Read Mayangna Salmos 32 Bible Online

Salmos 32 - Mayangna bible

Salmos 32

¹Devid sumalwa kidika. Isninglak ki, angdika alni witing dutni balna bitik dawak disna kidika.

²Isninglak ki angdika alni di, dutni yamnin kulnin yakat kulwas kidika dawak kidika muihni yakat Dawan yaklauwi bik dutni balna asbik yakwi kalyulwas kidika.

³Yang dutni yamnayang kidika lāih yaktik yultasyang kat, yang muihki adika parahkau bukkiuna ma bitik yakat aidayang kidika yulni,

⁴pukta, madah man tingma kidika mikit yakat tikini dai. Sihm, kurih mani daihni kat dipulu kusulawa kapat, kapat kaldakayang dai.

⁵Kaunah laihwattas lāih yaktik yulnayang, yang dutni yamnayang balna kidika; man yakat dutki balna kidika yulnik kulnayang, dawak man Dawan dutki balna kidika datang disna.

⁶Kidika bahang dalani wauhnin pasyakat[19] man kau barangni balna kidika, man ayangma yakwi yuyulna karang dawak was parasni murwa balna kidika bang-ilwarang bik, witingna yakat laih di-ilwas karang.

⁷Man laih yakmaldinik pāni man: yamadangni balna kidika kaupak nakitdaktaman, parasni sarahta yalaihta yaktaman.

⁸Dawan aput yulwi: “Yang mikpa kidika man yakat matalayang. Yang lawik masumalki, la balna kidika maki, dawak angkut yawanam tani kidika namangkaki.

⁹Muyul dawak aras kapat bik atnah di amanglawas kidika witing parasni kira kidika laihwatnin ki, tinpas kau di āna kidika dawak wahni karak, kaunah di ūk karak laih man yaihmat yakat kaiwas ki.”

¹⁰Muih dudutni balna kidika dalani mahni wawauhwarang, kauna Dawan dalani lani duwa kidika laih kalsuruhmwi witing yakat kukulwa balna kidika.

¹¹Alasna awanauh Dawan yakat, muih ahal kulnamna yayamni mana kidika; ¡Alasna duta sarahtanauh!