Read Mayangna Salmos 116 Bible Online

Salmos 116 - Mayangna bible

Salmos 116

¹Dawan yakat dalani talayang, kat yang witing yakat yultayang kidika yadakana bahang,

²yultayang yakat tapayuwi dakana bahang. ¡Yang sangkika bitik yakat witing ayangni yulta awaki!

³Daunin kidika yawiditnadai wahnikau, sau ū yakat kaidinin kidika yalaihna yamadunin dawak dalani kidika bik yalaihnadai.

⁴Dawak kaput laih Dawan ayangni kidika yulnayang dawak kalni dinit yakat buktik yulnayang sangkika laihwi yakna atnin.

⁵Dawan laih la katki dawak minikun bik talwi; mayang Mapapangki laih dalani talnin kidika duwi.

⁶Dawan laih muih miniknakunni balna kidika maintalwi. Yang paraski dis danakat, witing yalaihwi yakna.

⁷Waradika laihtak wattik sipyang isinglak atnik kat Dawan laih yangkarak yamni bahang,

⁸kat daunin kaupak yalaihwi yakna bahang, kaput bik yalaihwi yakna kaidinin dawak buknin kaupak bik.

⁹Dawan yulni kat dakaki sau akat yalalahwa balna pasyakat.

¹⁰Yang kasak kulnin lani dutayangdai, muih yuyulwadai karang bik yang kulnin bukna kidika nuhni palnidai karang bik.

¹¹Ising abalhwak yulnayang, muih ahal bitik laih alas yulyang balna.

¹²¿Amput Dawan yakat minitlautik kalakiyah yang kau yamni yamna balna kidika?

¹³¡Dulauna awaki, laihwi yaknin sunitak kidika dawak witing ayangni kidika yulta awaki!

¹⁴Yang prakimis kat yamki Dawan yakat tawan bitik muhni yakat.

¹⁵Dawan witing dalani kalawi witing yakat dalani kaltatalwa balna kidik dadauwak talwa kidika.

¹⁶¡Dawan yang laih man dīma yamyang yang! ¡Yang laih, man dimayamyang yal kidika walanibis yang! Man lawa wah yasitwadai kidika daknaman.

¹⁷Tingkih lani kau sakripais maki, Dawan man ayangma kidika yulna awaki.

¹⁸Pramiski kat yamna awaki, Dawan yakat witing tawanni balna bitik muhni yakat,

¹⁹Dawan ūni watakni yakat, ¡Jerusalén man pasmang papusyakat! ¡Dawan ayangni nuhni yamna karang!