Read Mayangna Salmos 34 Bible Online

Salmos 34 - Mayangna bible

Salmos 34

¹Devid kaupak. Abimelec muhni kaupak kalahwi kirana manikat, witing yakat iswa kapat yamwadai kidika. Dawan yakat ayangni nuhni yamtah awar bitik yakat; yang kungkimak balna kidika ban witing ayangni nuhni yamna karang.

²Yang laih, yangmanah kapat kaldakayang Dawan kaupak; ¡dakanauh dawak alasna dutanauh, muih ahal kulnamna minikunni dutamana kidika!

³Kalpakdi ayangni nuhni yamdanang madikit aslah Dawan ayangni nuhni kidika.

⁴Dawan yakat waltik yawanayang, dawak nangkitlana, dawak yamadutayang balna bitik kidika yalaihwi yakna

⁵Dawan yakat tatalwa muihni balna kidika witingna alasna yaringni duduwi dawak watas bik alas diyulwas karang.

⁶Adika minikunni sarahna dai, dawak Dawan kaldakana dawak witing kulnin kaida balna kidika bitik kaupak kal-laihwi yakna dai.

⁷Dawan innisal kidika yaklauwi laihwi yakwi dawak tanitdakwi Dawan yakat ayangni nuhni yayamwa balna yakat.

⁸Manna laihta talnauh, Dawan laih yamni palni ki. ¡Isninglak ki, angdika alni, witing yakat kalkulwa kidika!

⁹Dawan ayangni nuhni yamtanauh, witing dinimana kidika, kat witingna niningna yakat di dis atnin lani kidika diskarang witing yakat ayangni nuhni yayamwa kidika.

¹⁰Di duyang balna[20] miniknakunni kakalwi, dawak yuh wawauhwi, kaunah Dawan yakat wawalwa balna kidika laih witingna niningna yakat di yamni kidika dis-awas karang.

¹¹Walakibis balna aiwa yadakanauh: Dawan yakat ayangni nuhni yamnin kidika manasumalki.

¹²¿Ma mahni sangka awakih mawih? ¿Sangmaka kidika alasna dukih mawih?

¹³Kaput kat tuma kidika laihwatta dutni yultaman kidika dawak watas bik alas yulwinih.

¹⁴Dutni kidika kaupak naikau alahwa dawak di yamni kidika yamtah; kulnin aslah lani kidika waltah dawak usnit uita yawah.

¹⁵Dawan yaklauwi muih ahal kulninna yamni balna kidika maintalwi dawak yuyulwa kidika yakat dakawi.

¹⁶Dawan laih muih dudutni balna niningnakauh ki, sau akat witingna kulninna balna kidika bitik disyamna atnin.

¹⁷Dawan laih muih al kulnin yamni yulwa kidika yakat dakawi, dawak laihwi yakwi kulnin kaida balna bitik kidika kaupak.

¹⁸Dawan laih yaihnit yakat sakki, witingna kulninna bukna balna kidika laihwi yakna atnin dawak tahawi talnin dis kalna balna yakat.

¹⁹Muih al kulnin yamni balna kidika di dutni manas karak kalpakwi bayakwi, kaunah Dawan yaklauwi kidika balna bitik kaupak laihwi yakwi.

²⁰Witing yaklauwi wakalni balna bitik kidika tanitdakwi; wakalni balna as bik bahwas karang.

²¹Muih dudutni balna kidika witingna silp dutnina kidika yaklauwi di iwi; muih al kulnin yamni yakat dutni kalkukulwa balna kidika muihni balna laih wah diana karang.

²²kaunah Dawan laih witing dini yamyang balna sangninaka kidika laihwi yakwi; ¡witing yakat kalkukulwa balna kidika laih wah duduwas karangki!