Read Mayangna Salmos 139 Bible Online

Salmos 139 - Mayangna bible

Salmos 139

¹Coro sumalniyang kaupak. Devid salnimo. Dawan, man yalaihta talnaman, bahang amangkilataman;

²yang di yamtayang balna kidika bitik amanglataman; naikaupak man talaman yang yul kultayang kidika.

³Yang angkat yawayang balna kidika talaman, ¡dawak bik amanglataman di yamtayang balna bitik!

⁴Baisa yulni kidika yang tuki yakat bik disyang, kaunah Dawan, man laih uman amanglataman.

⁵Man piriki bitik kau ya-awaihdaksaman; man tingma kidika yang mikit yakat laknaman.

⁶Sins lani nuhni yamni kidika sip laihtasyang; ¡mulaihni palni ki bahang yang sip amanglatasyang!

⁷¿Yang angkat naikau yawakiyah, man piritma kaupak? ¿Angkat yang irakiyah man muhna kaupak?

⁸Makau kisang malaihni yakat ilwakikat man yakat sakman; sau tuhni pasyakat āwik yawaki kat. kidika yakat bik man sakman;

⁹Lawik ma kilma yakat yawaki kat kidika awaskat kuma kung ma kawa nining yakat yawik yalahki kat,

¹⁰kidika yakat bik man tingma kidika yalaihwarang[77] ¡Man tingmapal kidika ya uluhwas karangki!

¹¹Puksani yakat maldakuhtik kulki bik, kidika awasbik yaihkitkau yaringni kidika puksani yamkuh tiki bik,

¹²puksani kidika yaklauwi sip man kaupak yamalwas karang, puksani kidika yaringni madah kapat karang. ¡Puksani dawak awas kidika bik man namang yakat kapapatki!

¹³Man kuduh yang muihki bitik man yamnaman kidika; man lawa nanangki bānipas yakat yayamnaman.

¹⁴Man ayangma nuhni yamtayang kat talasyang dini kidika talayang bahang, dawak man di yamnaman balna kidika laih taldas dini bahang. ¡Kidika laih yamni amanglatayang!

¹⁵Yang muihki nuhni kalna kidika man muhma yakat naini-awasdai yang adika malni yakat kalnayang bik, sau tuhni tanit pasyakat kalnayang bik.

¹⁶Man mamakpa kidika yatalna, yang muihki kidika kalwak; kidika bitik man wauhmataya yakat ulna, yang sangkika mani balna kidika bitik ānaman kidika as bik disdai karang bik.

¹⁷Papang, man kulnam balna kidika tuhni palniki yang niking yakat; ¡kidika bitik laih saran diski!

¹⁸Yang kidika balna yulkih yawarang bik, kauhmak minik ūs manah yulki; dawak yultik danh yamki karangkat,[78] baisa man karak sak awaki.

¹⁹Papang, muih dudutni balna sangninaka kidika dakyaktah dawak muih īyang balna kidika yang kaupak naikau yaktah,

²⁰dawak man yakat dutni yuyulwa balna kidika dauh laih man namang yakat yaklalauwi.

²¹Dawan, ¿man kau dutni makukulwa balna yakat dutni kultasyangkatpah dawak dauh dutasyang katpah man namangkauh yaklalauwa balna yakat?

²²¡Yang piritki bitik dutni dikultayang! ¡Yang waihkila balna dikultayang!

²³Papang, yang ising kidika laihta talah; yalaihta talah dawak yang kulnik balna kidika amanglatah;

²⁴talah yang ta dutni yakat yawayangpa, dawak ban atnin tani[79] yakat yuduyawah.