Read Mayangna Salmos 18 Bible Online

Salmos 18 - Mayangna bible

Salmos 18

¹Coro sumalniyang kaupak. Devid Papang warauni witing Saúl dawak waihnila ūk balna tingnina kaupak kal-laihwi yakna kidika yulni kulwi ulna. Dawan, man laih yang paraski man; ¡yang dalani matalayang!

²Man laih nakitdakyang man, dawak yakmaldinik pāni, yalaihwi yakyang, yang Papangki, kipala as yang nakitdakwa kidika, parasni kau yalaihwi yakwa kidika, yang maldinik pāni tanit makau kidika.

³Dawan man yakat ayangma nuhni yamnin kidika dīma palni ki, yang mayultingkat waihkila balna kaupak yalaihta yaktaman.

⁴Daunin kidika wahni yakat yawiditna dai, daunin niningyakat yamadunayang.

⁵Daunin kidika witing wahni kau yapirina; ¡daunin dini dutni kidika pasyakat yang dai!

⁶Aidayang pasyakat, Dawan kau kalyulnayang dai, yang Papangki yakat ilp yulnayang, bahang witing ūni kaupak yadakana, ¡yang sarahtayang kidika witing tapani kat kiwi kana!

⁷Kaput laih sau parasni isihna dai: asang balna kidika dinitkau balna kidika bitik isihna dai; Dawan kulnin daukalna kidika kau dulauwi isihna.

⁸Nangnitak kaupak wayau manah kalahwi, dawak tinpas kaupak kuhpau manah kalahwi; ¡tinpas kaupak kuhusmak dahlna manah kalahwi!

⁹Makau kisang dūrni rina asnina kidika karh'uipamwakat, kaiwi bukna. ¡Witing kalni dinit yakat mukus manahdai!

¹⁰Di lawani duwa as minitkau kilwi yaklauwi kiuna wing minit munah.

¹¹Yakmaldinin pāni as kapat duna, dawak ū labanni as kapat bik, mukus sani balna kal-awaihdakna kidika, dawak mukusni balna was manah duwadai kidika bik.

¹²Yaringni lapna dai witing kaiwa kidika kaupak; mukus kidika kaupak di minik balna kapat uhwadai, dawak kuh tuturni talna bik.

¹³Dawan makau sakkidika, witing dinit alwana kapat kidika yulwak dakana dai makau kisang kidika kaupak; di minik balna kapat dawak kuh tuturni dahlna bik.

¹⁴Sinibang ruhmna dawak alniwana bik lapna dawak waihkila balna yakat diyamwak pini kikirana.

¹⁵Kuma tuhni kidika bitik lāih yakna dai; sau nuhni adika rahni balna kidika bitik muih miniknapa yakat lāih kalahna dai, Dawan parasni anwi yulwakat, wingnita parasni puhna kidika yulni bik.

¹⁶Papang tingni kidika yuna dai mayakaupak, dawak witing tingni kau yalaihwi yayakna kuma nuhni paskaupak.

¹⁷Yalaihwi yakna waihla pararasni balna kidika kaupak, bahang kidika balna laih dutni yakukulwadai, dawak witingna kidika takit pararasni dai.

¹⁸Nikingkauh yaklalauna yang mikunni kalnayang kat, kaunah Dawan yang akat ilp yana:

¹⁹pri yayakna; ¡dawak yalaihwi yakna dalani yatalwa dai bahang!

²⁰Dawan yaklauwi mikit kidika yana, yang kulnik maisihnidis kidika yulni kaput minit dunikdai bahang,

²¹kat yang laih Dawan tani munah yawanayang bahang; ¡yang laih wat as bik Papangki yakat amangnilatasyang yultasyang dai!

²²Yang warmani kat ban lāma balna kidika dutayang; ¡lāma balna kidika wat as bik kultas awasyang dai!

²³Witing muhni tani yakat lapaknayang dutni as bik dis; dutni kidika kaupak naikau alahwanayang.

²⁴Dawan yaklauwi minitlauwi yana witing muhni tani yakat maisihni disyang bahang.

²⁵Dawan, man laih barangniman, angdika muihni man yakat barangni kidika yakarak, muhni kat yakwi kalyulwas kidika Papang bik yaklauwi muhni kat yakwi kalyulwas ki,

²⁶kulnin pasyakaupak di rahm manah yulwa kidika, biri Papang yaklauwi bik kaput kalyamwi, dawak angdika muihni tanit kau walwi talwa muihni kidika Papang bik kulnin sirihni ki.

²⁷Kulninna praut-awas kidika laihta yaktaman, kauna witingna manah kapat kaldakakawa kidika balna yakat laih sau yakat laktaman.

²⁸Kaunah Dawan man laih yaringni yataman; yang Papangki, puksani yakat yang kidika yaringni yatah.

²⁹Man ilpma yatangkat kidika kau waihkila niningyakat lawaki, dawak witing tawanni daklana kidika minit munah bayakki.

³⁰Papang tani kidika laih barangni ki; Dawan pranimis kidika rahm kalkulna atnin ki; ¡Papang yaklauwi nanitnadakwi muih yapak witing yakat kulninna awi duwa balna kidika!

³¹¿Papang kidika kaupak, wais kidika Dawan yah? ¿Angdika papang ūk sipyah matakitdaknin?

³²Papang yaklauwi paraski yawi, dawak witing yaklauwi yang yamtayang balna kidika yamni manah yamwi,

³³witing yaklauwi kalki lapaktayang balna kidika sirihni yamwi, sihm sana kapat, witing yaklauwi yāwakat mayakau yalahdayang,

³⁴witing yaklauwi yasumalwi kalbauna atnin, dawak bik witing yaklauwi paraski yawi las brasni kidika isnik.

³⁵Man nakitdakta yalaihta yaktaman, dawak tingmapal kau yalaihta dulautaman; minikun talnin dutaman kidika kau yatang kat diki balna barakwi.

³⁶Yang taki kidika parasni-awas yamnaman, dawak yang kalki kidika atakting kahrwasdai.

³⁷Waihkila balna kidika uitik yawik laihnayang, dawak alas nawattik aiwanayang imuknayang usnitkat.

³⁸Tustik dakdak muknayang. Kaput bahang sip yaklauwas dadana. ¡Kalki dinityakat bubukna!

³⁹Man lawa paraski yanaman dai kalbaunin yakat; diyamtangkat kulninna anyang balna kidika yang muhki tani yakat abubukna,

⁴⁰dawak yang muhki tani yakat waihkila balna kidika kikirana. Kaput laih sipdai īna atnik dutni yakukulwa balna kidika.

⁴¹Ilp yuyulwadai, kauna muih as bik ilp diayawasdai; dawak Dawan yakat kalyuyulna kauna nangnitnalawas dai.

⁴²¡Yang dismuknayang, sihm sau yahamni wing dulauwi dukiwa kapat! ¡Kalki kau ataknayang sihm tapas kau sau atakda kapat!

⁴³Yalaihta yaknaman tawan as dutni kidika tingni kaupak, dawak yayamna man nisan balna taninatuna atnin, dawak muih talasyang balna dai kidika diki yayamwi.

⁴⁴Yadakakawi, bahang mahka laih yultayang yakat yayamwi; sau ūk muihni balna kidika kulnik alasna yayamwi,

⁴⁵sau ūk muihni balna kidika muihsak dadauwi, yakmamalda pāni kaupak diyukwīnah kalalahwi.

⁴⁶¡Dawan laih sangka ban kaput karang! ¡Yamni ban karang yang nakitdakyang kidika! ¡Dawak nuhni kaldulauna karang Papangki yalaih'yakyang kidika!

⁴⁷Witing laih Papang as ki bahang dutni yayamna balna yakat biriwi diyamna, dawak tawan balna kidika taihwi lakna kalki dinit yakat.

⁴⁸Yang waihkila kulninna daukalna kidika kaupak yalaihwi yakwi, muih dudutni yang nikingkauh yaklalauna dai kidika. ¡Dawan man, muih ahal anyang balna kaupak yalaihta yaktaman!

⁴⁹Kidika bahang nisan balna pasyakat ayangma nuhni dulautayang, dawak man ayangma kau unbautayang.

⁵⁰Minit bayaknin kidika nuhni kalataman, man lawa king as anaman kidika yakat; dawak nining ban kaput yamni kalyamtaman Devid yakat dawak sulani balna yakat bik.