Read Mayangna Salmos 35 Bible Online

Salmos 35 - Mayangna bible

Salmos 35

¹Devid kaupak. Dawan, niningnakauh lawa, yang nikingkauh yaklalauwa balna yakat; yababauwa balna niningna yakat dibauta.

²Namatdaknin dini kidika duta aiwa ilpki awah;

³man langmasa kidika duta aiwa muhnitna yakat lawah, ya-uiwi aiwa balna niningna yakat; ¡yayultah man laih yang yalaihwi yakyang man!

⁴Yakasaldi kikirang yaīnin kukulwa muihni balna kidika; asalnina kalahna karang dutni yāyamnin kukulwa muihni balna kidika;

⁵¡dibasta kusulana kat wing duwi kiwa kapat karang, Dawan innisal yaklauwi ruhm'lakwakat!

⁶¡Tāni kidika puksani manah dawak datalni karang dawak Dawan innisal kidika yaklauwi diuiwi kiuna karang!

⁷Yul as dis kaupak yalaihnin dini takipas yakat yalaihnin dini kidika ahana dai; dawak yul dis kaupak pa as kukuhrna dai kidika yakat yang bukna atnik.

⁸¡Di dutni kidika witingna isningna aiwas kat dilaihna karang! ¡Witingna alas dinina kidika wiryaklawi dilaihna karang! ¡Di dutni yakat bubukwahng!

⁹Kaput laih yang alasna duki Dawan yakat kat witing yaklauwi yalaihwi yakna karang bahang.

¹⁰Yang kulnik bitik yulki: “¿Wais kidika man kapatyah Dawan? Muih miniknakunni dawak dukih diawa muihni balna yakat dilaihta yaktaman bahang, kat kidika balna laih tanit pararasni bahang, dawakat bik dinina mamalwi.”

¹¹Muih dudutni balna kidika witnis kakawi dawak yang akat yayulwi dakakawi, amanglatasyang dini kidika.

¹²Yamni kidika dutni kau minitlauwi yayana, kidika yulni uba kulnik sau yakat bukwi;

¹³kat witingna siknis kalalahwak yang kulnik kidika sau yakat bukwadai, askina utuhni kat āwik di kastasyang dai, dawak kulnik pasyakat mikityultayang kidika datasyang dai.

¹⁴Yang liktayang dai kulnik bukwak, yang nanangki yulni kulnik bukwak askina sani āwanayang kapat, kidika-awasbik kaltalyang yamni as dawak yang wirahki palni bik kapat.

¹⁵Kauna yang buknayang mani kat witingna kalpakwi nikingkakarana; yang adika yatalwas muihni asyang kapat,[21] dalani yayana dai laihwatwas ban.

¹⁶Dalani yayana, yangkau sarahni yatatalna,[22] witingna muhnina kidika dipulihna yatatalna.[23]

¹⁷Dawan, ¿ma yapak adika kaput tala awamayah? ¡Sangkika aslah adika laihta yakta, adika layanni ihiwa balna kidika kaupak!

¹⁸Man tawanma muih mahni muhnina yakat tingkih maki; ¡muih mahni muhnina yakat ayangma nuhni yamki!

¹⁹Yang waihkila balna kidika alasna dunin-awaski; pini kaupak dutni yatatalwa balna kidika miniknapa suyungnin awaski.

²⁰Witingna laih kulnin aslah kidika wawalwaski, kauna nawatkauh laih malnikau dutni yamnin kidika ridi kalalahwi adika sauni muihni kulninna yamni balna niningna yakat;

²¹witingna tininapas nuhwi wakahwi nikingkauh yuyulwi: “¡Talnauh yangna talinikda kidika!”

²²¡Adika laih man yakat ki Dawan! ¡Ap dawinih! ¡Yang kaupak naikau kalahwinih!

²³Lawah, Dawan, yang Papangki, ¡sahmuta! La kat kidika yamtah, yang karak awah.

²⁴Laki yamtah, Dawan yang Papangki man lāma barang kidika karak. ¡Yang nikingkarinin-awaski!

²⁵Yulbaunin-awaski dawak bik kulnin-awaski: “¡Adika kuduh dukih mayawadai kidika! ¡Bitik laih daukalpamna mayang!”

²⁶Asalnina manah kalahna karang yang dutniyang kat talwi alasna duduwa balna kidika; witingna kidika asalnina manah minitna yakat muklakna karang witingna kidika tanit muih nuhni kaldakakawa kidika yang karak dawakat.

²⁷kaunah alasna duduwang, sarahwi alasna duduwang yang minit bayakting talnin kukulwa muihni balna kidika; witingna ma bitik yakat yuyulwa kawang: “¡Dawan laih nuhni ki, dawak witing dini yamyang kidika yamni kat talkih kalawi!”

²⁸Yang tuki kau yulki la kat yamtaman kidika; ¡mapiris kaupak masan kat ayangma nuhni yamki!