Read Mayangna Salmos 106 Bible Online

Salmos 106 - Mayangna bible

Salmos 106

¹¡Dawan ayangni nuhni yamna karang! Dawan yakat tingkih kalatayang, kat witing laih kulnin yamni bahang, dawak dalani lani duwa kidika laih ban kaput ki.

²¿Dawan yaklauwi minit bayakna balna kidika wais sipyah yulna atnin? ¿Wais sipyah ayangni nuhni yamna atnin, witing yakat ayangni nuhni yamnin praisni kat?

³Isninglakna ki, la kat yayamwa balna kidika laih, dawak witingna laih ninihng la kat yayamwi.

⁴Dawan ismangkattah yang akat, man tawanma yakat yamni kalyamtaman mani yakat; yakulta awama aiwa laihta yakma mani yakat,

⁵kaput laih yang talna awaki walta yakta dunaman balna alasnina kidika, kaput laih yang bik alasna dutik yang manah kapat kaldakaki man tawanma balna karak.

⁶Yangna dutni yamnayangna, papangkina balna yayamna kapat; dutni alahwanayangna, dawak bik dutni yamnayangna.

⁷Yangna papangkina balna Egipto yakat, man di nunuhni balna yamnaman kidika dauh tatalnadai; witingna dinitna kahnadai man dalani lani nuhni dutaman kidika, dawak kuma pauni kung yakat, namangkauh yaklalaunadai.

⁸Kaunah Papang yaklauwi laihwi yakna, dawak bik parasni nuhni kidika nikingkanadai dawak witing ayangni kidika nuhni yamna dai.

⁹Kuma Pauni yakat bilwak buhni manah kalnadai. Diawakat kuma tuhni munah bayayaknadai sihm kauhmak wanilang kapat.

¹⁰Kaput yamwi waihninala balna kaupak laihwi yaknadai dutni dikukulwa muihni balna parasnina kaupak.

¹¹Was yaklauwi waihninalna balna minitna yakat utuhlakna dawak as bik yaklawasdai sangnika karūk.

¹²kaput laih Papang parasni yakat kukulnadai dawak kaput laih ayangni nuhni yayamna dai.

¹³Kaput kaunah sirihni kat, Papang di yamna balnadai kidika dinitna kahnadai, dawak witingna tahahawasdai Papang warkni balna kidika.

¹⁴Kutkau kauhmak wanilang muihdis pāni yakat Papang yak traini tatalnadai witingna yaklauwi papaknadai, dukih diawa yakat yamna atnin, Papang kidika.

¹⁵Dawak Papang yaklauwi dianadai witingna yuyulwa kidika, kaput kaunah siknis dutni as sihna dai.

¹⁶ū lababanni balna yakat, Moisés niningyakat tutumnadai dawak Aarón yakat bik, Dawan dini yakwi duna dai muihni yakat.

¹⁷Kaput laih sau wakahwi Datán yakat ukna, kaput bik abiram karak aslah bangdai kidika balna bitik.

¹⁸¡Witingna bitik niningna yakat kuh dalhna! ¡Dalhwi kilwa balna kidika muih dudutni balna yakat busnadai!

¹⁹Horeb asangni yakat turuh wayani as yayamna dawan dauh wayani as gol kau yamwi, yakat minitna yuyulna:

²⁰¡Papang alasna yaksihni kidika dapamwi turuh as sirh sirh kaswa kidika wayani kat duduna!

²¹Papangnina dilaihwi yakyang kidika dinitnakahna Egipto, yakat di nunuhni yamna dai kidika,

²²Cam sauni yakat di taldas dini yamna dai kidika, dawak bik Kuma Pauni yakat bik kaput yamna dai.

²³Papang yaklauwi dismuknin yulnadai; kaunah witing yakwi duna alni Moisés yaklauwi yulwasdana dawak kaput laih Papang kulnin daukalna kidika sanlaknadai, dawak dismukwas dana.

²⁴Usnītkat sau yamni kidika dutni tatalna, kaput bik laih Papang pranimis kidika dauh kukulna;

²⁵ūnina lababanni pasyakat, Dawan kau dutni yuyulna, witing yulni balna kat dakawas dadana.

²⁶Kaput laih witing tingni dulauwi yulna: diyamwak kauhmak wanilang yakat dadauna karang,

²⁷sulanina balna yakat diyamwak dadauna karang dawak bik nesān balna pasyakat kalawak rumhwi kiuna karang.

²⁸Baal-peor warauni balna kakalnadai, dawak, Papang sangnikadis yakat sakripais yayamna dini kidika kakasnadai.

²⁹Witingna dutni yayamwa kidika Papang yakat uhusnadai, kaput laih witingna pasyakat siknis as sihwak kiuna.

³⁰Kaunah Finees yaklauwi, dutni yamna muihni yakat īnadai, kaput laih siknis kidika laihwatna.

³¹Dawak Papang yaklauwi yamni talnadai, kidika warkni yamni yamna dai kidik, ban kaput yamni dikulnadai papangnina balna kaupak walanibis balna kat.

³²Yayamna dai Papang kidika kulnin daukalna atnin Meriba wasnikung yakat, witingna yulnina Moisés yakat dutni kalahna dai,

³³kaput laih tapalhni kalalanadai dawak witing yulbauwa kidika kulwi talwas pini yulbauwadai.

³⁴Tawan balna kidika daukalmukwas danadai Dawan yaklauwi paknadai kidika daukalmukna atnin.

³⁵Nawatkauh laih, Papang kau kaltatalwas muihni balna karak aslah kalpapaknadai dawak witingna lanina balna kidika lan kakalna:

³⁶Papang yakat tatalwas Papangnina balna yakat minitna yuyulna, kidika yaklauwi dutni yakat didukiuna,

³⁷kat witingna yaklauwi walaninabis ahal dawak walaninabis yayal kidika diayanadai, kidika walaninabis balna yakat sakripais yamna atnin.

³⁸Muih dutni yamwas āni kidika ututuhna, walaninabis ahal dawak yayal ānina kidika, Canaán daniwan dauh balna yakat diayanadai. Witingna ānina kau sau kidika maisihni laihnadai,

³⁹dawak witingna maisihni kalahwi, pini biri kalduwi payayahna witingna dutni yayamwa balna bitik karak.

⁴⁰Dawan witing kulnin daukalna, tawanni niningyakat, dawak witing dini balna kidika dūwasdana;

⁴¹witing kau kaltatalwas muihni balna tingnina yakat dānadai, dawak waihninala balna yaklauwi ditataihna;

⁴²witingna waihninala balna yaklauwi ditaihwi lababanna, witingna parasnina kau sauyakat sau yakat taihlalakna.

⁴³Watmanas Papang yaklauwi laihwi yakna kaunah witing warkni balna niningkauh yaklalauna, dawak witingna alas dinina yakat āwi uina.

⁴⁴Kaput kaunah kakaidak talwi, dawak kakaida kidika dakawi,

⁴⁵witingna yakat pramis yamna dai kidika isningkatdana, dawak kulnin satuk yamna, kat witing dalani lani duwa kidika nuhni palni bahang:

⁴⁶¡yamna, ditataihwa muihni balna yaklauwi miniknakun ditalna atnin!

⁴⁷¡Mailaihta yaktah Dawan, mayang Mapapangki! ¡Nesān balna paskaupak yanayaktah man ayangma holi kidika nuhni yamna atnikna kaput laih alasna ayangma nuhni yamnikna!

⁴⁸¡Israel Papangni Dawan laih ayangni nuhni yamna karang, ban kaput atnin! ¡Bitik kaput yuyulwang: “Kaput karang”! ¡Dawan ayangni kidika nuhni yamna karang!