Read Mayangna Salmos 109 Bible Online

Salmos 109 - Mayangna bible

Salmos 109

¹Coro sumalniyang kaupak. Devid salnimo. Papang, yang mikityultayang kidika yakat man ap kalwinih,

²kat alas muihni dawak muih dudutni balna kidika, yang nikingkauh dutni yuyulwi, dawak bik alas manahki yang yulki yuyulwa kidika.

³Kulninna dutni kulwi yuyulwa kidika laih ya-awaihdakki; ¡di dis pini kaupak nikingkauh yaklalauwi!

⁴Yang dalani lani dutayang kidika yulni nikingkauh yaklalauwi; kaunah yang laih mikit yultayang.

⁵Lauwi yayawi dutnikau, yamni diyamnayang kidika yulni, dawak dalani ditalayang kidika yulni, dutni yatatalwi biriwi.

⁶Wihta dutni as āta diatah, dawak witingna alas wihninata kidika yaklauwi dutni yakat disihwarang;

⁷dawak la muhni yakat witingna kidika dutni yayamna dikukulna karang; kaput bik laih witingna nanitna daknin dai kidika yaklauwi dutni yakat ditukna karang.

⁸¡Dawak ma parahni manah witing sangka karang kaput laih muih ūk yaklauwi witing dini balna kidika[62] duduna karang!

⁹¡Walaninabis balna kidika warau kakalwang dawak yalnina balna kidika laih tingmak kakalwarang!

¹⁰¡Walaninabis balna kidika kalahwi pini awaihwi muih kau di yuyulwang! ¡Uni daukalna kidika rumhwi yayakwang[63] ahni yakat!

¹¹Lalah wayaki kalayang muihni[64] kidika yaklauwi witing dini balna kidika bitik duwi kiwang. Dawak muih taldas as kaiwi tingnikaupak witing wark kalahwi di yakna balna kidika laihwi dakyakwang.

¹²Muih as diskawang witing yakat minikun talnin kidika witing yakat dawak walanibis warau balna kidika yakat bik.

¹³Sulani balna kidika diswang, dawak ayangnisutni kidika bik diswang ban kaput atnin.

¹⁴Dawan yaklauwi witing papangni balna kau dutni yayamna dai kidika kulwang dawak nanangni dutni yamna kidika bik uswi yakwas ban kawang;

¹⁵Dawan witing dinitkahwas ban duwang kulnin yakat, dawak sau kaupak dispamwang witing yakat kulnin balna kidika.

¹⁶Minikun talnin kidika witing kulwasdai; miniknakunni balna, kulninna yamni balna dawak kulninna bukna balna yakat bik nawatkauh laih uiwi kiwi laihwi īwadai.

¹⁷La tuhnin kidika walna bahang, ¡la kaltutuhwang! Blisin kidika dukih kalawasdai, ¡bahang blisin kalawas karang!

¹⁸La tuhnin kidika kalmukwang sihm prak as kapat; dawak bani yakat kawang, dawak wakalni kat bik kawang sihm was dawak disala kapat;

¹⁹¡prak kapat kalmukwang dawak bamak sitnin kapat pamni kalsitwang!

²⁰¡Kaput Dawan yaklauwi lauwi diawang waihkila balna yakat dawak nikingkauh dutni yuyulwa balna kidika!

²¹Kaunah man, Dawan, man ayangma kidika risnipik yamtah, dawak yang akat yamni yayamtah. ¡Dawak man dalani lani dutaman kidika kau yalaihta yaktah!

²²Yang laih mikunni palni ki dawak kulnik bik bukna, yang ising kidika dalani duwi,

²³yang dauh kaltayang sihm ma sanni as kapat, ¡wing yaklauwi yaduwi kiwi sihm dibasta kusuni kapat!

²⁴Di kastasyang bahang kalki yayukwi; kaput bik ya-arakwi kasnin dini dis bahang.

²⁵¡Yang laih muih nikingkakari ninihng! ¡Yatalwi tunanina labanh ahawi sarahni yatalwi!

²⁶Dawan ilp yatah, yang Papangki; ¡dalani dutaman kidika kau yalaihta yaktah!

²⁷Amanglalawang, Dawan man laih, adika dini man tingma kau yamnaman.

²⁸Ising kultasyang dutni yayuyulwarang bik, kaunah man laih blisin yama kat. Witingna laih asalnina kalahwang, dawak man dimayamyang laih alasna duwarang.

²⁹¡Waihkila balna kidika asalni manah dibung dawang! ¡Dawak asalni kidika dimukwang, surumhnin dini kapat!

³⁰Yang tuki kau Dawan yakat tingkih lani kalaki sarandis; ¡muih mahni pasyakat ayangni nuhni yamki!

³¹Witing yaklauwi muih miniknakunni balna ilpnina yamwi la tingni yakat rurumhwa balna kidika laihwi yakwi.