Read Mayangna Salmos 17 Bible Online

Salmos 17 - Mayangna bible

Salmos 17

¹Devid minit yulna. Dawan, yang yulki barangni kidika daka, dawak yultayang kidika daka, mikit yultayang kidika yadakah, kat alas yulyang tinpas kaupak kalahwas bahang.

²¡Man munah kaiwang laki yamnin kidika, kat man laih amanglataman bahang la barangni kidika!

³Man kulnik yakat awanaman; pukta yakat aiwanaman tahata yatalnam, man yalaihta talnaman kuhpau karak, dawak dutni as bik yaktasman. Yulnin dini-awas kidika yultasyang,

⁴muih ūk balna yayamwa kapat; kalbilwi kalbaunin tani kaupak naikau alahwanayang, man lāma balna anaman yakat.

⁵Man tama yakat barangni yawanayang; kidika balna kaupak datik alahwasyang.

⁶Papang, yang yulki balna kidika man yakat mayultayang, kat man lawa birita nangkitlataman bahang; yadakah, yulki balna kidika dakah.

⁷Lāih yakta nikingkatah dalani lani dutaman kidika, man lawa waihnila balna kaupak laihta yaktaman, nanitna daknin wawalwa kidika, man parasma nuhni yakat.

⁸Main yatala, muih yal bin as kau mamakpa talaman kapat, man lawama dinitkau sanni yakat yahata nakitdakta

⁹muih dudutni balna mababauwa kidika kaupak, ¡waihla dudutni balna ya-awaihwi dadakwa kidika kaupak!

¹⁰Witingna manah kapat kaldakakawi, dawak yulnina bik kaput yuyulwi;

¹¹lapaktayang kidika yaihkit yakat yauiwi aiwi, tahahawi sans as kalahwak sau yakat yalahna atnin.

¹²Layan kapatki, layan anyang kapat tahahawi laihna atnin tipisninamak kau.

¹³Lawah, Dawan, ¡witingna niningna yakat lawah! ¡Diyamtangkat limbabahwang! Ismaparah kau, waihla balna kaupak yalaihta yakta;

¹⁴man parasma kau, Dawan, witingna kaupak yalaihta yakta; ¡adika sauni kaupak ruhmta yakta, kat sau adika laih witingna dinina tingmak bahang! Datangkat sau dini yayamni kidika duyang kakalwang,[8] walaninabis balna kidika di kaswi banina tutwang, dawak walanibis walaninabis balna kau bik kaput karang.

¹⁵Kauna yang laih, rahm kidika, isinglak dawarang mamuhki biri kaltaldarang kat, ¡sahmuhting kat man muhma tani yakat awaki kat!