Read Mayangna Salmos 38 Bible Online

Salmos 38 - Mayangna bible

Salmos 38

¹Devid isningkatna atnin salnimo. Dawan man kulnam daukalna kidika karak yalibitwinih dawak bik wah yawinih man kulnam daukalna kidika karak.

²Kat yang akat man simabang balna kidika yapana ki; ¡man tingma kidika yang mikit yakat datang bukna!

³Man antaman, yang dutki balna yulni; yang muihki bitik siknis ki; ¡yang wakalki as bik yamni diski!

⁴Yang dutki balna kidika yataihwi; tikini kidika yang sip truktasyang.

⁵Tapaki dadasni yulni yadakna balna kidika dutlawi wayani kalwi.

⁶Mapiris kaupak masan kat kulnik bukna likyang abuk likyang kulnik tikini yataihwak.

⁷Dangki kidika yamah manah daihni ki; ¡muihki kidika bitik laih siknis manah ki!

⁸Muihki bitik laih yatikna kapat dalani manah ki, dawak paraski bik diski; ¡yang yultik aidayang balna kidika laih kulnik dinit kaupak kalahwi!

⁹Dawan, yang dukih yawa balna kidika bitik talaman, ¡wingkita puhtayang balna kidika man namangyakat malni awaski!

¹⁰Yang ising kidika sirihni wark kalahwi, parasni bitik laih disdawi, ¡dawak mikpa balna bik ditalas datayang!

¹¹Yang kaltalyang yayamni dutayang kidika dawak wanaihki balna kat bik, yang kaupak nailuihki, dawak pilauki balna kaupak bik naikau ki.

¹²Yaīnin kukulwa balna kidika, takipas yakat yalaihnin dini ahawi; dutni yāyamnin kukulwa kidika yadaukalpamnin yuyulwi dawak awar bitik yakat malnikau yaīnin kidika yayamwi.

¹³Kaunah yang tappuk kaltayang, sihm yang di dakasyang kapat; tubiyang kapat tikpas wakahtasyang.

¹⁴Yang laih, muih as di dakawas kapatyang, witing silp alas ilpni yulwas kapat.

¹⁵Yang, man yakat tahatayang, Dawan, yang Papangki, man lawa nangkitlatah.

¹⁶Yang adika manah yultayang, nikingkarinin-awaski mikit bayakna kidika yulnin-awaski buktingkat.

¹⁷Rahm kidika laih buknik manah ki; yadalawa balna kidika yadawaski.

¹⁸¡Yang dutni balna yamnayang kidika yulki, kat dutni manah yabahngilwa bahang!

¹⁹Yang waihkila balna kidika baisa mahni kalna; pini kaupak dutni yakukulwa balna kidika mahni kalna.

²⁰Yang yamni diyamnayang kidika, biriwi dutni yayayamna; kat di yamni kidika yamkuhtik walting kat yang nikingkauh manah yaklalauwi.

²¹Dawan, ¡yang alas yadawinih! Yang Papangki, ¡yang kaupak naikau kalahwinih!

²²Papang, yalaihwi yakyang, ¡sirihni aiwa ilpki awah!