Read Mayangna Salmos 37 Bible Online

Salmos 37 - Mayangna bible

Salmos 37

¹Devid kaupak. Muih dudutni balna yulnina kulnam daukalwinih, dawak dutni yamyang balna yulnina tumwinih,

²kat witingna kidika sirihni kusulawi, sihm sihrsihr kapat; ¡dawak dibasta kapat kusulalawi!

³Dawan yakat kulnam āta dutah dawak di yamni balna kidika yamtah, sau yakat yalahta dawak barangni awah.

⁴Kulnam dalani kau kalkultah Dawan yakat, dawak witing yaklauwi di as tanit dukih mawa dini kidika mana karang.

⁵Man sangmaka kidika Dawan tingni yakat kalatah; witing yakat kulnam āta duta, witing kaiwi ilp mawarang.

⁶Yamwak witing barangni kidika yaringni kalahna karang, dawak la kat yamwa kidika bik sihm matunak kat ma yaringni duwa kapat karang.

⁷Dawan muhnitani yakat ap awah; kulnam laihwatta tahatah, bahang witing ilp mawarang. Man kulnam daukalwinih, sangnika pasyakat minit bayayakwa kidika yulni, dawak warkni dudutni balna yamnin kulwa kidika yulni.

⁸Kulnin daukalnin kidika datah, dawak annin kidika ruhmta datah; kulnam daukalwinih, kat kidika yaklauwi di balna kidika baisa daukalwi.

⁹Kat muihni dudutni balna laih kidika sauni kaupak yakmukna karang bahang, kaunah Dawan yakat kulninna āwi duduwa balna laih witing yaklauwi panina diana karang.

¹⁰Baisa tihn dawak muih dudutni balna kidika diskarang ki; walwarang karangbik sip yakwas karangki.

¹¹Kauna muih limamahni balna kidika laih sau adika dinina duduna karang dawak witing isningnalak palni karang di bitik niningyakat.

¹²Muih dutni kidika yaklauwi muih al yamni yakat dutni kalyamnin yamwi, dawak witing minikpa kau talwa kidika laih dutni kulwi kaltalwi.

¹³Kaunah Dawan laih kari, kat witing laih amanglawi muih dutni awarni balna kaiwi kawa kidika.

¹⁴Muih dudutni balna kidika lasnina yakwi ihiwi muih miniknakunni balna dawak limahni balna kidika bukna atnin yulni, ¡muih yamni yamyang balna kidika īna atnin yulni!

¹⁵Kauna witing alas isniparah kidika kau isning yakat pana karang, dawak lasni balna kidika bahwi bikis dana karang.

¹⁶Muih al yamni di bubin duwa kidika kau yamni ki, muih dudutni balna di mahni duduwa kidika karang dawakat.

¹⁷Kat Dawan yaklauwi dahn yamna karang muih dudutni balna kidika, kauna muih yayamni balna kidika laih laihwi dulauwarang.

¹⁸Dawan yaklauwi muih dutni yayamwas balna kidika maintalwi, dawak witingna dininapahni kidika laih ban kaput karang bayakkiwas.

¹⁹Ma dutni balna kasnin dini dis kalwa kidika yakat witingna asalnina kalahwas bayayakwarang, kat witingna laih kasninna manas duduwarang bahang.

²⁰Muih dudutni balna kidika laih dibasta buhlana kapat[24] dibusna karang; Dawan waihnila balna kidika wayau kapat pini didisna karang.

²¹Muih dutni kidika di as wayaki yulwi duwi kauna lauwaski kauna muih al yamni kidika laih minikun talnin lani duwi dawak kulnin bik yamni ki.

²²Dawan yaklauwi blisyamwa muihni balna kidika, witingna sau adika duduna karang, kaunah witing yaklauwi dutni diyulna muihni balna kidika laih dadauna karang.

²³Dawan yaklauwi duwi kiwi muih al lapakwa balna kidika dawak witing angdika tani dukih kalawa yakat lakna ki;

²⁴bukwarang karang bik, witing ban kaput awaskarang, kat Dawan yaklauwi witing tingni yakat laihwa bahang.

²⁵Yang wahmayang dai, kauna waralaih muih barak kalnayang, kauna yang talasyang dai muih al yamni kidika ruhmwi dana kat, dawak walanibis balna kidika talasyang dai muih kauh diyuyulwak.

²⁶Awar bitik yakat minikun talnin kidika kulnin yakat sakki, bahang muih yakat witing dini kidika wayaki diawi; dawak walanibis balna kidika laih blisin as ki.

²⁷Dutni kidika kaupak naikau alahwah, dawak di yamni kidika yamtah, dawak kaput laih man ban kaput duta awama yalahnam pāni kidika.

²⁸Kat Dawan laih la barangni kidika dalani talwi dawak ruhmwi dawaski witing yakat barangni balna kidika; kaunah muih dudutni balna kidika laih dismukwi[25] sulani as bik dawaski.

²⁹Muih ahal yayamni balna kidika laih sau kidika witingna dinina duduna karang dawak kidika yakat witingna laih nining ban kaput yalalahna karang.

³⁰Muih al yamni kidika sins lani tuhni karak yulbauwi; dawak muih al yamni kidika la kat yulbauwi.

³¹Witing isning yakat duwi Papang sumalna balna kidika; ¡kidika bahang wat as bik atakwak karhwas karang kalni!

³²Muih dutni kidika muih al yamni yakat yakpakdi kaltalwi, īna atnin yulni;

³³kaunah Dawan yaklauwi dawas karang witing tingni yakat bukna atnin, kaput bik dakwak muih dutni kapat kalkukulwas karang.

³⁴Man Dawan yakat kulnam āta dutah, dawak yulni kat daka yamtah, kat witing yaklauwi malaihwi madulauna karang, dawak sauni kidika man yakat dima manakarang. ¡Man mamakpa kau talma muih dudutni balna kidika dismukwak!

³⁵Muih dutni kidika talnayang, witing manah nuhni kaldakawak, sihm pan as nuhni kalwa kapat;

³⁶kaunah kiuna, dawak likdai kidika diswada; walnayang, kauna sip yaktasyang dai.

³⁷Yamni talah muih al as kulnin yamni dawak dutni bik yamwas yakat: kidika lani tanit yakat sakkidika laih kulnin aslah lani.

³⁸Kauna kulninna dudutni balna kidika laih amungni dismukna karang; muih dudutni balna tanitna kau sakkidika laih dismuknin kidika sakki.

³⁹Muih ahal yayamni balna ilpnina kaiwa kidika laih Dawan kaupak kaiwi, bahang kidika laih yakmaldinin pāni as duduwi ma dutni balna kaiwak.

⁴⁰Dawan yaklauwi ilp diawak kiri yaklalawi. Diyamwak muih dudutni balna kaupak kiri yaklalawi, dawak laihwi yakwi, kat witing yakat tanitna daknin kidika wawalna bahang.