Read Mayangna Salmos 19 Bible Online

Salmos 19 - Mayangna bible

Salmos 19

¹Coro sumalniyang kaupak, Devid salnimo. Makau kisang kidika laih Papang alasnina kidika yulwa sakki, witing yamna kidika maiyulwi makau kisang kidika.

²Ma balna kaiwi bayakwasak kidika biri kalkukulwi; pukta kidika yaklauwi yamwak dinit yulwa kidika kiri.

³Yul as bik yulwak dakawas dawak dinit bik yulwak dakawas bik,

⁴kidika yulni laih sau bitik yakat kiwi, dawak sau bangni bitik yakat bik, ma pāni duwa yakat.

⁵Dawak ma kidika alasna kilwi kalahwi tani munah bayakwi kiwi, sihm muih as kirayang muihni kapat, kaput bik marid al witing yalni karak payayahwa pāni kaupak kalahwi kiwa kapat.

⁶Ma kidika kalahwi makau kisang kidika sutni nakas kaupak dawak ban awaihwi kiwi sutni nakas kat, witing daihni kidika kaupak di as bik sip kiras ki.

⁷Dawan sumalwa kidika laih barangni ki, kat sangnika wisam as kalawa bahang. Dawan lani balna kidika laih rahm kasak ki, kat sins duyang kalyamwi muih al kulnin limahni kidika yakat.

⁸Dawan lani balna kidika laih maisihni as bik diski, kat muih kulnin yakat alasna duaiwa bahang. Dawan lani balna kidika laih pasyakat di ūk karak bahawas ki, bahang muih minikpa yakat yaringni manah banghilna ki.

⁹Dawan yakat yamadunin kidika laih maisihni diski, bahang ban kaput sakki. Dawan lani balna kidika laih rahm ki, bahang kidika balna bitik laih la kat ki,

¹⁰¡bahang minit tanit nuhni ki gol karak dawakat! ¡Kaput bik laih tanit damni ki amak karak dawakat!

¹¹Kaput bahang, man dimayamyang yakat isningpaknin bik as ki, bahang yamni karang yulni dakana atnin.

¹²¿Angdika muihni kat witing alas dutni balna yamwa kidika amanglawih? ¡Dawan dutki balna malnikau kidika datang diswang!

¹³Dima yamyang kulnin kau witing manah kapat kaldakawa kidika yakpamta kalata; datangkat kidika kulnin lani kidika mikit bayaknin awaski. Kaput laih dutni as bik yamwas alni as awaki; dawak dutni nuhni kidika kaupak naikau awaki.[9]

¹⁴Man mamakpa yakat talna kat karang, yang yulki dawak kulnik balna bik, Dawan, yakmaldinik pāni, dawak yalaih'yakyang.