Read Mayangna Salmos 25 Bible Online

Salmos 25 - Mayangna bible

Salmos 25

¹Devid kaupak. Dawan, yang man yakat mikityultayang;

²yang Papangki, man yakat kultayang: yadatangkat asalni yakat āwik yawinik-awaski. ¡Dawak yang waihkila balna kidika nikingkarinin-awaski!

³¡Dawak wat-as bik yakasaldinin awaski man yakat kukulwa balna kidika! ¡Asalnina kalahna karang pini kaupak nikingkauh yaklalauwa balna niningna yakat!

⁴Dawan, tama balna kidika manikingkatah; dawak tama balna munah yaduyawah;

⁵takituna āwa yaduyawah, man rahmma yakat, kat man laih yang Papangkiman dawak yalaihwi yakyang man. ¡Man yakat makultayang awar balna bitik yakat!

⁶Dawan, ismangkatta, dalani lani dutaman dawak minikun talnin lani dutaman kidika bik bahang kidika nining mani nikingkataman kidika,

⁷kaunah yang dutki balna kidika laih kulnam yakat kulwinih kaput bik yang wahma yang dai mani yakat dutni balna yamnayang dai kidika bik. Dawan, yang adika ismangkatta, man dalani lani nuhni dutaman dawak minikun talnin lani dutaman kidika kau.

⁸Dawan laih yamniki dawak bik la kat yamwi; muih dutni yamyang balna kulninna bik witing yaklauwi barangni āwi

⁹dawak tāni munah duwi kiwi muih kulninna limamahni balna kidika; ¡dawak lakat kidika disumalwi!

¹⁰Witing laih ninihng dalani lani kau dawak di rahm kidika karak yamwi, witing pranimis kat yayamwa balna yakat, dawak lāni balna yakat yayamwa balna yakat bik.

¹¹Dawan, yang dutki balna kidika laih nuhni palni ki; bahang datang diswang, kaput laih man rismapik kidika nuhni palni karang.

¹²Angdika alni, Dawan yakat ayangni nuhni yamwa kidika, witing yaklauwi angdika tāni munah kiunin kidika niningkawi;

¹³di yamni manah kal-awaihdak kalduwi dawak sulani balna kau bik kidika sauni yakat panina diawi.

¹⁴Dawan yaklauwi witing kaltalyang yamni yakwi, angdika muihni balna witing yakat ayangni nuhni yayamwa balna yakat, dawak pranimis yamna balna kidika bik niningnakawi

¹⁵Nining mikpa kidika Dawan yakat talayang, kat witing laih di yamadangni balna bitik yang kaupak naikau lawa bahang.

¹⁶Dawan yang akat yatalah, dawak mikun yatalah, kat yang laih alasyang bahang kulnik kidika sau yakat bukna.

¹⁷Kulnik kidika baisa sau yakat bukwi; yang aidayang balna kidika kaupak yalaihta yaktah.

¹⁸Kulnik bukna balna kidika dawak warkki balna kidika talah, dawak dutki balna kidika datang diswang,

¹⁹talah yang waihkila balna kidika ampus dutayang yang niking yakat kulninna dutni daunin kat kukulwi.

²⁰¡Main yatalah, dawak yalaihta yaktah! ¡Datangkat asalni yakat yataih-ānin-awaski, kat man yakat nakitdaknin kidika waltayang bahang!

²¹Yang kulnik barangniyang kidika dawak yang dutni yamtasyang kidika yaklauwi nakitdakwang, kat man yakat kulnik kidika ātik dunayang bahang.

²²¡Yang Papangki, Israel kidika laihta yakta witing kulnin kaida balna bitik kidika kaupak!