Read Mayangna Salmos 107 Bible Online

Salmos 107 - Mayangna bible

Salmos 107

¹Dawan yakat tingkih kalatanauh, kat witing laih kulnin yamni bahang, kat witing dalani lani duwa kidika bayakkiwas ban kaput bahang.

²Dawan yaklauwi laihwi yakna balna yakat diyultanauh waihninala balna tingnina kaupak laihwi yakna balna yakat,

³sau balna paskaupak uduhnadai kidika wadah dawak tingpal niningkaupak bik, kaput bik makilwa kaupak, ma kawa kat.

⁴Kauhmak wanilang yakat pini ta didisnadai, ta as bik yayakwasdai tawan nunuhni balna yakat uiwi yalahna atnin;

⁵yuhdadauna dawak was bik dikihni dianadai, ¡dauninna manah danadai!

⁶Kaunah witingna kakaidana pasyakat Dawan yakat yuyulna, dawak witing yaklauwi kulninna bukna kidika kaupak dilaihwi yakna.

⁷Usnītkat ta yamni yakat diyakna tawan nuhni as kat yakat uiwi yalahnin sip pāni yakat.

⁸Dawan yakat tingkih kalyultanauh, dalani lani duwa kidika yulni, ¡muih ahal ilpnina yamwa kidika yulni!

⁹Witing yaklauwi dikih kalawa muihni yakat dikih kalawa kidika dispamwi kalawi dawak yuhdauwa muihni yakat di mahni kalawi kasnin dini.

¹⁰Puksani tuhni yakat yalalahwadai, kulnin bukna kidika ditaihnadai, dawak sīnkau bik disitnadai,

¹¹Dawan niningkauh yaklalauna kidika yulni, makau sakkidik warkni balna dauh kukulna kidika yulni.

¹²Papang yaklauwi wark parasni yakat tuk-ānadai; kalnina bauwi bubukwadai kaunah, muih as bik ilp diawasdai.

¹³Kaunah witingna kakaida pasyakat Dawan yakat kalyuyulna, dawak witing yaklauwi dilaihwi yakna kulnin bukna kidika kaupak;

¹⁴puksani tuhni kaupak dilaihwi yakna dawak sīn disitna kaupak bik dilaihwi yakna.

¹⁵Dawan yakat tingkih kalatanauh, dalani lani duwa kidika yulni, ¡muih ahal ilpnina yamwa kidika yulni!

¹⁶¡Witing yaklauwi bras dūrni kidika bahwi bikisni yamna! ¡Dawak kaput bik, witing yaklauwi ayan kidika bik bahwi bikisni yamna!

¹⁷Siknis balna[61] dawak kulnin bukna balna kidika laih witingna alas dutnina yulni,

¹⁸di as bik kakaswasdai; ¡uman daunin dūrni yakat uiwi kakanadai!

¹⁹Kaunah witingna kakaida pasyakat Dawan yakat yuyulna dawak witing yaklauwi kulnin bukna kidika kaupak dilaihwi yaknadai;

²⁰witing yulni kidika sihwak yamni kakalnadai; ¡sau ūk kaupak dilaihwi yakna!

²¹Dawan yakat tingkih kalyultanauh, dalani lani duwa kidika yulni, ¡muih ahal ilpnina yamwa kidika yulni!

²²Sakripais kalatanauh tingkih lani karuk, dawak alasna yultanauh witing warkni yamna balna kidika yulni.

²³Di wauhwi bakanyang balna kidika kuma pasmunah uina. Kumanina kuring balna kau kawi uina,

²⁴dawak, kidika kuma pasyakat tatalna Dawan, di taldas yaksihni yamna balna kidika.

²⁵Dawan, witing dinit yulwakat wing parasni as kalahna bahang kaput laih, lalamwa kidika nuhni dulauna;

²⁶dawak māyakat rumh-ilna dawak kaiwi bukwa kidika laih kuma tuhni kat kawi kiunadai; ¡yamadangni kidika niningyakat kulninna dadasni kidika bitik dis dana!

²⁷Dinanahna sihm wasak didina kapat; ¡witingna sins lani duduwa kidika laih ilp as bik disdai!

²⁸Kaunah witingna kulninna kaida pasyakat Dawan yakat yuyulna, dawak witing yaklauwi dilaihwi yakna kulninna bukna kidika kaupak;

²⁹Wing parasni wauhwasakdai kidika kaupak kalawak was manah buina, dawak lalamwa balna kidika bik laihwatna.

³⁰Tatalwak was kidika lungni dawak alasna duduna, dawak Papang yaklauwi didukiuna angkat uinin kulwa yakat.

³¹Dawan yakat tingkih kalatanauh, dalani lani duwa kidika yulni, ¡dawak muih ahal ilpnina yamwa yulni kidika bik!

³²¡Tawan muihni balna aslah kaluduhtah kalyultanauh! ¡Muihbararak balna kal-ududuhwa yakat ayangni nuhni yamtanauh!

³³Dawan yaklauwi yamwi wastuna balna kidika, kauhmak wanilang dawak sau buhni yamwi;

³⁴sau yamni di minik yakwa kidika dutniyak wirlawi, muih dutnina yulni;

³⁵dawak kauhmak wanilang kidika lakun yamwi, sau buhni kidika yakat wastuna yamwi;

³⁶Yuhdadauwa muihni balna kidika, kidika pāni yakat diawi, dawak witingna yaklauwi tawan nuhni yayamwi.

³⁷Di dahwi, dawak wain yamak bik yayamwi, kaput laih di minik mahni bik yayakwi.

³⁸Witing yaklauwi blismunwi, mahni kalahnin yulni dawak kaput bik tingninalau balna kidika mahnin yulni.

³⁹Dawak dadauwarangkat bulah kalwi, tataihwa kidika yulni, dutni dawak dalani kidika yulni,

⁴⁰Papang dutni talwi muih taihyang balna yakat diyamwak kauhmak wanilang ta disyakat pini ta didiswi.

⁴¹Witing yaklauwi muih miniknakunni balna kidika dilaihwi yakwi, kulninna bukna kaupak; ¡sulanina balna kidika mahwi sihm tinglau kapat!

⁴²Muih ahal kulninna yamni kidika talwi alasna duduwi, dawak muih dudutni balna laih tininapas puputwi.

⁴³Sinsni sirihni muihni kidika adika amanglanin ki, dawak Dawan dalani lani duwa kidika bik amanglanin ki.