Read Mayangna Salmos 36 Bible Online

Salmos 36 - Mayangna bible

Salmos 36

¹Coro sumalniyang kaupak, devid kaupak, Papang dini yamyang. Dutni kidika yaklauwi muih dutni yakat yulkalbauwi witing kulnin pasyakat. witing kulnin yakat duwas ki Papang yakat yamadunin kidika.

²Kaldakawi witing kidika ayangni nuhni yamnin ki, dawak dutni yamna balna kidika dutni as bik yakwas kapat kaldakawi.

³Yul maisihni yulyang dawak alas muihni kidika la kat atnin kidika disna, di yamni yamwadai kidika bik dana.

⁴Pāni yakat kalangwi, dutni yamnin balna kidika kulwi yakwi ridi kalahwi; witing tāni dutni kidika yakat barangni laihwi kiwi dutni kidika kaupak danin kulwas ki.

⁵Kaunah Dawan, man dalani talaman kidika laih makau kisang yakat kilwi kāwi; man barangniman kidika laih makau kisang kidika kat kilwi kawi.

⁶Man lāma barangni kidika laih sihm asang nunuhni kapatki; man lāma balna kidika laih sihm kuma nuhni tuhni kapat ki. Man, Dawan, muih al yakat maintalaman dawak di ūk balna yamnaman yakat bik.

⁷¡Man dalani lani dutaman kidika laih yamni palni ki, Papang! ¡Lawāma dinit yakat muih al kidika tanit daknin walwi!

⁸Isninglak palni dawi man ūma kau kasnin dini mahni dutaman bahang; man lawa was auhni as murwatus kidika kaupak diatang didiwa bahang,

⁹kat man yakat sangka atnin saran kidika sakbahang dawak man ingni dutaman kidika kau yangna sipyangna ingni talna atnikna.

¹⁰Kalataman ban, dalani lani dutaman kidika dawak la kat yamtaman kidika bik man amangmalalawa balna kidika, muih ahal kulninna yamni balna.

¹¹Datangkat ya-ataknin awaski, witingna manah kapat kaldakakawa muihni balna, dawak muih dudutni balna yaklauwi yabaunin awaski.

¹²¡Talnauh, muih dudutni balna kidika ampat bubukwih! ¡Bubukwi watwi yaklaunin awas!