Read Mayangna Salmos 31 Bible Online

Salmos 31 - Mayangna bible

Salmos 31

¹Coro sumalniyang kaupak, Devid salnimo. Dawan, man yakat nakitdaknin kidika waltayang; ¡bahang wat as bik yadatang dauh kalnin awaski! ¡Man yalaihta yakta, kat man laih la kat man bahang!

²Man rismapik kau yadakah; ¡sirihni aiwa yalaihta yaktah! Amanglatayang, man laih yang kikipala nakitdakyang as man, ¡amanglatayang, man laih yakmaldinin ūni parasni as man dawak yalaihwi yaknin!

³¡Man kuduh yang kikipala man dawak yakmaldinik uni parasni as man! ¡Takituna āwa yaduyawah dawak nakitdaktah; dawak man ayangma risnipik kidika yamtah!

⁴¡Yalaihnin dini ririna kidika kaupak yalaihta yaktah, kat man laih nakitdakyang man bahang!

⁵Man tingma yakat yang spirit ki kidika ātayang; ¡yalaihta yaktah, Dawan, man laih rahm Papangniman kidika!

⁶Dutni talayang dawan dauh yakat minitnayuyulwa kidika. Yang kulnik kidika Dawan yakat ānayang.

⁷Man dalani lani dutaman kidika alasna yawi. Yang kulnik bukna kidika man talaman, kaput kulnik bukna kidika man amanglataman;

⁸waihla tingni yakat bik yahatasman dai; ¡yatangkat pa yamni yakat kalki ataknayang!

⁹Dawan, yang akat mikun yatalah, kat yamadangni yakat sakyang bahang. Dalani dutayang kidika yaklauwi mikpa balna kidika parasni dis yamwi, muihki ¡dawak yang muihki bitik!

¹⁰¡Dalani dawak kaidinin balna kidika yaklauwi yang sangkika kurihni balna kidika dahn yamwi! Kulnik bukna[16] kidika yaklauwi paraski dahn yamwi; ¡muihki nuhni kidika parasni dis kalwi!

¹¹Waihkila balna karininna kidika laih yang, di as sarahni yuyulwa kidika[17] yaihkit kau muih balna kidika amangkilalawa balna kidika laih tatalwi muihsakdaunin dini kidika. ¡Ta pasyakat muih yapak yatatalwa kidika laih yang kaupak kikiri!

¹²Yang adika dinitnakahna bitik palni, sihm daunayang kapat. Yang laih sihm was punin dini as bahwi uhdana kapatyang.

¹³Sip dakayang, tapaki āwi yuyulwa kidika: “Yamadangni lani kidika pa bitik yakat ki.” Muih al aslah kapat, yang nikingkauh warknina balna kidika yayamwi; ¡witingna warknina kidika ridi yamwi dadawi ya-īna atnin yulni!

¹⁴Kaunah, yang laih Dawan, man yakat kulnik ātik dutayang; yang yulnayang: “¡Man laih yang Papangkiman!”

¹⁵Yang sangkika kidika man tingma yakat ki; ¡yang waihkila balna kaupak yalaihta yakta yauiwi aiwa kidika!

¹⁶Man dima yamyang adika minikun kaltalah, dalani lani dutaman kidika kau yalaihta yakta.

¹⁷Man yakat yultayang Dawan; ¡asalni yakat yataih-āwinih! ¡Asalni yakat taih-ātah muih dudutni balna kidika; sau-ū ap kidika yakat taih-ātah!

¹⁸Alas yuyulwa balna tininapas kidika ap dawang, sarahni dauh talwi yuyulwa balna kidika, muih al kulnin yamni yakat uhuswa kidika.

¹⁹¡Ampat nuhni dutamahn minikun talnin lani kidika, man yakat ayangma nuhni yayamwa balna niningna yakat! Kipala dahlwa minit nuhni kapat apakta dutaman muih balna miniknapa tani yakat, dawak sahyakta diataman angdika muihni balna man yakat kulninna āwi duduwa balna yakat.

²⁰Man aiwa nakitdaktaman kidika karak muih ahal dudutni balna warknina kidika kaupak laihta yaktaman; man ūma pasyakat āta nanitnadaktaman waihninala balna yaklauwi uhuswa kidika kaupak.

²¹Dawan ayangni kidika nuhni yamna karang dalani lani nuhni duwa kidika karak di nunuhni manas yamna yang yulki kulnik kaidana mani balna yakat.[18]

²²Kulnik abahlwa kidika karak yang kulnayang man muhma tani kaupak yayakpamna man; kauna man yakat ilp mayultingkat, yang sarahtayang kidika dakanaman daih.

²³Dawan yakat dalani talnauh, witing yakat barangnimana kidika. Dawan yaklauwi maintalwi alas yuyulwas balna kidika, kaunah witingna manah kapat kaldakakawa balna kidika laih minitna nuhni diawi minitkau lakwi.

²⁴Manna kulnamna kidika kalatanang yaklauwang yamaduwaski Dawan yakat kultamana bitik kidika.