Read Mayangna Salmos 27 Bible Online

Salmos 27 - Mayangna bible

Salmos 27

¹Devid kaupak. Dawan laih yaringni yawi dawak bik yalaihwi yakwi, ¿wais kidika yang yamanidunik sipyah? Dawan laih yang sangkika nanitdakwi, ¿bahang wais yakat yamanidukiyah?

²Muih dudutni yang waihkila balna kidika, kalpakwi yang nikingkauh yaklalauwi ya īna atnin; kauna witingna kuduh kalnina dakwak bubukwa kidika.

³Kalbauyang muihni balna mahni ya-awaihdadakwarang bik, yang ising kidika yamaduwas karang; nikingkauh yakalbaunin ridi kalalahwarang bik, kauna yang laih isinglak sak-awaki.

⁴Di aslah Dawan kaupak yanin kalyulnayang, di aslah dukihyawi; Dawan ūni yakat sak-atnik ma bitik kau yang sangkika bitik yakat, witing uni yakat ayangni nuhni yamnin dawak di yamni balna yamna kidika talna atnin bik.

⁵Ma dutni balna kidika kiwi kawakat Dawan witing ūni kaupak suruhmnin dini as yawarang; dawak witing dinitkau sanni yakat yahawi nakitdakwarang. ¡Kipala nuhni minit yakat yailwi yalaihwi yakna karang!

⁶Kaput laih yang tunaki dulaunik sip-awaki yang waihkila balna minitna yakat; dawak kaput laih sip awaki makatyulnin uni yakat sakripais busna atnin, alasna dutik sarahki dawak unbaunin yayamni unbauki Dawan yakat.

⁷Man yakat mayultayang Dawan, yadakah. Yang akat mikun yatalah, ¡dawak nangkitlatah!

⁸Yang ising yaklauwi yayulwi: “Dawan yakat waltah.” Bahang yang, Dawan, mawaltayang.

⁹¡Yang kaupak yakmaldinih! ¡Kulnam daukalna kau yaruhmwi dawinih! ¡Yang ilp dunik kidika laih man yakat manahki! Yang alas yadawinih, dawak bik yaruhmwi dawinih, kat man laih yang Papangkiman, dawak bik yalaihta yakyang man.

¹⁰Yang papangki dawak nanangki yaruhmwi dawarang bik, Dawan, man laih yang tikini kidika trukma.

¹¹Dawan, man tama kidika nikingkatah; ta yamni munah yaduta yawah yang waihkila balna yulni;

¹²witingna kulninna lani kat tingnina yakat yahawinih, kat witingna kidika yang nikingkauh yaklalauna bahang alas yulni karak, dawak kalbaunin lani karak bik.

¹³Kaunah yang laih yamni amanglatayang, Dawan witing minikun talnin lani duwa kidika talna awaki adika sangnika naini akat.[13]

¹⁴¡Dawan yakat kulnam āta dutah! ¡Kulnam dadasni dutah, sangka dauwinih! ¡Agha, Dawan yakat kulnam āta dutah!