Read Mayangna Salmos 132 Bible Online

Salmos 132 - Mayangna bible

Salmos 132

¹Kilwi kiwi unbauna laniwana. Dawan, Dawan Jacob parasni nuhni Devid yakat ismangkattah, dawak kulnin bukna kidika yakat bik; ismangkattah pramis parasni as mayamna kidika:

³“Ūpasyakat āwas awaki dawak bik alangwik wingkita puhtas awaki,

⁴mikpa bik sipiktas awaki minit as bik amas awaki,

⁵yang baisa ū yaktas yang kat Dawan ūni, Jacob parasni kidika.”

⁶Efrata kat pramis kuringni yulni yuyulwak dakanayangna. Jaar sauni pasyakat yawanayang.

⁷¡Dawan pāni holi yakat mawarang! ¡Dawak witing kalni atakwa yakat limbabahdanang!

⁸Lauwah Dawan, man kuringma parasni nuhni kidika karak dawak aiwah man urupdaman asangni yakat.

⁹Man sumalmayang balna kidika laihwi yaknin kidika praknina duduwang; dawak man yakat barangni balna kidika alasna duwi sararahwang.

¹⁰Man dimayamyang Devid yakat kultaman yulni, man king as yaknaman kidika dapamwinih.

¹¹Dawan yaklauwi Devid yakat pramis parasni as yamna dai, pranimis kidika dauh yamwas karang ki:

¹²“Man yalahtaman pāni yakat sulama as kat āna awaki. Man walamabis balna kidika pramiski kat yamwaran kat, dawak sumalki kidika kaput yamwarang kat, witingna walaninabis balna bik man yalahtaman pāni kidika ban yalalahwa karang.”

¹³¡Dawan yaklauwi Sayan asangni kidika yakwi duna! ¡Winting walwi yakwi duna yakat yalahna atnin yulni!

¹⁴“Kidika asangni yakat kuduh ban sak-atnik kultayang kidika; kidika yakat yalahkiki, kat kaput dukih yawa bahang.

¹⁵Kasnamna balna kidika kasak blismunki dawak manna muihmana miniknakunni balna kidika dibahngna karang yuh diawa kidika.

¹⁶Sumalmanayang balna kidika laihwi yaknin prakni āna awaki dawak yamting sararahwarang barangni muihni balna kidika.

¹⁷Kidika yakat kalating kat Devid parasni kidika watwi duwarang. Awas as redi yamnayang king as yaktik dunayang kidika dini.

¹⁸Waihnila balna kidika asalni manah dibanghna karang, kauna witing yakat laih yaringni manah kalmuklakna awaki.”