Read Mayangna Salmos 140 Bible Online

Salmos 140 - Mayangna bible

Salmos 140

¹Coro sumalniyang kaupak. Devid salnimo. Dawan, muih dudutni balna kaupak yalaihta yaktah; kulninna dudutni balna kaupak bik nakitdaktah,

²dutni yamnin kukulwa balna kidika dawak awar bitik yakat kalbaunin yayamwi.

³Tūni kidika subangni ki, sihm bil kapat; yulnina balna kidika laih sihm bil poinisin kapat ki.

⁴Dawan, muih dudutni balna parasnina kaupak nakitdaktah kulninna dudutni balna kaupak nakitdaktah, yalakpamnin warkni yayamwa kidika kaupak bik.

⁵Witingna manah kapat kaldakakawa balna kidika yaklauwi yalaihnin dini dawak kaput bik wah kapat bik lalakna yalaihna atnin; ta as yakat yalaihnin dini kidika ahana.

⁶Dawan yakat kalyulnayang: “Man laih yang Papangkiman; ¡dakah, yang sarahtik yultayang kidika!

⁷Dawan, Dawan, yalaihta yakyang parasniman kidika, man lawa tunaki kidika nanitdaktaman kalbaunin pasyakat.”

⁸Dawan, muih dutni dukih kalawa kidika kalawinih; datangkat witingna warknina kidika tanit yakat kiunin-awaski. Ya-awaihdak balna kidika tunanina dulalauwi; ¡witingna tunanina yakat bukwang dutni yuyulwa balna kidika!

¹⁰Witing minitna yakat uhwang kuh tuturni dalhwa kidika; pāni kudungni yakat amumukwang, watwi kalahnin-awas yakat.

¹¹Tūni dutni kidika sau akat baisa lik-atnin-awaski; muih kulnin dutni yakat uiwi kiwi īpanwang dutni yaklauwi.

¹²Yang amanglatayang Dawan laih la kat yamwi muih minikunni yakat dawak kulnin bukna kidika yakat rahmni kidika nanitdakwi.

¹³Muih ahal kulninna yamni balna kidika ayangma nuhni yayamwarang; ¡Muih ahal kasak kulwakulwa kidika man yaihmatyak bankarang!