Read Mayangna Salmos 22 Bible Online

Salmos 22 - Mayangna bible

Salmos 22

¹Coro balna sumalniyang kaupak, payahlawarah sanani yal tiunni kapat. Devid salnimo. Papangki, Papangki, ¿ais yamta yaruhmta danaman? ¿Ais yamta aiwa yalaihta yaktasman? ¿Aidayang kidika amput dawak yadakasmahn?

²Papangki, pukta madah mayultayang, kauna nangkitlatasman; ¡yang laih sip urupdasyang!

³Kauna man laih maisihni disman; man king āwaman, bahang Israel ayangma nuhni yamwi.

⁴Yangna papangkina balna kidika man yakat kulninna awi duduna, kidika bahang man lawa dilaihta yaknaman;

⁵man yakat ilp yuyulwak, dilaihta yaknaman dai; man yakat makukulna bahang alas diyultasman dai.

⁶Kauna yang laih muih al awasyang, makis as yang; ¡yang laih muih balna nikingkarayang as yang!

⁷Yatatalwak mahka sarahni yayuyulwi, wayaki yamwi tunanina lababahnwi

⁸dawak yuyulwi: “Adika muihni Dawan yakat rahm kulwadai; kaput bahang Dawan yaklauwi laihwi yakwang. Witing yakat dalani kaltalwa bahang kal-laihwi yakwang. Kat uba dalani kaltalwa bahang laihwi yakwang.”

⁹Bahang kaput ki: man yayamtangkat nanangki bānipas kaupak batahn danayang; yatangkat witing pasni yakat urupdanayang.

¹⁰Yang batahntasyang tanitkauh, man mainyatalnaman; yang nanangki bānipas kaupak, yang Papangki kidika laih man.

¹¹Yang akaupak yadawi kalahwinih, kat kulnik kaidinin manah bahang, yang muih ūk disyang ilp yanin.

¹²Yang waihkila balna kidika turuh ahalmuk kapat ya-awaih dadakna, sihm Basán tuniruh ahalmuk anyang balna kapat;

¹³layan anyang balna kapat mamahwi, tininapas wakahwi yang niking yakat awi aiwi.

¹⁴Yang laih sihm was bang'ilwi utuhwa kapatyang; wakalki kalrikwa balna bitik laihwas dana. Yang putki minik kidika laih sihm bal as kapat arwi muihki pasyakat.

¹⁵Tikpas[10] laih buhlana sihm ubasta kapat; tuki laih iskiparah yakat birna ki. ¡Sau yahamni daunin pāni yakat yataih-ānaman!

¹⁶Yang adika sul kapat, muih dudutni balna kidika ya-awaihdadakna, tingki balna babahna[11] dawak kalki balna bitik.

¹⁷¡Wakalki balna kidika kultik talnik sipki! Waihkila balna miniknapa kidika yang kaupak lalawaski;

¹⁸yang askina balna kidika sahyakwi duduna, dawak kidika minit yakat suerte ruhmwi tatalna.

¹⁹Kaunah, Dawan man laih yang paraski man, ¡yang kaupak naikau kalahwinih!, ¡sirihni aiwa ilpki awah!

²⁰Isparah kau daunik kidika kaupak yalaihta yakta, yadatangkat sunilu balna kidika ya-īnin awaski,

²¹yalaihta yakta, kidika layanni balna tininapas kaupak, ¡kidika tuniruh tamni balna kaupak nakit dakta!

²²Man yulma kidika yulna awaki wirahki balna yakat, dawak aslah alahwayang yakat ayangma nuhni yamna awaki.

²³Manna, Dawan kau risnipik kalatamana kidika, ¡ayangni nuhni yamtanauh! ¡Jacob sulani balna manna bitik ayangni nuhni yamtanauh! ¡Israel sulani balna mana bitik ayangni nuhni yamtanauh!

²⁴Kat witing laih dauh kulwas ki, kaput bik dawak bayakwas ki, muih minikunni wauhwa kidika, kidika balna niningnayakat witing yakmaldas ki. ¡Witing dakawi ilp kalyuyulwak!

²⁵Tawanma muih mahni muhnitna yakat barangni man kidika nuhni yamki; man yakat nuhni mayayamwa muihni balna muhnina yakat prakimis balna kidika yamna awaki.

²⁶Kastanauh, manna manatataihwa muihni balnamana kidika, kasta ismangnalak datanauh; Dawan ayangni nuhni yamtanauh, manna witing yakat kalwaltamana kidika, bahang kaput laih sangmanaka naini kawang.

²⁷Nisan balna, dawak sau muih balna bitik, kaput bik sau bangni kau balnamana bitik yakat: Dawan kidika ismangna katwang, dawak witing yakat aiwanauh; ¡witing muhni tani yakat limbabahtanauh!

²⁸Kat Dawan kidika laih king bahang, kat witing kidika laih muih balna taninatuna nuhni bahang.

²⁹Abukta witing yakat manah kulnamna bitik kultanauh, di manas duyang balna mana bitik, watta, bitik sau yakat yawanama kidika, kat manna alasmana laih sangmanaka diski.

³⁰Yang sulaki balna laih kulninna bitik nuhni kukulwi Dawan yakat, dawak witing yulni kidika sangninaka bitik yakat yuyulna karang;

³¹usnit dawak batanh dadana kidika laih, witingna yakat diyuyulna karang la kat yamwa balna kidika, dawak warkni balna bik.[12]