Read Mayangna Salmos 33 Bible Online

Salmos 33 - Mayangna bible

Salmos 33

¹Dawan yakat yultanauh ahal kulnamna yayamni balna; muih yayamni kungninamak balna kidika nuhni yamni palni witing ayangni dulalauwi.

²Dawan yakat tingkih kalyultanauh, paswi yakisdinin dini kau, kaput bik unbaunin balna kidika unbautanauh paswi yakisdinin dini kau,

³unbaunin wisam as unbautanauh, ¡kauna yamni palni isdanauh unbautamana yakat!

⁴Dawan yulni kidika laih rahm palni ki; man warkma balna kidika yaklauwi lāih yakwi witing yakat barangniman kidika.

⁵Dawan laih dalani talwi dutnidis barangni kidika; ¡witing dalani lani duwa kidika sau bitik yakat bahngna ki!

⁶Makau kisang yakat di bangkidika bitik Dawan witing yulni kau yamna dawak witing tinpas wingnita puhwa kidika kau bik yamna.

⁷Witing uduhwi puwi duwi kuma wasni tuhni palni kidika.

⁸Dawan yakat nuhni yamtanauh sau muihni balna manna bitik; ¡sau muihni balna bitik manna ayangni nuhni kalyamtanauh!

⁹Kat witing yulbauna, dawak di balna kidika bitik kalna; dawak witing yaklauwi pakwak, kaput kalna.

¹⁰Dawan yaklauwi yamwakat dauh kalna ki Papang yakat kukulwas tawanni balna warknina kidika,

¹¹kaunah Dawan warkni balna laih nining ban kaput ki.

¹²Kidika tawanni isninglak ki witing Papangni laih Dawan kidika ki, tawan as witing dini yakwi duna kidika.

¹³Dawan laih makau kisang kaupak talwi muih ahal bitik yakat;

¹⁴kidika witing pāni yalahwa kidika kaupak talwasakki sau muihni balna yalalahwa kidika;

¹⁵witing yaklauwi kulninna kidika yamna dawak witing kuduh tahawi ditalwa kidika di yayamwa balna bitik yakat.

¹⁶King as bik kalbaunin muihni balna mahni duwa kidika munah kal-laihwi yakna awaski, dawak kulninna parasni duwa balna kidika, parasnina nuhni duduwa kidika yaklauwi dilaihwi yakwaski;

¹⁷aras balna kidika laih sip muih as bik laihwi yayakwas ki; parasnina nuhni duduwi, kauna sip laihwi yayakwas ki.

¹⁸Kaunah Dawan laih nining ban kaput maintalwi angdika muihni balna witing yakat ayangni nuhni yayamwa balna kidika dawak, witing dalani lani duwa yakat rahm kukulwa balna kidika bik,

¹⁹daunin kaupak dilaihwi yakna atnin dawak sangninaka diana atnin yuhlakwa mani yakat.

²⁰Mayang Dawan yakat makulnik adi dudi; ¡witing ilp mayawi, dawak matakitdakwi!

²¹Mayang maising kidika Dawan yakat alasna duduwi; witing ayangni maisihnidis yakat rahm kuldi.

²²¡Man dalani lani dutaman kidika Dawan, yangna karak kawang, man yakat tahata yangna kaput!