nuhnimanh, yang Papangki! Alasmana yaringni yaksihni kidika āwanaman;

²asna yaringnikau kalwadatnaman. ¡Man lawa makau kisang yakat rīnaman asna baini as!

³¡Man lawa was minit yakat pamni ānaman ūma rahni kidika, mayakaupak! Mukus balna kidika man karma dutaman; ¡wing munah man yawaman!

⁴Wing kidika laih man yulma muryang balna, dawak kuh dalhwa balna kidikalaih man dima yamyang balna.

⁵Sau adika man rahni ānaman pāni kidika kaupak itiknin-awas yulni.

⁶Kuma tuhni kidika sau minit yakatdai, sihm parakni kapat.

⁷Kaunah man lawa biltang kat mahka kiuna; man damat alwana kapat yultaman kidika dakawi mahka kiuna.

⁸Asang balna yakat kilwi dawi langni balna yakat yaklakna, kaput laih man lawa pāni kalanaman yakat kiuna,

⁹lain as kalanaman dai kidika bayaknin-awas, kidika yakat kiuna, watwi sau minit yakat ilnin awas.

¹⁰Man lawa sihtaman was burhwa kidika kaupak kalahwi asangpas balna yakat was kiri.

¹¹Kidika wasni kidik asangpas dini balna didiwi; kidika wasnikau dikih diawa kidika didiwak diswi, asangpas biriniku balna.

¹²Was balna kungyakat uhu bininina ūnina duduwi; ¡kidika yakat pan rahni yak kilwi unbabauwi!

¹³Man lawa asangpas balna yakat was sihtaman man ūma maluih kidika kaupak; makau kisang kau was kira balna kidika kaupak sau yakat was dukih kalawa kidika kalataman.

¹⁴Kalatang kat sirhsirh kidika ukuswi asangpas dini balna kidika kasna atnin, dawak muih al di dahwa kidika balna bik barakna atnin sau kidika munah witing kasnin kidika yakna atnin,

¹⁵witing kaswi parasni dunin kidika, kaput bik wain kidika, witing alasna kalyakwa kidika dawak witing muhni kidika salaini kalwi sihm disala kapat tanit.[57]

¹⁶Pan nunuhni balna kidika dukih diawa yakat duduwi, Líbano suhunni balna Dawan yaklauwi dahna kidika.

¹⁷Kidika tingni balna yakat uhu binina dibinina palni kidika ūnina yayamwi, dawak awas tingni rahni yakat yami nunuhni balna kidika yalalahwi.

¹⁸Asang maluihni balna kidika laih kuts balna pānina, dawak kipala nunuhni balna yakat tibamh balna yakmamaldi.

¹⁹Waiku kidika yamnaman ma balna kulnin yulni;[58] ma kidika witing amanghlawi mampat witing kāwi kiwarang kidika.

²⁰Pukta puksani kidika rītaman, dawak asangpas dini balna kidika kalalahwi.

²¹Layanh balna kidika ihihwi dilaihna atnin yulni; yuyulwi Papang yaklauwi witingna kasninna kidika diana atnin.

²²Kaput kaunah, ma kidika kilwa kat mahka uiwi pānina sulihni yakat kawi kalalangwi.

²³Kaput laih muih al kidika mahka warkni yakat kiwi dawak wark kalahwi pukta kat.

²⁴¡Dawan di ampus palni yamnamanh! Kidika balna bitik sins lani nuhni karak yamnaman; ¡sau adika banghna man di yamnaman balna bitik!

²⁵Yakat sakki kuma nuhni kidika, kidika yakat di yamnaman balna laihdas dini kidika mahni bangki nunuhni dawak dibinina bik;

²⁶kuma kuring balna kidika yakut bayayakwi, dawak kidika yakat waula kidika sakki, anyang dutni as yamnaman kidika witing karak yakisdinin.[59]

²⁷Kidika balna bitik man yakat tāma tatalwi witingna kasninna kidika awarni kat diana atnam.

²⁸Man lawa diatang kat, witingna yaklauwi laihwi duduwi: tingma apahtangkat, di yayamni balna kidika manah bungh dawi;

²⁹kaunah man muhma kidika maltangkat, bitik laih muihsak dadauwi; witingna sangninaka kidika dakyaktangkat dadauwi dawakat watwi sau yahamni kakalwi.

³⁰Kaunah sangnika kidika man sihtangkat, bararakwi, dawak kaput laih sau kidika kalatang wisam kalwi.

³¹¡Dawan alasnina yaksihni kidika laih ban kaput ki! ¡Dawan laih alasna kalahwi witing di yamna balna yakat talwi!

³²Sau kidika kalyukwi, witing yaklauwi talwakat; ¡asang balna kidika wayau manah kalahwi witing yaklauwi tingnikau sukwakah!

³³Yang ban awakikat sangkika dutik, yang Papangki Dawan yakat unbaunin kau unbauki.

³⁴Dawan yamni talwarang yang kulnik balna kidika, kat yang laih witing yakat manah alasna yaktayang bahang.

³⁵¡Dutni yamyang balna kidika sau akaupak disdadawang! ¡Muih dudutni balna kidika didiswang! ¡Yang sangkika bitik Papang ayangni nuhni yamki! ¡Dawan ayangni nuhni yamna karang!