Read Mayangna Salmos 119 Bible Online

Salmos 119 - Mayangna bible

Salmos 119

¹ Kulninna alasna ki dutni as bik yamwas balna kidika dawak Dawan sumalwa yakat usnit uhuiwa balna kidika.

²Kulninna alasna ki witing lani balna yakat dakawi yayamwa balna kidika dawak bik kulninna bitik witing yakat kalwawalwi,

³dutni as bik yayamwas balna kidika, dawak Dawan tani yakat uiwa balna kidik bik.

⁴Man lāma balna kidika ānaman barangni yulwa yakat yamna atnin.

⁵¡Parasni lawaki kat yamni karang man lāma balna yakat dakawi yamnin kidika!

⁶Yang asalni dakanik as bik disyang man lāma balna kidika bitik dakik yamki kat.

⁷Yang ising kidika alas as bik dis ayangma nuhni yamki man lāma balna barangni kidika kulnik yakat atik dukikat.

⁸¡Man lāma balna yakat yamkih yawi! ¡Wat as bik yarumhwi dawinih!

⁹¿Wahma kidika amput sipyah sangnika kidika maisihnidis dunin? ¡Man lāma balna yulwa kaput yalahwarangkat!

¹⁰Yang kulnik bitik man yakat mawaltayang; yadatangkat man lāma balna kaupak datik alahwinik-awaski.

¹¹Man yulma balna kidika kulnik yakat apaknayang man namangyakat dutni yamnik-awas yulni.

¹²¡Dawan man laih yamni palniman! ¡Man lāma balna kidika nikingkatah!

¹³Yang tikpas kau yulna awaki man lāma balna yulma bitik kidika.

¹⁴Man lāma balna tani yakat alasna duki, di tanit yayamni balna bitik minit yakat.

¹⁵Man lāma balna kidika kultik talna awaki dawak man tama balna yakat yamni talki.

¹⁶Man lāma balna karak alasna duki dawak man yulma balna kidika dikitkahwas karang.

¹⁷¡Man dima yamyang adika sangnika kalatah! ¡Man yulma kidika yakat dakik yamki!

¹⁸Mikpa kidika sahmutangkat talkuh man yamni palni sumaltaman kidika.

¹⁹Yang laih adika sauni kaupak awasyang man lāma balna kidika yangkaupak malwinih.

²⁰Awar bitik pasyakat kulnik tikini yataihwi man lāma balna amanglakih yawa kidika yulni.

²¹Man lauwa di biltaman muih dudutni di nuawas man lama balna kaupak naikau kalalahwa balna yakat.

²²Muih kau ustaman dawak dauh talaman kidika yang kaupak naikau yaktah, kat man lāma yakat dakanayang bahang.

²³Muih ahal pararasni balna kidika nikingkauh yaklalauwarang karang bik dutni yayamna atnin, man dima yamyang alni adika laih man lāma yakat kulna karang.

²⁴Yang, man lāma balna karak alasnayang; kidika balna yang akat la yasumamalwi.

²⁵Daunik manah danayanag; ¡yang sangkika yatah pramamis yakat!

²⁶Yang kulnik lani balna bitik namangkanayang, dawak bik man nangkitlana man. ¡Lāma balna nikingkatah!

²⁷Yatah amanglanin kidika, kaput laih man lāma balna yakat usnit uiki, kat man ditaldas dini balna yamnaman yakat kultik talkih yawi.

²⁸Yang mikwas manah sip-awas ki dalawa kidika yulni; ¡paraski yatah, man pramamis yakat!

²⁹Alas yulnin tani kidika kaupak naikau yayaktah dawak sumaltaman kidika kau yamni yayamtah.

³⁰Rahm tani kidika laihtik dunayang dawak lāma kidika dukih yawi.

³¹Dawan, man lāma yakat laihnayang; ¡asalni kidika yawinih!

³²Man lāma yakat sirihni yamtayang kat yang ising kidika alasna manah bung dataman bahang.

³³Dawan, man lāma tani balna kidika nikingkatah, usnit uitik yawakih yawi witni kat.

³⁴Amanglanin kidika yatah man sumalnaman balna kidika apaknik; ¡ising bitik kidika kaput yamkih yawi!

³⁵Man lāma tani kidika munah yaduyawah, kat kidika yakat yang alaskina kidika sakki.

³⁶Yamtangkat, ising kidika man lāma yakat walwang kaunah malnin lani yakat laih-awaski.

³⁷Yadatangkat dawan dauh balna yakat talnik-awaski; ¡sangkika yatah man tama yakat yawinik!

³⁸Man dima yamyang ākat watta kalyultah man pramis diataman kidika, man yakat ayangma nuhni yayamwa balna yakat.

³⁹Yang kaupak naikau yaktah muih uhuswak yamadutayang kidika, kat man lāma balna kidika laih yamni bahang.

⁴⁰Man lāma balna kidika dukih yawi; ¡sangkika yatah, kat man laih la kat yamtaman bahang!

⁴¹Dawan nikingkatah, man dalani lani dutaman kidika dawak laihta yaktaman kidika bik, man pramis yamna man kaput.

⁴²Kaput laih nangnitlanik sip-awaki yauswarang muihni yakat, kat man lāma yakat kultayang bahang.

⁴³Yang tikpas kaupak yul rahm kidika dakyakwinih, kat man lāma yakat yang tahanik kidika atik dutayang bahang.

⁴⁴¡Man sumalnaman balna kidika laihtik yamnik kultayang, ban kaput atnin sarandis!

⁴⁵Kaput laih yalahna awaki yalaihwi yakna yakat, kat man lāma yakat usnit uinayang bahang.

⁴⁶Man lāma ānaman balna kidika yulna awaki, king balna muhnina yakat dawak asalni bik dakas awaki.

⁴⁷Kat man lāma balna kidika dalani talayang kidika yakat alasna dutayang.

⁴⁸Dalani talayang dawak bik dukih yawi[69] man lāma balna kidika, man lāma balna yakat uba kultayang.

⁴⁹Ismangkattah, man dima yamyang akat yul as kalyulnamandai kidika: Kidika yakat yayamtang kat tahanik kidika atik dunayangdai.

⁵⁰Adika kuduh kulnik bukwak walaki āwa kidika: man pramamis kidika kau sangkika yataman.

⁵¹Muih tapdadas balna kidika ma bitik yakat yauhuswi, kaunah man yasumalnaman kidika kaupak datik alahwasyang.

⁵²Man lāma balna kidika isingkatwi, ma bayakna balnadai yakat, kidika yakat Dawan, walaki ānin kidika yaktayang.

⁵³Muih dudutni balna, man sumalnaman balna rumhwi dadawa kidika kulnik parasni daukalwi.

⁵⁴Man lāma balna kidika laih yang unbautayang adika sauni kaupak awasyang tringsaryang kidika.

⁵⁵Dawan, pukta yakat man kidika isingkatwi; ¡man sumalnaman balna kidika laihtik yamnik kultayang!

⁵⁶Adika kuduh yang yamnik dini kidika: man lāma yakat dakik yamnik.

⁵⁷Dawan, man manahki madutayang kidika; man yulma balna kidika laihtik yamnik pramis yamnayang.

⁵⁸Yang kulnik bitik dukih mawa yakat yamkih yawi; man pramamis yakat, yamni yayamtah.

⁵⁹Yang lapaktayang balna yakat kultik talnayang, dawak wattik man lāma balna yakat yamnayang.

⁶⁰Yang sirihni yamnayang, nai wattasyangdai man lāma balna yakat yamnin kidika.

⁶¹Muih dudutni balna kidika yalaihnin dini manah yamwi ya-awaihdadakna, kaunah man sumalnaman balna kidika laih dikitkahwas ki.

⁶²Pukpapus yakat lawik man yakat tingkih mayultayang man lāma balna barangni kidika yulni.

⁶³Yang laih, man kau ayangma nuhni yayamwa balna karak kaltalyang yamniyang. Dawak man lāma kat yayamwa balna kidika bik.

⁶⁴Dawan, man dalani lani dutaman kidika sau yakat bunghki; ¡lāma balna nikingkatah!

⁶⁵Dawan, man dima yamyang akat yamni kalyamnaman, man pramamis yakat.

⁶⁶Nikingkatah la yamni dunik kidika, dawak di amanglanik bik, kat man lāma yakat kultayang bahang.

⁶⁷Sau yakat buktasyang tanitkauh, dutni manas yamnayang, kaunah waralaih man lama kat dakik yamtayang.

⁶⁸Man laih kulnam yamni ki bahang yamni kidika yamtaman; ¡man lāma balna kidika nikingkatah!

⁶⁹Tapdadas balna kidika dauh alaski yuyulwi, kaunah yang laih man lāma kidika kulnik bitik yamtayang.

⁷⁰Witingna laih sinsnina daukalna kaunah yang laih man sumaltaman yakat alasna dutayang.

⁷¹Yamni yayamnaman sau yakat buknayang kidika, bahang kaput laih man lāma lan alahwanayang.

⁷²Yang nikingyakat laih kau tanit nuhni ki man sumaltaman balna kidika, lalah dawak gol tausin balna karak dawakat.

⁷³Man lawa yayamnaman yang adika; ¡sins sirihni kidika yatah man lāma lan alahwinik!

⁷⁴Man ayangma nuhni yayamwa balna kidika yatalwi alasna duduwarang, kat yang tahanik kidika laih man yulma yakat atik dunayang bahang.

⁷⁵Dawan, yang amanglatayang man lāma balna laih barangni ki dawak yamtang kulnik sau yakat bukwa kidika laih aitani ki.

⁷⁶¡Man dalani lani dutaman kidika walaki awangh, yangkau pramis yamnaman kaput!

⁷⁷Minikun talnin lani dutaman kidika nikingkatah, dawak yatangkat sangka awakuh, kat man sumaltaman kidika karak yang alasnayang.

⁷⁸Tapdadas balna kidika asalnina kalahwang; pinikaupak yang kau dutni yayamwa kidika; yang man lāma balna yakat kultik talkih yawi.

⁷⁹Man ayangma nuhni yayamwa muihni balna karak kaluduhkih yawi, man lāma amanglalawa muihni balna yakat.

⁸⁰Yang ising kidika man lāma yakat barangni atnin, yang asalki kalahnin dini dis atnin.

⁸¹Dukih yawak tahatayang man yalaihta yakna atnam; ¡yang tahatayang kidika man yulma yakat atik dunayang!

⁸²Man pramamis yakat tahana manah mikpa kidika buhlawi, dawak yultayang: “¿Mampat aiwa walaki āmayah?”

⁸³Yang muih barak di sip-awas kalnayang dawak di balna bik dikitkahwi kaunah, man lāma balna laih dikitkahwas ki.

⁸⁴¿Yang baisa ampus tahanikyah? ¿Yauiwi aiwa muihni balna kidika mampatkat lanina yammayah?

⁸⁵Tapdadas muihni balna man lāma kat usnit uhuiwas muihni balna kidika, yang takipas yakat pa kukurhna yalaihna atnin.

⁸⁶¡Ilp yatah, pini kaupak yauiwi aiwi! ¡Man lāma balna laih bitik rahm manah ki!

⁸⁷Sau minit akaupk yadispamna dadana, kaunah man lāma balna kidika laih pini datasyangdai.

⁸⁸Sangkika yatah, man dalani lanidutaman kaput, dawak man lāma balna yultaman yakat yamki.

⁸⁹Dawan, man yulma balna kidika laih bayakkiwas nining ban kaput ki; ¡makau kisang yakat sakki!

⁹⁰Man barangniman kidika laih bayakkiwas banki; man lawa sau adika yamnaman, bahang pānikatki.

⁹¹Dibitik kidika pānikat kat āwidana witing lani balna ānayakat, kat di bitik kidika man dima yayamwi.

⁹²Man sumaltaman kidika alasna yawaskatlaih, kulnin bukna kidika yaklauwi yaipamwitdai.

⁹³Man lāma balna kidika wat-as bik dikitkahwas karang, kat kidika kau man sangkika yanaman.

⁹⁴¡Yalaihta yaktah, yang laih man dimayang bahang man lāma kat usnit uinayang!

⁹⁵Muih dudutni balna kidika laih yang akat ya inin manah wawalwi, kaunah man lāma yakat tapayutayang.

⁹⁶Yang talnayang di bitik kidika laih mani witni duwi, kaunah man lāma balna kidaka laih sarandiski.

⁹⁷¡Man sumaltaman kidika ampus dalani talayang! ¡Mapiriskaupak masankat kidika yakat kultik talayang!

⁹⁸Man lāma balna kidika laih yang diki ban kaput atnin; sins duyang yayamna, waihkila balna kapat tanit.

⁹⁹Yang akat yasumamalwa muihni balna karak yangkauh tanit amanglatayang kat man lāma balna yakat uba kultayang bahang.

¹⁰⁰Muihbararak balna karak dawak yang kauh tanit amanglatayang kat man lāma kat dakayang bahang.

¹⁰¹Ta dudutni balna bitikkau naikau datik alahwanayang man lāma kat yamnik yulni.

¹⁰²Man lāma balna kaupak datik alahwasyang kat man kuduh yasumaltaman kidika.

¹⁰³Man pramamis balna kidika laih tanit damni ki dikitsuru yakat amak damni yang tikpas yakat kawa karak dawakat.

¹⁰⁴Man lāma balna kaupak yang di amanglanin kidika yaknayang kidika bahang kulnin alas balna kidika yakat dutni talayang.

¹⁰⁵Man yulma balna kidika laih yaringni as ki yang kalki yakat dawak bik yaringni as ki yang taki yakat.

¹⁰⁶Pramis as yamnayang kidika kaput yamki ki; ¡man lāma bararangni balna kidika laihtik yamna awaki!

¹⁰⁷Dawan, uba kulnik bukna kaldakayang; ¡sangkika yatah, man pramis yamnaman kaput!

¹⁰⁸Dawan dutah, minitdis matayang kidika tikpas kaupak; dawak man lāma balna kidika nikingkatah.

¹⁰⁹Yang laih yamadangni daunikmanah kidika ban kaputyang.

¹¹⁰Muih dudutni balna kidika yalaihnin dini ahawi kaunah man lāma kaupak datik alahwasyang.

¹¹¹Yang diki ban bayakkiwas kidika laih man lāma balna, kat kidika yaklauwi yang ising alasna yulwa bahang.

¹¹²Yang isingkau kulnayang man lāma kidika laihtik yamna atnik, ban yamtik witnikat duyawinik.

¹¹³Muih kau dutni yamyang balna kidika dutni ditalayang kaunah man sumaltaman balna kidika laih dalani talayang.

¹¹⁴Man kuduh yang takitdaktaman kidika; man yulma yakat yang tahanik kidika ānayang sakki.

¹¹⁵¡Yang kaupak naikau alahwanauh, muih dudutni balna yang Papangki lani balna yakat yamkih yawi!

¹¹⁶Paraski yatah, man pramamis kaput, bahang yang laih sangka awaki; ¡yang tahanik kidika dauh yamwinih!

¹¹⁷Ilp yatah, kaput laih yalaihwi yakna awaki; kaput laih man lāma balna kidika ban yamta awaki.

¹¹⁸Man dauh dikultaman, lāma balna naikau lalawa kidika, kat witingna kulninna lani kidika laih sisn lani as bik diski.

¹¹⁹Sau muihni dudutni balna kidika laih man namang yakat di bubuh kapat ki; kidika bahang yang laih man lāma balna kidika dalani talayang.

¹²⁰Yang muihki adika yamaduwi yukwi man muhma tani yakat; ¡man lāma balna kidika respik nuhni kultayang!

¹²¹La kat kidika yang ban yamtayang dataski; yataihyang muihni balna tingnina yakat yarumhwi dawinih.

¹²²Yang yamni atnik kidika man tingma yakat dutah, tapdadas balna kidika dutni yayamnin awaski;

¹²³Man yalaihta yaknam kidika yulni tahana manah mikpa buhlawi tahatayang yalaihta yakna atnam, man pramamis yakat.[70]

¹²⁴Man dalani lani dutaman kidika kaput man dima yamyang akat kalyamtah; ¡man lāma balna kidika nikingkatah!

¹²⁵Yang laih man dima yamyang yang. Amanglanin kidika yatah, kat man lāma balna kidika amanglakih yawi.

¹²⁶Dawan, uman mani kaiwi kana di as yamna atnam, kat man sumalnaman balna kidika kat dakawi yamwas dadana.

¹²⁷Kidika bahang man lāma balna kidika dalani talayang gol yamni kapat tanit.

¹²⁸Kidika bahang man lāma yakut yawayang[71] dawak kulnin lani dutni balna kidika bitik dutni talayang.

¹²⁹Man lāma balna kidika laih di yamni ki; kidika bahang yulwa yakat dakik yamtayang.

¹³⁰Man yulma lāih yakta yultaman kidika laih yaringni mayawi, muih di amanglawas balna yakat niningnakawi.

¹³¹Dukih palni yawak tikpas kidika wakahtayang, kat man lāma balna kidika dukih yawa bahang.

¹³²Yang akat yatalah, mikun yadakah, man kau dalani matatalwa balna yakat yamtaman kaput.

¹³³Yatang kat man yulma yultaman kaput lik-awakuh; datang kat dutni kidika yaklauwi mikit bayaknin awaski.

¹³⁴Muih dudutni balna kaupak yalaihta yaktah, kat man lāma kat yamkih yawa bahang.

¹³⁵Man dima yamyang muihni akat mamakpa yamnikau kaltalah, dawak lāma balna kidika nikingkatah.

¹³⁶Mikwas kidika was murwa kapat kalahwi mikpa kaupak, kat man sumaltaman yakat kukulwas kidika yulni.

¹³⁷Dawan, man laih la kat man; dawak lāma balna bik barangni ki.

¹³⁸Man lāma balna bitik laih barangni ki dawak bik rahmki.

¹³⁹Man yulma kidik uba minit antayang yulni muihki adika parahkau kalwi kat yang waihkila balna laih man yulma kidika dinitnakahna.

¹⁴⁰Man pramamis kidika laih laihwi talnin pararasni bayakna kidika bahang, man dima yamyang adika dalani talwi.

¹⁴¹Limahni yang, dawak didauh yakulna ki, kaunah man lāma balna kidika dikitkahwas ki.

¹⁴²Man lāma kidika laih ban barangni ki, dawak sumaltaman kidika laih rahm ki.

¹⁴³Yang talnayang kulnik kaidana dawak bik yataihnadai, kaunah man lāma balna laih alasna yayaknadai.

¹⁴⁴Man lāma balna kidika laih ban la kat ki; ¡amanglanin kidika yatah kaput laih yang sip-awaki sangka atnik!

¹⁴⁵Dawan, mayultayang kulnik bitik palni: ¡nangkitlatah, man lāma kat yamkih yawi!

¹⁴⁶Man yakat mayultayang ilp yatah kaput laih man lāma kat yamna atnik.

¹⁴⁷Baisa payahlawas kat lawik man yakat ilp yultayang; yang tahanik kidika laih man pramamis yakat anayang.

¹⁴⁸Baisa puklakwas kat, mikpa kidika mahka tahawi talwi man pramamis yakat kulwi talna atnin.

¹⁴⁹Yang yultayang kidika dakah Dawan, dalani lani dutaman kidika kau; yang sangkika yatah, man la kat yamtaman kidika kau.

¹⁵⁰Yauiwi aiwa muihni dudutni balna kidika uman yaihkit yakat ki, kaunah man sumaltaman kidika laih witingna naikau ki.

¹⁵¹Dawan, man laih yaihnit yakat man, dawak man sumaltaman balna bitik kidika laih rahmki.

¹⁵²Man lāma balna amanglanayang kidika laih naiki, man lawa ānaman ban kaput atnin.

¹⁵³Yang kulnik bukna kidika talah, dawak yalaihta yaktah, kat man sumalnaman balna kidika dikitkahwas ki.

¹⁵⁴Yang yulki kidika nakitdaktah, dawak yalaihta yaktah; ¡sangkika yatah, man pramamis yakat!

¹⁵⁵Man ilp dianam kidika laih naikau ki, muih dudutni balna niningna yakat, kat man lāma yakat uiwas bahang.

¹⁵⁶Dawan, minikun talnin lani kidika nuhni palni dutaman; sangkika yatah, man lāmakat yamtaman kidika munah.

¹⁵⁷Waihkila balna dawak yataihyang balna kidika laih mahni palni ki, kaunah man lāma kaupak datik alahwas yang.

¹⁵⁸Muih dudutni balna kidika yang sip wauhtasyang, man lāma kat dakawi yayamwas balna kidika.

¹⁵⁹Dawan talah, ampus man lāma yakat dalani talayang kidika; ¡man dalani lani dutaman yakat sangkika yatah!

¹⁶⁰Man yulma balna kidika yakat di rahm kidika sakki; man lāma balna kidika la katki dawak bik bayakkiwas ban kaput ki.

¹⁶¹Muih ahal pararasni balna kidika yauiwi aiwi pinikaupak, kaunah yang kulnik laih man yulma balna yakat nuhni kulwi.

¹⁶²Yang alasnayang pramamis kidika karak, sihm muih as gol yakwa kapat.

¹⁶³Alas kidika dutni talayang, yang sip wauhtasyang; kaunah man sumalnaman balna kidika laih dalani talayang.

¹⁶⁴Awar bitik yakat ayangma nuhni yamtayang man lāma barangni kidika yulni.

¹⁶⁵Man sumalnaman balna yakat dalani tatalwa kidika isninglak lani kidika duwi, dawak di as bik kalyamwak bukwas ki.

¹⁶⁶Dawan, tahatayang man yalaihta yakma, kat man sumalnaman balna kidika kaput yamtayang.

¹⁶⁷Man lāma kat dakik yamtayang, dawak bik kulnik bitik dalani talayang.

¹⁶⁸Man lāma balna yakat yang laih dakik yamtayang; ¡yang lapaktayang balna bitik man talamanh!

¹⁶⁹Yang sarahtayang kidika man muhma kat kiwang Dawan; ¡yang di amanglanik kidika yatah, man yulma yultaman kaput!

¹⁷⁰Yang mikit yultayang kidika man muhma kat kiwang Papang; ¡man pramis yamna man kaput yalaihta yaktah!

¹⁷¹Man ayangma nuhni yamnin kidika yang tikpas kaupak kalahwang, kat man lāma balna kidika nikingkanaman bahang.

¹⁷²Yang kungkimak balna unbaunin as unbauna karang man pramamis yakat kat man lāma balna kidika laih lakat bahang.

¹⁷³Man tingma kidika ridi kawang yang akat ilp yanin, kat man lāma yakauh yamni talnayang bahang.

¹⁷⁴Dawan, ¡dukih yawi man yalaihta yaknam! ¡Man sumaltaman bala kidika karak yang alasna yang!

¹⁷⁵Ayangma nuhni yamnin yulni sangka awakih yawi; dawak man lāma kat kidika ilp yawang.

¹⁷⁶Sīp as kapat ta disnayang; ¡aiwa yawaltah, kat man lāma balna kidika dikitkahwas bahang!