Read Mayangna Salmos 118 Bible Online

Salmos 118 - Mayangna bible

Salmos 118

¹Dawan yakat tingkih kalatanauh, kat witing laih yamni bahang, dawak witing dalani lani duwa kidika laih ban kaput ki.

²Israel balna kidika yuyulwang: “Dawan dalani lani duwa kidika laih ban kaput ki sarandis.”

³Sumalyang balna kidika bik yuyulwang: “Dawan dalani lani duwa kidika laih ban kaput ki sarandis.”

⁴Dawan yakat ayangni nuhni yayamwa balna kidika bik yuyulwang: “Dawan dalani lani duwa kidika laih ban kaput ki, sarandis.”

⁵Kulnik kaida kidika yulni Dawan yakat yulnayang; witing yadakawi yalaihwi yakna.

⁶Dawan yang karakki, bahang yamadutasyang. ¿Muih al kidika ais yayamnin sipyah?

⁷Dawan laih yang karakki bahang, witing ilp yawi. ¡Yang kau dutni yakukulwa muihni balna kidika laih sip-awas kakalna kat talki!

⁸Tanit yamni ki Dawan yakat kulnin kidika muih al yakat makulnik ādi dunin karak dawakat.

⁹Tanit yamni ki Dawan yakat kulnin kidika muih nunuhni balna yakat kulnin karak dawakat.

¹⁰Nisan balna bitik ya-awaihdadakna, kaunah Dawan ayangnikau minitna bayaknayang.

¹¹Ya-awaihdadakna dai yaihkit awaih kidika, kaunah Dawan ayangnikau minitna bayaknayang.

¹²Baba kapat ya-awaihdadakna, kaunah kulninna daukalna kidika pīnadai, sihm wakal paskau kuh dalhwa kapat; ¡Dawan ayangnikau minitna bayaknayang!

¹³Parasni palni yatutukna, bukna atnik, kaunah Dawan kaiwi ilp yanadai.

¹⁴Yang laih Dawan yakat unbautayang, yang paraski yawa kidika. ¡Witing laih yalaihwi yakyang!

¹⁵Muih ahal barangni balna ūnina yakat alasna sakki, minit bayakna unbaunin kidika: “¡Dawan parasni kidika laih minit bayakna!

¹⁶¡Dawan parasni laih tanit yamni ki! ¡Dawan parasni kidika laih minit bayakna!”

¹⁷¡Dautas awaki ki, kaunah sangka atnik ki Dawan yamna balna kidika yulna atnin yulni!

¹⁸Dawan parasni palni wah yana, kaunah yadawak dautasyang.

¹⁹¡Makat yulnin ūni dūrni kidika[68] apahtanauh, kidika yakat āwik Dawan yakat tingkih kalyulnik!

²⁰Adika kuduh Dawan dūrni, kidika munah kakawarang ki angdika muihni balna witing yakat barangnidai kidika.

²¹Dawan man yakat tingkih mayultayang, kat nangkitlana man bahang dawak bik man laih yalaihta yakyang man bahang.

²²Kipala as ū yamyang balna dapapamnadai kidika waradika laih kidika kipala tanit nuhni kalna.

²³Adika laih Dawan yamna, bahang tanit yamni kaldakadi.

²⁴Adika mani kuduh Dawan wark yamna kidika: ¡maisinglak bangmayang dawak witing niningyakat barangni!

²⁵Plisma Dawan, ¡mailaihta yaktah! Plisma Dawan, ¡yamtang kat yangna akat yamni manah kawang!

²⁶¡Blisin kalana ki, kidika muihni Dawan ayangnikau kaiwa kidika! Manna yakat blisin manadi Dawan ūni kaupak.

²⁷Dawan laih Papang; ¡witing yaklauwi yaringni mayawi! Alasna kidika mahka yamta panting balna kidika duyawanauh sakripais buswa kidika pāni yakat.

²⁸Tingkih matayang, dawak ayangma bik nuhni yamtayang kat man laih yang Papangki man bahang.

²⁹Dawan yakat tingkih kalatanauh, kat witing laih kulnin yamni bahang, dawak dalani lani duwa kidika laih ban kaput sarandis bahang.