Read Mayangna Salmos 144 Bible Online

Salmos 144 - Mayangna bible

Salmos 144

¹Devid kaupak. ¡Dawan yakat ayangni nuhni yamna karang, yang nakitdakyang yakat! Witing kuduh yaklauwi yasumalwi, ridi yayamwi war yakat kalbauna atnik kidika;

²witing laih yang karak kaltalyang yamni ki, dawak maldinik pāni, kaput bik nakitdakyang, yang maldinik tanit makau kidika, dawak yalaihwi yakyang, witing kidika laih nakitdakyang as ki; witing kuduh yaklauwi tawan balna kidika yang paraski dinit yakat āwi.

³Dawan, ¿muih al kidika waisyah, man witing yakat kulna atnam? ¿Muih kidika aisyah, man witing yakat dalani talaman kidika?

⁴Muih al kidika laih wingta as puhwa kapatki; dawak sangnika kidika masanni bayakkiwa kapat ki.

⁵Dawan, makau kisang dūrni ririna kidika karhlata lakwah; dawak asang yakat suktang wayau kalahwang;

⁶man sīmabang kidika rumhta, alwana lapwa kidika, dawak diatang man waihmala balna kidika kikirang pini.

⁷Mayakaupak man tingma kidika yutah, dawak kuma nuhni kidika kaupak yalaihta yaktah: kaput bik laih muih talasyang balna kidika kaupak bik yalaihta yaktah,

⁸alas yuyulwa muihni balna kaupak, bahang witingna kidika tingninapal kidika dulauwi pramis yayamwa kidika alas manah ki.

⁹Dawan, unbaunin wisam as unbauki man yakat: dawak paswi yakisdinin dini karak unbauki man yakat.

¹⁰Man lawa king balna yakat minit bayaknin diataman kidika; man dima yamyang Devid yakat laihta yaknaman dai kidika, daunin isniparah kaupak yalaihta yaktah: dawak muih taldas muihni balna parasnina kaupak yalaihta yaktah, alas yuyulwa muihni balna kidika kaupak bik dawak tingninapal dulauwi alas yuyulwa balna kidika kaupak.

¹²Mayang mawalakibis balna kidika bararakwi watak kau dipulu dahna balna kapat; mawalakibis yayal balna kidika laih ū rahni dulauna kapat ki makat yulnin ūni kau āna balna kidika.

¹³Di minik puda ūni balna kidika laih bunghki, kasnin dini bitik bangki. Dawak matingkilau balna kidika mahwi milianh kau, tausin bik mahwi masauki yakat.

¹⁴Matukiruh yayal balna kidika banikau dadana, dawak binina duduwa kidika mani kaiwi kawas kat duduwas ki. Dawak mayang matakipas balna yakat muih as bik sarahwi yulwas ki dutni kaiwak.

¹⁵¡Angdika tawanni kat adika bitik duwa laih alasna ki! ¡Kidika tawanni laih alasna ki witing daniwan laih Dawan kidika!