Read Mayangna Salmos 105 Bible Online

Salmos 105 - Mayangna bible

Salmos 105

¹¡Dawan yakat tingkih yultanauh! ¡Witing ayangni kidika yultanauh! Tawan balna yakat yultanauh witing di yamna balna kidika.

²Witing risnipik kau unbautanauh. ¡Di nunuhni balna yamna kidika yultanauh!

³Witing ayangni holi kidika yulni manna manah kapat kaldakanauh. ¡Ismangna alasna kaldakanauh Dawan yakat waltamana muihni balna mana kidika!

⁴Dawan yakat waltanauh, dawak witing parasni yakat bik; ma bitik yakat Dawan yakat waltanauh.

⁵Ismangna kattanauh witing warkni nunuhni taldas dini yamna balna kidika, dawak witing lani balna āna kidika;

⁶manna, witing dini yamyang Abraham sulani balna; manna Jacob sulani balna, walwi yakna muihni balna.

⁷Witing kuduh Dawan, mayang Mapapangki; ¡witing laih sau bitik akat tunan kawi!

⁸Sulani balna tausin bayayakwarang bik witing pranimis kidika laih dinitkahwas karang,

⁹Abraham kau pramis yamna dai kidika, dawak kaput bik Isaac kau bik pramis yamna dai kidika

¹⁰la as kaput Jacob yakat kalana dai, pramis as ban kaput atnin kapat kalana dai Israel yakat,

¹¹aput yulwadai: “Canaán sauni maki di tingmak as kaput man dunam kidika.”

¹²Witingna kidika bulahdai karang bik, pa uk muihni balna bik kidika sauni yakat,

¹³nesān balna as kaupak uk yakat ban tilahwi uina kidika,

¹⁴Papang yaklauwi dāwasdai witingna yakat dutni diyamna atnin muih uk balna yaklauwi, dawak king balna yakat bik isningna paknadai:

¹⁵“Yang waltik yaknayang balna kidika uhuswinih dawak prakipit balna yakat dutni diyayamwinih.”

¹⁶Kalawak yuh buknadai kidika sauni yakat, dawak kasninna bitik dakyaknadai.

¹⁷Kaunah witingna tanitna yakat José sihwak kiunadai, warau kapat bakanpapamwadai kidika.

¹⁸Kalni yakat dalani kalalawadai sīnkau sitwi; ¡dawak ayan kau silak ahanadai!

¹⁹Dawan yulni balna kidika José munah kalawak laih kalahnindai, José yulna balna kidika kiwi kalahna kat.

²⁰King, witing muih mahni tunanina kawadai kidika, yaklauwi paknadai silak kaupak yakna atnin;

²¹witing ūni yakat tunan nuhni ānadai dawak kaput bik di duwa balnadai kidika bitik minit yakat,

²²sumalwi sins duyang kalyakna atnin tunan muihni balna dawak muihbararak balna yakat bik.

²³Usnītkat Israel kidika kainadai, kidika laih Jacob, dawak pa ūk muihni kapat Egipto yakat yalahnadai, Cam sauni yakat.

²⁴Papang witing tawanni kidika mahni yamna dai, dawak Egipto balna karak tanit parasni yamna dai.

²⁵Yamwak Egipto muihni balna kidika witing tawanni niningkauh yaklalaunadai dawak kaput bik Papang dini yamyang balna yakat alas diyulna atnin.

²⁶Kaput laih Papang yaklauwi witing dini yamyang Moisés kidika sihna dai, dawak Aarón kidika witing yaklauwi yakwi dūnadai kidika,

²⁷dawak witingna yaklauwi Papang sainni kidika yayamna dai, kauhmak wanilang yakat: ¡Taldas dini kidika nuhni yayamna dai Cam sauni yakat!

²⁸Papang yaklauwi puksani as sihwak puksani manah kalnadai, kaunah Egipto muihni balna witing yulni dakawas dadanadai.[60]

²⁹Was balna kidika ā manah yayamna dai, dawak wasnipa dini balna kidika bitik ihinadai,

³⁰Saunina kidika pikpik manah kalnadai, king kalangwa pāni kat pikpik manahdai.

³¹Papang yulna: dawak kalating, markisah balna kidika mukus kapat aina Egipto sauni kidika bungdanadai.

³²Waslaunin pāni yakat, ma kaupak kalawak di minik uhna kaput bik laih kuhpau bik kalawak buknadai saunina yakat.

³³Wainnina yamak dawak aninina damni panan balna kidika bik laih daukakalnadai; ¡Egipto sauni kau pan balna kidika bitik daukakalnadai!

³⁴Papang yulwak, sisin balna kalalahna; ¡mahni palnidai kulnin sip-awas palni!

³⁵¡Asangpas kau dibasta balna kidika bitik kakasna sau kau di ukusna balna bitik kakasna!

³⁶¡Daunin praisni kat daknadai, Egipto muihni walaninabis balna kidika bitik!

³⁷Usnītkat, Papang yaklauwi witing tawanni kidika yaknadai gol dawak lalah kidika mahni, kaput bik laih sulani balna pasyakat as bik dutni yamwasdai.

³⁸Egipto muihni balna kidika alasna kalalahna dai muih balna kidika alahwi uiwak talwi, kat Egipto muihni balna kidika muihsakdauna bangdai bahang papang wah sihwa kidika yulni.

³⁹Papang yaklauwi mukus sihna dai witingna minitna yakat mukna atnin dawak kuhpau bik sihna dai pukta yakat yaringni diana atnin yulni.

⁴⁰Di kasnin dini yuyulwak wang muihni sihna dai, dawak makau kisang kaupak plawar busna sihwak kaswi isningnalak dana dai.

⁴¹Kipala nunuhni kidika sahna, dawak kidika kaupak was kalahna kaput laih kauhmak wanilang pasmunah kalawak was murnadai.

⁴²Isningkatna dai pramis yamna dai kidika witing dini yamyang Abraham kau pramis yamna dai kidika.

⁴³Kaput yamwi, Papang witing tawanni kidika yakwi duwi kiunadai, alasna karūk parasni sarahwinah,

⁴⁴dawak nesān ūk balna sauninadai kidika dianadai dawak tawan uk balna wark kalalahnadai kidika bik dianadai,

⁴⁵kaput kat Dawan sumalna balna kidika dakawi respik kalana atninna. ¡Dawan ayangni nuhni yamna karang!